កីឡាអន្តរជាតិ
អន្តរជាតិ
គ្រូថៃ៖ ម៉ាឡេស៊ីសក្តិសមលេងនៅវគ្គផ្តាច់ព្រ័ត្រ ព្រោះពួកគេឃ្លានជ័យជម្នះជាងថៃ
× លោក Milovan Rajevac គ្រូបង្វឹកក្រុមកីឡាបាល់ទាត់ជម្រើសជាតិថៃបានកោតសរសើរកូនក្រុមរបស់ជម្រើសជាតិម៉ាឡេស៊ីថាពួកគេបានបង្ហាញការស្រេកឃ្លានជ័យជម្នះយ៉ាងខ្លាំងក្លាដោយអាចទម្លាក់ក្រុមលោកត្រឹមវគ្គ១/២ផ្តាច់ព្រ័ត្រដើម្បីបានកៅអីទៅដណ្តើមពាន AFF Suzuki Cup ឆ្នាំ២០១៨ នៅវគ្គផ្តាច់ព្រ័ត្រ។
ក្រុមម្ចាស់ផ្ទះថៃ បានបើកការប្រកួតជើងទី២ វគ្គពាក់កណ្តាលផ្តាច់ព្រ័ត្រ ទល់នឹងម៉ាឡេស៊ី ដោយបញ្ចប់ទៅក្នុងលទ្ធផល ២-២ នៅឯកីឡដ្ឋាន Rajamangala ក្នុងក្រុងបាងកក នាយប់ថ្ងៃទី៥ ខែធ្នូ។ បើទោះបីស្មើគ្រាប់បាល់គ្នា ប៉ុន្តែម៉ាឡេស៊ីជាក្រុមដែលមានសិទ្ធិ បន្តទៅកាន់វគ្គផ្តាច់ព្រ័ត្រ ព្រោះមានគ្រាប់បាល់ចំណេញក្រៅដី (away goals) ២គ្រាប់ ខណៈដែលជើងទី១ ក្នុងទឹកដីម៉ាឡេស៊ី ពួកគេគ្មានគ្រាប់បាល់ស៊ុតបញ្ចូលទីគ្នាឡើយ។
គ្រូបង្វឹកសញ្ជាតិស៊ែប៊ី ដែលឡើងដឹកនាំថៃក្នុងឆ្នាំ២០១៧ បានលើកសរសើរក្រុមរបស់លោក Tan Cheng Hoe មិនដាច់ពីមាត់នោះទេ បើទោះបីជាលោកខកចិត្ត នឹងលទ្ធផលនៃការប្រកួតវគ្គពាក់កណ្តាលផ្តាច់ព្រ័ត្រនេះក៏ដោយ។
«ជាការពិតណាស់ ខ្ញុំមិនពេញចិត្តទេ ដែលក្រុមយើងមិនអាចបន្តទៅកាន់ការប្រកួតវគ្គផ្តាច់ព្រ័ត្រ ប៉ុន្តែវាជាបទពិសោធមួយផ្សេង សម្រាប់កីឡាកររបស់យើង។ ខ្ញុំចង់អបអរដល់ក្រុមម៉ាឡេស៊ី។ ពួកគេសមនឹងលេងក្នុងវគ្គផ្តាច់ព្រ័ត្រជាងយើង។ ខ្ញុំនិយាយបែបនេះ ព្រោះខ្ញុំមើលឃើញថា នៅក្នុងការប្រកួតទាំងពីរជើង ម៉ាឡេស៊ី ពិតជាបានបង្ហាញការប្តេជ្ញាចិត្ត និងការស្រេកឃ្លានចង់ឈ្នះ ច្រើនជាងថៃ។ ពួកគេ ពិតជាចង់ទៅវគ្គផ្តាច់ព្រ័ត្រនេះខ្លាំងណាស់»។ លោក Rajevac និយាយ នៅក្នុងគេហទំព័រផ្លូវការរបស់ AFF Suzuki Cup 2018 ដូច្នេះ នៅក្រោយបញ្ចប់ការប្រកួត។
លោក Milovan Rajevac គ្រូបង្វឹកជម្រើសជាតិថៃ
យ៉ាងណា បើទោះក្រុមរហ្សនាមដំរី ធ្លាក់នៅវគ្គនេះ សម្រាប់ពាន Suzuki Cup ក៏ដោយ តែអតីតគ្រូជម្រើសជាតិហ្គាណា វ័យ៦៤ឆ្នាំរូបនេះ បានផ្តោតអារម្មណ៍ទៅកាន់ការប្រកួតប្រជែងពាន AFC Asian Cup 2019 វិញដែលនឹងចាប់ផ្តើមក្នុងខែមករាខាងមុខ។
ម៉ាឡេស៊ី នឹងត្រូវរង់ចាំការប្រកួត រវាងវៀតណាម និងហ្វីលីពីននៅយប់នេះ ក្នុងជំនួបជើងទី២ ដែលធ្វើឡើងនៅទឹកដីវៀតណាមវិញម្តង។ ជើងទី១ វៀតណាមឈ្នះហ្វីលីពីន២-១៕
Tag:
បាល់ទាត់
AFF Suzuki Cup
ថៃ
Milovan Rajevac
© រក្សាសិទ្ធិដោយ thmeythmey.com