ចំបាប់ នឹងទៅពង្រឹងសមត្ថភាពនៅចិន និងកូរ៉េ ដើម្បីត្រៀមស៊ីហ្គេម

កីឡាជាតិ

ជាតិ

ចំបាប់ នឹងទៅពង្រឹងសមត្ថភាពនៅចិន និងកូរ៉េ ដើម្បីត្រៀមស៊ីហ្គេម

07, Dec 2018 , 7:59 am

រូបភាព

ដោយ:

កីឡាករកីឡាការិនីចំបាប់ នឹងទៅពង្រឹងសមត្ថភាពនៅក្រៅប្រទេស ដើម្បីត្រៀមប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមលើកទី៣០នៅហ្វីលីពីនឆ្នាំក្រោយ បន្ទាប់ពីខកខានចូលរួមពីរលើកកន្លងមក។ បើតាមលោក វ៉ាត់ ចំរើន ប្រធានសហព័ន្ធកីឡាចំបាប់កម្ពុជា ប្រទេសដែលកម្ពុជាគ្រោងបញ្ជូនកីឡាករទៅហ្វឹកហាត់រួមមានចិន និងកូរ៉េខាងត្បូង។

ចំបាប់ដែលជាប្រភេទកីឡាសន្តានុពលរបស់កម្ពុជានាការប្រកួតកីឡាស៊ីហ្គេមឆ្នាំ២០១៣ នៅប្រទេសមីយ៉ាន់ម៉ា នឹងបញ្ជូនអត្តពលិកទៅហ្វឹកហាត់ពង្រឹងសមត្ថភាពនៅប្រទេសចិន និងកូរ៉េខាងត្បូងនៅឆ្នាំក្រោយ។ ការបញ្ជូននេះ គឺដើម្បីត្រៀមប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមឆ្នាំ២០១៩ នៅហ្វីលីពីន ចន្លោះពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩។

ក្រោយជំនួបជាមួយប្រតិភូចំបាប់កូរ៉េ កាលពីថ្ងៃទី៤ ធ្នូ លោក វ៉ាត់ ចំរើន បានបញ្ជាក់យ៉ាងដូច្នេះថា៖«សហព័ន្ធចំបាប់យើងត្រៀមលក្ខណបញ្ជូនកីឡាករកីឡាការិនី៥រូបទៅហ្វឹកហាត់នៅចិន ដើម្បីត្រៀមប្រកួតកីឡាស៊ីហ្គេមឆ្នាំក្រោយ ហើយយើងក៏មានការបញ្ជូនកីឡាករមួយចំនួនទៅហ្វឹកហាត់នៅកូរ៉េផងដែរ។ យើងយកចិត្តទុកដាក់ខ្លាំងលើកីឡាការិនី ព្រោះកីឡាការិនីមានអាទិភាពខ្ពស់ជាងកីឡាករក្នុងការដណ្តើមមេដាយ»។

ការបញ្ជូនទៅហ្វឹកហាត់ក្រៅប្រទេសនេះដែរ គឺដើម្បីរក្សាកំណត់ត្រាល្អរបស់ខ្លួន ដែលធ្លាប់ឈ្នះមេដាយមាស៤ ប្រាក់២ និងសំរឹទ្ធ៤ ពីស៊ីហ្គេមនៅមីយ៉ាន់ម៉ា កាលពីឆ្នាំ២០១៣។ មេដាយមាសទាំង៤រកបានដោយកីឡាករ ឌន សៅ, ខូវ ឈាងហុង, កីឡាការិនី ចូវ សុធារ៉ា និង និ សំណាង រីឯមេដាយប្រាក់រកដោយកីឡាករ ឌន សៅ និងកីឡាការិនី ជា ស្រីមាស និងមេដាយសំរឹទ្ធរកបានដោយកីឡាករ ងួន គឹមហេង, កាង ដែនពិសិដ្ឋ, Joshua Sou និង ចាន់ រស្មី។

«ផែនការរបស់កីឡាចំបាប់យើងនៅឆ្នាំក្រោយនេះ គឺជំរុញការហ្វឹកហាត់ពង្រឹងបច្ចេកទេសឲ្យកាន់តែប្រសើរ ធ្វើយ៉ាងណារក្សាឲ្យបានសក្តានុពលរបស់កីឡាចំបាប់ក្នុងស៊ីហ្គេមឆ្នាំក្រោយ ដោយសារកីឡាចំបាប់យើងបានខកខានចូលរួមស៊ីហ្គេមពីរលើករួចមកហើយ។ ដូច្នេះឆ្នាំ២០១៩នេះ ជាឆ្នាំចាប់ផ្តើមសារឡើងវិញរបស់កីឡាចំបាប់ ដើម្បីត្រៀមស៊ីហ្គេមឆ្នាំ២០២៣»។ នេះជាការលើកឡើងរបស់លោក វ៉ាត់ ចំរើន។

ទោះបីយ៉ាងនេះក្តី អគ្គលេខាធិការនៃគណៈកម្មាធិការជាតិអូឡាំពិកកម្ពុជាខាងលើ មិនបានបញ្ជាក់ពីពេលវេលាច្បាស់លាស់ក្នុងការបញ្ជូនកីឡាករកីឡាការិនីទៅហ្វឹកហាត់នៅប្រទេសទាំងពីរនៅឡើយទេ។

ប្រតិភូកីឡាចំបាប់កូរ៉េខាងត្បូងត្រូវបំពេញទស្សនកិច្ចរយៈពេល៩ថ្ងៃនៅកម្ពុជា ចាប់ពីថ្ងៃទី៤-១២ ខែធ្នូ ឆ្នាំ២០១៨។ ក្នុងដំណើរទស្សនកិច្ចនៅកម្ពុជានេះដែរ ក្រុមកីឡាករកីឡាការិនីជម្រើសជាតិកូរ៉េនឹងហ្វឹកហាត់រួមគ្នាជាមួយកីឡាករកីឡាការិនីជម្រើសជាតិកម្ពុជា ដើម្បីផ្លាស់ប្តូរបច្ចេកទេស និងបទពិសោធ។ លោក វ៉ាត់ ចំរើន ចាត់ទុកដំណើរទស្សនកិច្ចនេះ ជាឱកាសមួយដ៏ល្អសម្រាប់កីឡាករកម្ពុជាក្នុងការដកស្រង់បទពិសោធពីកីឡាករកម្រិតខ្ពស់របស់កូរ៉េ ពិសេសធ្វើឲ្យពួកគេដឹងពីកម្រិតសមត្ថភាពកម្ពុជា៕