Messi តូចត្រូវភៀសខ្លួនចេញពីផ្ទះលើកទី២ ព្រោះការគំរាមរបស់ឧទ្ទាមតាលីបង់

កីឡាអន្តរជាតិ

អន្តរជាតិ

Messi តូចត្រូវភៀសខ្លួនចេញពីផ្ទះលើកទី២ ព្រោះការគំរាមរបស់ឧទ្ទាមតាលីបង់

07, Dec 2018 , 7:19 pm

រូបភាព

ដោយ: ទេព ពិទូរ្យ

ក្មេងប្រុសអាហ្វហ្គានីស្ថានដែលត្រូវបានប្រជាជនជុំវិញពិភពលោកស្គាល់តាមរយៈបណ្តាញសង្គមដោយសារការគាំទ្រយ៉ាងស្មោះស្ម័គ្ររបស់គេចំពោះកំពូលតារាបាល់ទាត់ Lionel Messi ពេលនេះត្រូវបង្ខំចិត្តរត់ភៀសខ្លួនចេញពីលំនៅដ្ឋានជាលើកទី២ ព្រោះបញ្ហាសង្គ្រាមក្នុងស្រុក។

ក្មេងប្រុស Murtaza Ahmadi អាយុ ៧ ឆ្នាំបានទទួលការចាប់អារម្មណ៍ខ្លាំងក្នុងឆ្នាំ ២០១៦ បន្ទាប់ពីរូបគេត្រូវបានថតរូបនៅពេលយកថង់ប្លាស្ទិកឆ្នៃធ្វើជាអាវរបស់ក្រុមជម្រើសជាតិអាហ្សង់ទីន ដោយដាក់លេខ១០ និងសរសេរឈ្មោះ Messi ថែមទៀត។ ក្រោយមកក្មេងប្រុសម្នាក់នេះ អាចធ្វើដំណើរទៅជួបវីរបុរសរបស់គេ Messi តាមក្តីស្រមៃ នៅប្រទេសកាតា។

ក្រុមគ្រួសាររបស់ Ahmadi និយាយថាបច្ចុប្បននេះពួកគេបានបោះបង់ចោលផ្ទះនៅក្នុងប្រទេសអាហ្វហ្គានីស្ថានបន្ទាប់ពីទទួលការគំរាមកំហែងពីក្រុមឧទ្ទាមតាលីបង់។

ខេត្ត Ghazni ស្ថិតនៅភាគអាគ្នេយ៍នៃប្រទេសអាហ្វហ្គានីស្ថាន ត្រូវបានពួកសកម្មប្រយុទ្ធកំពុងកំណត់គោលដៅ ដែលធ្វើឲ្យក្រុមគ្រួសាររបស់ Ahmadi ត្រូវរត់គេចខ្លួនទៅកាន់រដ្ឋធានីកាប៊ុលវិញ។

យោងតាមទីភ្នាក់ងារព័ត៌មាន AFP ពួកគេបានស្វែងរកទីជ្រកកោនរយៈពេលខ្លីនៅប៉ាគីស្ថានម្តងដែរកាលពីឆ្នាំ ២០១៦ ប៉ុន្តែត្រូវបង្ខំចិត្តត្រឡប់ទៅទីកំណើតវិញ បន្ទាប់ពីពួកគេអស់លុយ៕