បទយកការណ៍ / បទសម្ភាសន៍
ខណៈមនុស្សទូទៅកាត់នំ គ្រួសារមួយនិមន្តព្រះសង្ឃបង្សុកូលធ្វើខួបកំណើតឱ្យកូន
× ភ្នំពេញ៖ សម័យបច្ចុប្បន្នទាំងនៅរាជធានីភ្នំពេញ និងនៅតាមបណ្ដាខេត្ត ភាគច្រើនគេនិយមកាត់នំតាមបែបប្រពៃណីអ៊ឺរ៉ុប នៅថ្ងៃខួបកំណើតរបស់ខ្លួន។ ប្លែកខុសគេ គ្រួសារថ្មីថ្មោងមួយគូ បាននិមន្តព្រះសង្ឃសូត្រមន្តបង្សុកូល និងលើករាសីឱ្យកូន ក្នុងថ្ងៃខួបកំណើត ជំនួសឱ្យការកាត់នំតាមប្រពៃណីអ៊ឺរ៉ុប។ អ្នកនាង ឡង សុវណ្ណារី ជាម្ដាយដែលធ្វើពិធីសង្ឃទានក្នុងឱកាសខួបកំណើតកូននោះ បានបញ្ជាក់ថា នាងធ្វើបែបនេះដើម្បីឱ្យកូនរបស់ខ្លួនសុខសប្បាយ មិនមានជំងឺ និងមានសិរីសួស្ដីផង។
ដើម្បីបានជ្រាបច្បាស់សូមស្ដាប់បទយកការណ៍ដែលរៀបចំដោយកញ្ញា ប៉ូ សាគុន ដូចតទៅ៖
កាត់នំខេកធ្វើខួបកំណើតគឺជារឿងធម្មតាទៅហើយនៅសម័យបច្ចុប្បន្ន ក្នុងសង្គមខ្មែរ តែធ្វើសង្ឃទាននិមន្តព្រះសង្ឃបង្សុកូលលើករាសី ដើម្បីធ្វើខួបកំណើតឱ្យកូនទើបជារឿងប្លែក។
នៅក្នុងផ្ទះថ្មផ្ទាល់ដីតូចល្មមក្នុងភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ ក្រុងភ្នំពេញ គឺជាផ្ទះរបស់អ្នកនាង សុវណ្ណារី និងលោក សុភាព ដែលកំពុងធ្វើពិធីសូត្រមន្ត លើករាសី ឱ្យកូនក្នុងថ្ងៃខួបកំណើត។ តាមពិតទៅគ្រួសារនេះតែងតែធ្វើពិធីសូត្រមន្ត លើករាសីរៀងរាល់មួយឆ្នាំម្ដង។
ផ្ដួចផ្ដើមគំនិតដោយប្ដីនិងប្រពន្ធខ្លួនឯងផ្ទាល់ ព្រមទាំងមានដំបូន្មានពីចាស់ទំផងនោះ អ្នកនាង ឡង សុវណ្ណារី អាយុ២៥ឆ្នាំត្រូវជាម្ដាយ បានរៀបចំថ្ងៃកំណើតកូន ដោយនិមន្តព្រះសង្ឃ២អង្គ សូត្រមន្តបង្សុកូល និងលើករាសីឱ្យកូន។ ដោយមិនចង់ធ្វើពិធីកាត់នំតាមបែបអ៊ឺរ៉ុបទាំងស្រុង អ្នកនាង សុវណ្ណារី បានមើលឃើញគុណប្រយោជន៍ ពីការសូត្រមន្ត លើករាសីឱ្យកូន ដែលអ្នកនាងថា អាចជួយឱ្យកូនប្រុសរបស់ខ្លួនមានសុខភាពល្អ មិនមានជំងឺ និងក្លាយជាមនុស្សល្អផង។ ការសូត្រមន្ត លើករាសី និងបង្សុកូល គឺជាពិធីដែលគ្រួសារមួយនេះតែងតែធ្វើជារៀងរាល់ឆ្នាំ ដើម្បីឱ្យបានសេចក្ដីសុខចម្រើនក្នុងគ្រួសារទាំងមូល ហើយឆ្នាំនេះដោយចង់ឱ្យកូនមានសិរីសួស្ដីផង សុវណ្ណារី ក៏ភ្ជាប់ថ្ងៃខួបកំណើតកូនជាមួយពិធីតែម្ដង។
។ រវល់ចំអិនម្ហូបសម្រាប់សង្ហាន់ព្រះសង្ឃបណ្ដើរ និងឆ្លៀតឆ្លើយតបជាមួយខ្ញុំបណ្ដើរ អ្នកម្ដាយរូបនេះមានជំនឿយ៉ាងមុតមាំថា ការសូត្រមន្តលើករាសីសម្រាប់ខួបកំណើតគម្រប់មួយខួបកូនប្រុសរបស់ខ្លួន អាចជួយឱ្យថ្ងៃអនាគត ក្មេងប្រុសម្នាក់នេះមានសិរីសួស្ដី។ ជាការរួមចំណែកថែរក្សាទំនៀមទម្លាប់ប្រពៃណីខ្មែរ និងផ្នែកព្រះពុទ្ធសាសនាផងនោះ អ្នកនាង សុវណ្ណារី នៅតែបន្តរៀបចំខួបកំណើតកូន ដោយនិមន្តព្រះសង្ឃសូត្រមន្ត លើករាសី បង្សុកូលឧទ្ធិសកុសលដល់ញាតិដែលបានចែកឋានទៅផង និងដើម្បីគ្រួសារនិងកូនបានសេចក្ដីសុខផង។ សុវណ្ណារី បញ្ជាក់ ៖«យើងធ្វើពេលបង្សុកូលហ្នឹងដើម្បីឧទ្ធិសកុសលដល់ជីដូនជីតាផង ហើយធ្វើដើម្បីឱ្យគាត់(កូន)មានរាសី កុំឱ្យគាត់មានជំងឺ ឱ្យរាសីគាត់ខ្ពស់ ឱ្យគាត់ជាមនុស្សល្អ។ ខ្ញុំជឿថាការធ្វើពិធីនេះអាចជួយគាត់បាន»។
ត្រូវជាឪពុករបស់កុមារា តៀន ជិឆឹង ដែលត្រូវធ្វើខួបកំណើតនេះ លោក សៀន សុភាព បាននិយាយថា ពិធីនេះនិងអាចជួយលើករាសីកូនរបស់ខ្លួន មិនឱ្យមានអមនុស្សដែលជាភាវមិនល្អ អាចបៀតបៀនបាន។ ឪពុកដែលមានវ័យ២៧ឆ្នាំរូបនេះ ជឿជាក់ថាការធ្វើបែបនេះនឹងនាំសេចក្ដីសុខដល់គ្រួសារយ៉ាងពិតប្រាកដ ដ្បិតអីកន្លងមក ក្រុមញាតិរបស់លោកតែងតែធ្វើ ហើយក៏ទទួលបានសេចក្ដីសុខចម្រើន។ លោក សុភាព ថាម្ដាយឪពុកដទៃទៀត គួរណាស់តែធ្វើពិធីសូត្រមន្ត លើករាសី និងបង្សុកូល ក្នុងថ្ងៃខួបកំណើតកូន ឬខ្លួនឯង ឬបើមិនមានលទ្ធភាពទេ គ្រាន់តែធ្វើចង្ហាន់ទៅប្រគេនព្រះសង្ឃក្នុងថ្ងៃនោះ ក៏ល្អ ព្រោះដើម្បីសន្សំបុណ្យផង។ «យើងសូត្រមន្តលើករាសីហ្នឹងដើម្បីលើករាសីកូន កុំឱ្យអមនុស្សដែលមិនល្អហ្នឹងអាចបៀតបៀនកូនបាន។ គោរពទំនៀមទម្លាប់ហ្នឹងធ្វើឱ្យជីវិតយើងកាន់តែប្រសើរឡើង។ បើអ្នកមិនមានពេល អាចធ្វើចង្ហាន់ទៅប្រគេនព្រះសង្ឃក៏បាន»។ នេះជាការបញ្ជាក់របស់លោក សុភាព។
ចំណែកអ្នកជិតខាងដែលបានចូលរួមក្នុងពិធីនេះ អ្នកស្រី ម៉ែន សារ៉ែន វ័យ៥៤ឆ្នាំ ថាអ្នកភូមិរបស់ខ្លួនតែងតែនិមន្តព្រះសង្ឃ លើករាសី និងបង្សុកូល ក្នុងថ្ងៃកំណើតជាទៀតទាត់ដើម្បីឱ្យមានសេចក្ដីសុខសុភមង្គលក្នុងគ្រួសារ ដោយមិនគ្រាន់តែកាត់នំតាបបែបអ៊ឺរ៉ុននោះ។ ស្ត្រីរូបនេះថាពិធីនេះជាទំនៀមទម្លាប់សម្រាប់អ្នកភូមិរបស់អ្នកស្រី។ អ្នកស្រី សារ៉ែន បន្ថែម ៖« ធ្វើដើម្បីឱ្យមានសេចក្ដីសុខសាន្តក្នុងក្រុមគ្រួសារ ពីដើមមកគេតែងតែធ្វើបែបនេះ»។
រីឯអាចារ្យមង្គល គង់ ហមុនី ដែលមានភារៈក្នុងពិធីមង្គលនេះ បានពន្យល់ពីការរៀបចំពិធីយ៉ាងដូច្នេះ៖«ព្រះបរិត្តនេះជាការផ្សាយនូវមេត្តា សូត្របណ្ដេញនូវឧបទ្រពចង្រៃ ដែលមានចិត្តមិនល្អ បណ្តេញចេញឱ្យអស់ ឱ្យយើងមិនមានគំនិតគិតពីអំពើអាក្រក់»។
លោកបានបន្ថែមថា ក្នុងព្រះពុទ្ធសាសនាការធ្វើពិធីលើករាសី គឺជាការបង្កក់សិរីសួស្ដីឱ្យដល់ក្រុមគ្រួសារ បណ្ដុះធម៌យោគយល់គ្នា អធ្យាស្រ័យគ្នា។ ហើយការធ្វើពិធីបែបនេះក្នុងថ្ងៃខួបកំណើតកូន ក៏ជាការប្រកាសដល់ទេវតា អារុក្ខអារក្សអ្នកតា និងជីដូនជីតា ឱ្យទទួលស្គាល់ពីកំណើររបស់ក្មេង និងបានតាមថែរក្សាផងដែរ។ លោកអាចារ្យបន្ថែម ៖«ការបង្កក់សិរីសួស្ដីដល់ចៅប្រុស ក្នុងថ្ងៃខួបកំណើតនេះ គេហៅថាការប្រកាសថាគ្រួសារនេះ កើតបានកូនមួយអាយុមួយឆ្នាំហើយ សូមប្រកាសដល់ទេវតា ជីដូនជីតា ឱ្យគ្រប់គ្រងថែរក្សា»៕
Tag:
ភ្នំពេញ
កុមារ
សាសនា
© រក្សាសិទ្ធិដោយ thmeythmey.com