ONE Championship
កីឡាជាតិ
ជាតិ
×![]()
ដោយ: ថ្មីៗ
ព្រឹត្តិការណ៍ចុងឆ្នាំ២០១៨ របស់ ONE Championship នៅទីក្រុងគូឡាឡាំពួ ប្រទេសម៉ាឡេស៊ី កន្លងទៅថ្មីៗនេះ ពិតជាអង្រួនបេះដូងទស្សនិជកទូទាំងប្រទេសឲ្យបំភ្លេចមិនបាន។ ក្នុងនោះ តារាប្រដាល់កម្ពុជាទើបរះថ្មី ឯម សុវណ្ណារី ក៏មានវត្តមានសម្រាបការប្រកួតក្នុងទ្រុង ONE: DESTINY OF CHAMPIONS ជាមួយកីឡាការិនីអ៊ុយក្រែននាង Iryna "Delsa" Kyselova ផងដែរ ក្នុងចំនោមគូប្រកួតសរុបទាំងអស់ ១១គូ។
កីឡាករខ្មែរ-អាមេរិករូបនេះ ចេញបង្ហាញខ្លួនសំដៅមកកណ្តាលសង្វៀនប្រដាល់ ពេលនោះឃើញថាមានទស្សនិកជនមកទស្សនារាប់លាននាក់ទូទាំងពិភពលោកបានហ៊ោកញ្ជ្រៀវទះដៃ តែនាងនៅតែរក្សាស្មារតីខ្ពស់ ហើយបញ្ចេញស្នាមញញឹមដល់អ្នកគាំទ្រ ទោះដឹងថាប៉ះគូប្រយុទ្ធលើកនេះមិនងាយស្រួលទេ ព្រោះគេខ្ពស់ជាង ខ្លាំងជាង ហើយមានបទពិសោធន៍ប្រកួតច្រើនជាងខ្លួនគុណនឹង ៦ដង។
គ្រាន់តែជួងបន្លឺឡើងភ្លាម សុវណ្ណារី ផ្ចង់ស្មារតីសម្រុកកណ្តាប់ដៃទៅដាល់ Iryna ចំៗ ហើយបានរកស្នៀតចាប់បោកដៃគូឲ្យក្រាបដល់ដី គោលបំណងសង្គ្រប់ឲ្យជាប់ រួចប្រើកម្លាំងចាប់ក្លេរសង្កត់នាង Iryna ជាប់ រហូតដល់អាជ្ងាកណ្តាលសម្រេចបញ្ឈប់ការប្រកួតនៅត្រឹមទឹកទី១ នាទីទី ១:២១ ប៉ុណ្ណោះ។
សុវណ្ណារី រៀបរាប់បន្ទាប់ពីប្រកួតហើយភា្លមថា៖ «ខ្ញុំអត់មានអារម្មណ៍ញាប់ញ័រទេ មុនការប្រកួតនេះយើងហ្វឹកហាត់ដល់កម្រិតគ្រប់គ្រាន់ហើយ ខ្ញុំបានត្រៀមខ្លួនជាស្រេច អ៊ីចឹងដូចជាមិនសូវភិតភ័យ ប៉ុន្តែរំភើបទៅវិញទេ និយាយទៅសប្បាយវាយតែម្តង»។
កីឡាការិនីរូបនេះបានលើកទង់ជាតិកម្ពុជាដែលជាអត្តសញ្ញាណដូនតាខ្លួនលើឆាកអន្តរជាតិ ទោះជាសព្វថ្ងៃនាងរស់នៅសហរដ្ឋអាមេរិកក៏ដោយ។
«វាជាមេរៀនមួយដ៏អស្ចារ្យ ! ខ្ញុំសង្កេតឃើញចំណុចខ្វះខាតមួយចំនួនដែរ ដែលគិតថាខ្ញុំគួរធ្វើឲ្យល្អជាងពេលនោះ យ៉ាងណាមិញវាជាបទពិសោធន៍មួយដែលខ្ញុំត្រូវយកទៅសិក្សាបន្ត។ តែសរុបមក ខ្ញុំមានអារម្មណ៍ថាខ្ញុំធ្វើបានសឹងល្អឥតខ្ចោះហើយ»។
«ខ្ញុំជាមនុស្សអៀនច្រើន ហើយមិនចូលចិត្តទាមទារចំណាប់អារម្មណ៍អីនោះទេ តែដល់ពេលឡើងលើសង្វៀនមានភ្លើងឆ្វេរឆ្វារ ព្រមទាំងសម្លេងស្រែកហ៊ោពីអ្នកគាំទ្រច្រើនផង វាធ្វើឲ្យខ្ញុំមានអារម្មណ៍ពិសេសណាស់»។
ថ្វីបើខ្លួនផ្តួលគូប្រកួតបានយ៉ាងផុយមែន ប៉ុន្តែ សុវណ្ណារី និងគ្រូបង្វឹកផ្ទាល់លោក Justen Hamilton ក៏មិនភ្លេចលើកសរសើរពីកីឡាការិនីមកពីអ៊ុយក្រែនដែរ។
Justen បង្ហើបប្រាប់ថា៖ «យើងចាត់ទុក Iryna ជាគូប្រយុទ្ធមែនទែនមិនធម្មតាទេ ដោយសារយើងដឹងថានាងមានបទពិសោធន៍ច្រើនដែរ ហើយជោគជ័យខ្លាំងក្នុងការប្រកួតនីមួយៗ មើលទៅនាងមានសមត្ថភាពខ្លាំងណាស់»។
«ទោះបីខ្ញុំធ្លាប់ប៉ាន់ថា អាចផ្តួលនាងមុនចប់ទឹកមែន ប៉ុន្តែមិនមែនចង់មើលស្រាល Iryna នោះទេ ខ្ញុំគ្រាន់តែដឹងថាត្រូវធ្វើយ៉ាងណាត្រៀមលក្ខណៈខ្លាំងជាងមុនប៉ុណ្ណោះ»។
«ខ្ញុំមិនជាភ្ញាក់ផ្អើលប៉ុន្មានទេ ពេលឃើញ សុវណ្ណារី ធ្វើបានល្អដូចនេះ តែខ្ញុំត្រេកអរហើយរំភើបពេលឃើញនាងបង្ហាញសមត្ថភាពពិតៗដូចអ្វីដែលខ្ញុំស្រមៃបេះបិត ដូចនេះវាពិតជាល្អរកពាក្យនិយាយមិនចេញមែន»។
ពីរនាក់គ្រូ និងសិស្សបានត្រលប់ទៅដល់ទីក្រុង ឡូសអេនជែលេស សហរដ្ឋអាមេរិកវិញ ហើយបានពណ៌នាពីបទពិសោធន៍ប្រកួតលើកទី១ជាមួយ ONE Championship ក៏ដូចជាបានឃើញពីការគាំទ្រខ្លាំងពីសំណាក់អ្នកគាំទ្រកម្ពុជា ដូច្នេះសុវណ្ណារី សារភាពថា៖
«ខ្ញុំពិតជារីករាយក្រៃលែងនូវអ្វីដែលគ្រប់គ្នាធ្វើដើម្បីស្វាគមន៍ខ្ញុំទីនេះ។ ខ្ញុំមិនរំពឹងថាបានបែបនេះទេ ក្នុងការបង្ហាញខ្លួនដំបូងរបស់ខ្ញុំនៅម៉ាឡេស៊ីនេះ។ ខ្ញុំគ្រាន់តែគិតថា ខ្ញុំមកទីនេះដើម្បីតែប្រកួតប៉ុណ្ណោះ ប៉ុន្តែមិនស្មានថាមានអ្នកគ្រាំច្រើនពីកម្ពុជាដូច្នេះឡើយ។ ខ្ញុំពិតជាអរគុណក្រៃលែង ចំពោះការស្រលាញ់ និងការគាំទ្ររបស់បងប្អូនទាំងអស់គ្នា»។
«ខ្ញុំខ្លួនឯងរំភើបខ្លាំង តែពេលបានលឺគ្រប់គ្នារំភើបខ្លាំងដែរ វាជារឿងមួយពិសេសណាស់សម្រាប់ខ្ញុំ ដូចនេះ ខ្ញុំសូមអរគុណច្រើន»។
ជ័យជម្នះបញ្ចប់ឆ្នាំ២០១៨ របស់ ឯម សុវណ្ណារី នឹងបើកឱកាសធំៗផ្សេងទៀតសម្រាប់នាងនៅឆ្នាំ ២០១៩។ យើងរង់ចាំមើលថាតើឆ្នាំក្រោយនាងមានអ្វីថ្មីបង្ហាញទស្សនិកជនថែមទៀត៕
អត្ថបទ៖ Matias Andres
© រក្សាសិទ្ធិដោយ thmeythmey.com
