កីឡាអន្តរជាតិ
អន្តរជាតិ
Keisuke Honda ឈ្នះពានកីឡាករឆ្នើមប្រចាំខែ នៅលីគកំពូលអូស្ត្រាលី
× Keisuke Honda បានទទួលពានរង្វាន់កីឡាករឆ្នើមប្រចាំខែតុលា និងវិច្ឆិកា (PFA Player of the Month Award) បន្ទាប់ពីបង្ហាញទម្រង់លេងយ៉ាងល្អឲ្យក្រុម Melbourne Victory នៃក្របខណ្ឌ A-League របស់អូស្ត្រាលី។
ខ្សែបម្រើវ័យ ៣២ ឆ្នាំ ដែលទទួលការងារជាអ្នកចាត់ការទូទៅក្រុមកីឡាបាល់ទាត់ជម្រើសជាតិកម្ពុជាដែរនោះ បានដើរតួយ៉ាងសំខាន់ក្នុងការជួយក្រុម Melbourne ឈ្នះបីប្រកួតជាប់គ្នា ឈរនៅចំណាត់ថ្នាក់ទី២បណ្តោះអាសន្នក្នុងតារាង A-League រដូវកាលនេះ ក្រោយស៊ុតបាល់បញ្ចូលទី៤គ្រាប់ និងបញ្ជូនបាល់ឲ្យដៃគូសម្រេចទី៣ដង ក្នុងការប្រកួតទាំង៧លើក។ ទាំង៧ប្រកួត Melbourne ឈ្នះ៥ ចាញ់២លើក មាន១៥ ពិន្ទុ តាមពីក្រោយក្រុមកំពូលតារាង Perth Glory ចំនួន ២ពិន្ទុ។
អតីតសមាជិកក្រុមជម្រើសជាតិជប៉ុន AC Milan រូបនេះ បានទទួលសំឡេងឆ្នោតលើសកីឡាករ Chris Ikonomidis របស់ក្រុម Perth Glory និង Craig Goodwin របស់ Adelaide United ដើម្បីឈ្នះពានកិត្តិយសនេះ។
Honda បានផ្លាស់ពីក្លិប Pachuca នៃលីគបាល់ទាត់ម៉ិកស៊ិកទៅចូលរួមជាមួយ Melbourne Victory នៅរដូវកាលនេះ ដោយចុះកិច្ចសន្យារយៈពេលមួយឆ្នាំ។ ក្រៅពីមានអាជីពជាកីឡាករ រូបគេក៏ត្រូវទទួលបន្ទុកមើលការខុសត្រូវលើក្រុមរហស្សនាមគៅព្រៃកម្ពុជាផងដែរ៕
Tag:
បាល់ទាត់
Keisuke Honda
© រក្សាសិទ្ធិដោយ thmeythmey.com