អន្តរជាតិ
អេហ្ស៊ីបរឹតបន្តឹងការលក់«អាវក្រៅពណ៌លឿង» ដោយបារម្ភបាតុកម្មនៅបារាំងឆ្លងដល់អេហ្ស៊ីប មុនខួបបដិវត្តន៍ផ្កាម្លិះ
ចលនាបាតុកម្មអាវក្រៅពណ៌លឿងនៅបារាំង
×![]()
ដោយ: ថ្មីៗ
រដ្ឋាភិបាលអេហ្ស៊ីបបានសម្រេចចេញបទបញ្ជាឲ្យមានការរឹតត្បិតការលក់ដូរ«អាវក្រៅពណ៌លឿង»នៅតាមទីផ្សារនៅសប្តាហ៍នេះ ត្រឹមមួយខែប៉ុណ្ណោះ មុនខួបនៃចលនាបដិវត្តន៍អារ៉ាប់ទម្លាក់មេដឹកនាំផ្តាច់ការឆ្នាំ ២០១១ ចូលមកដល់។ អាជ្ញាធរអេហ្ស៊ីបបារម្ភថា ពលរដ្ឋអេហ្ស៊ីបអាចចម្លងយកចលនាបាតុកម្មអាវក្រៅពណ៌លឿងដែលកំពុងញាំញីប្រទេសបារាំង ដើម្បីបង្កចលនាអសនិ្តសុខតាមការបាតុកម្មតវ៉ាជាថ្មីទៀត។
ចលនាបាតុកម្មអាវក្រៅពណ៌លឿងដែលប្រឆាំងគោលនយោបាយរដ្ឋាភិបាលបារាំងបានជិះឥទ្ធិពលឲ្យមានចលនាបាតុកម្មស្រដៀងគ្នាកើតឡើងនៅបណ្តាប្រទេសឯទៀតនៅអឺរ៉ុបដែរ។ ហូឡង់ និងបែលហ្ស៊ិកសុទ្ធតែបានជួបប្រឈមនឹងចលនាបាតុកម្មស្រដៀងគ្នានេះរួចហើយ។
ឃើញស្ថានការណ៍មិនស្រួល រដ្ឋាភិបាលអេហ្ស៊ីបបានសម្រេចចេញវិធានការថ្មីដោយស្នើឲ្យហាងលក់សម្ភារៈការពារសុវត្ថិភាពកម្រិតការលក់អាវសុវត្ថិភាព ឬអាវក្រៅពណ៌លឿងទៅកាន់ក្រុមហ៊ុន។ មានតែក្រុមហ៊ុនប៉ុណ្ណោះដែលអាចទិញអាវក្នុងចំនួនច្រើនទៅលក់បន្តបាន ហើយការលក់នោះក៏ត្រូវទទួលបានការអនុញ្ញាតពីអាជ្ញាធរមានសមត្ថកិច្ចជាមុនសិនដែរ។
ទីភ្នាក់ងារព័ត៌មាន AFP ផ្សាយថា វាមិនមែនជាការរឹតបន្តឹងផ្លូវការឡើយ ប៉ុន្តែក្រុមហ៊ុនទាំងអស់ដែលលក់ដុំសម្ភារសុវត្ថិភាពទទួលបានការណែនាំពីសមត្ថកិច្ចរួចរាល់ហើយ។
អ្នកលក់សម្ភារដែលមិនបានបង្ហាញអត្តសញ្ញាណបានអះអាងដូច្នេះ៖«យើងទទួលបានការណែនាំពីប៉ូលិសកាលពីសប្តាហ៍មុន ដោយយើងអាចលក់អាវក្រៅពណ៌លឿងទៅឲ្យតែក្រុមហ៊ុនប៉ុណ្ណោះ មិនមែនបុគ្គលម្នាក់ៗទេ»។
ការសម្រេចដាក់បទបញ្ជារបស់រដ្ឋាភិបាលអេហ្ស៊ីបមិនមែនជារឿងគួរឲ្យភ្ញាក់ផ្អើលទេ។ វាកើតឡើងប្រហែលត្រឹមជាងមួយខែប៉ុណ្ណោះ មុនខួបលើកទីប្រាំបីនៃបដិវត្តន៍ផ្កាម្លិះចូលមកដល់។ បដិវត្តន៍ដែលចាប់ផ្តើមឡើងនៅថ្ងៃ ២៥ ខែមករានោះបាននាំឲ្យមានការទម្លាក់មេដឹកនាំផ្តាច់ការ Hosni Mubarak ផងដែរ។
ដោយឡែក ដើមសប្តាហ៍នេះដែរ អ្នកច្បាប់សិទ្ធិមនុស្សម្នាក់ Mohamed Ramadan ត្រូវបានចាប់ខ្លួន និងឃុំខ្លួននៅទីក្រុង Alexandria បន្ទាប់ពីលោកត្រូវចោទប្រកាន់ការចែកចាយ និងលាក់ទុកខិត្តប័ណ្ណ និងអាវក្រៅពណ៌លឿងផងដែរ។
តាមពិតទៅ អេហ្ស៊ីបនៅបន្តអនុវត្តច្បាប់រឹតបន្តឹងការបាតុកម្មនៅក្នុងឆ្នាំ ២០១៣ ដែលត្រូវបានអនុម័តចាប់ពីក្រុមយោធាទម្លាក់មេដឹកនាំដែលជាប់ឆ្នោតតាមការបោះឆ្នោតប្រជាធិបតេយ្យលើកដំបូងគេ Mohamed Morsi។ អតីតឧត្តមសេនីយ៍ដែលក្លាយខ្លួនជាប្រធានាធិបតីក្រោយរដ្ឋប្រហារលោក Abdel Fattah al-Sisi តែងតែងទិតៀនចលនាបះបោរបដិវត្តន៍និទាឃរដូវអារ៉ាប់ និងលើកយកវិបត្តិរ៉ាំរ៉ៃ និងសង្គ្រាមស៊ីវិលនៅស៊ីរី លីប៊ី និងយេម៉ែនជាសម្អាងពីលទ្ធផលនៃចលនាបដិវត្តន៍។
Tag:
អេហ្ស៊ីប
បដិវត្តន៍អារ៉ាប់
បារាំង
© រក្សាសិទ្ធិដោយ thmeythmey.com
