អន្តរជាតិ
ទោះមិនរបូតតំណែង នាយករដ្ឋមន្ត្រី ម៉េយ៍ នៅតែបាត់បង់ការគាំទ្រពីផ្ទៃក្នុងបក្ស
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីអង់គ្លេស ថេរ៉េសា ម៉េយ៍ នៅថ្ងៃទី១២ ខែធ្នូ បានរួចផុតពីការបោះឆ្នោតមិនទុកចិត្តពីសំណាក់សមាជិកបក្សអភិរក្សដែលកំពុងកាន់អំណាច។ ទោះជាអាចបន្តតំណែងនាយករដ្ឋមន្ត្រីមែន តែលោកស្រី ម៉េយ៍ បាត់បង់ការគាំទ្រច្រើនពីសមាជិកសភាមកពីបក្សលោកស្រី ហើយដែលនឹងប៉ះពាល់ដល់ដំណើរការចាកចេញពីសហភាពអឺរ៉ុបមិនខាន។ យ៉ាងណាមិញ លោកស្រីនៅតែសប្បាយចិត្តចំពោះលទ្ធផលនេះ។
ក្នុងបោះឆ្នោតនៅឯសភា លោកស្រី ថេរ៉េសា ទទួលសំឡេងគាំទ្រចំនួន២០០ និងសំឡេងប្រឆាំង១១៧ ពីសមាជិកសភារបស់បក្សអភិរក្ស។ នេះមានន័យថា លោកស្រីនៅតែជានាយករដ្ឋមន្ត្រីចក្រភពអង់គ្លេសដដែល។ បើតាមធម្មនុញ្ញបក្សអភិរក្ស នឹងមិនមានការបោះឆ្នោតជាថ្មីឡើងដើម្បីតំណែងរបស់លោកស្រីក្នុងរយៈពេល១២ខែទៀត ដែលនេះនឹងផ្ដល់ឲ្យឱកាសដល់លោកស្រីក្នុងការបន្តដឹកនាំអង់គ្លេសរហូតដល់ពេលចាកចេញពីសហភាពអឺរ៉ុប។
ក្រោយការបោះឆ្នោតនៅ Westminster លោកស្រី ម៉េយ៍ ក៏បានចេញមុខធ្វើសេចក្ដីថ្លែងការណ៍ពីនិវេសនដ្ឋាន 10 Downing Street ដោយបានអរគុណសមាជិកសភាដែលបោះឆ្នោតគាំទ្រលោកស្រី។ នាយករដ្ឋមន្ត្រីរូបនេះក៏ឆ្លៀតទទួលស្គាល់ពីមតិប្រឆាំងមួយចំនួន ដែលលោកស្រីនឹងស្ដាប់រាល់កង្វល់របស់ពួកគេ ហើយចង់ឃើញអ្នកនយោបាយទាំងអស់រួមគ្នា។ ឯកិច្ចការបន្ទាប់វិញ លោកស្រីនឹងបន្តដឹកនាំអង់គ្លេសដើម្បីចាកចេញពីអឺរ៉ុប។
យ៉ាងណាក្ដី លោកស្រីនឹងត្រូវប្រឈមមុខបញ្ហាលំបាកក្នុងអនុម័តកិច្ចព្រមព្រៀងលែងលះជាមួយអឺរ៉ុបក្នុងសភា ព្រោះលទ្ធផលបោះឆ្នោតថ្ងៃទី១២ ខែធ្នូ បង្ហាញថា សមាជិកសភាបក្សកាន់អំណាចជាច្រើនប្រឆាំងលោកស្រីស្រេចទៅហើយ។ នេះមិនទាន់គិតដល់សមាជិកសភាបក្សប្រឆាំង និងបក្សតូចៗមួយចំនួនទៀតដែលមិនពេញចិត្តនឹងកិច្ចព្រមព្រៀងនេះផង។ ក្រុមប្រឆាំងអះអាងថា អង់គ្លេសនឹងបន្តជាប់ជំពាក់ជាមួយអឺរ៉ុបរាប់ឆ្នាំទៅមុខទៀត ទោះចាកចេញនៅថ្ងៃទី២៩ ខែមីនា ឆ្នាំ២០១៩ ក៏ដោយ។
តាមពិតទៅ ការបោះឆ្នោតសម្ដែងការមិនទុកចិត្តខាងលើនេះ ធ្វើឡើងបន្ទាប់ពីលោកស្រី ម៉េយ៍ សម្រេចចិត្តលើកពេលបោះឆ្នោតលើកិច្ចព្រមព្រៀងលែងលះជាមួយសហភាពអឺរ៉ុប ដ្បិតដឹងថា មិនអាចឆ្លងផុតសភាឡើយ។ លោកស្រី បានទៅហូឡង់ និងអាល្លឺម៉ង់ដើម្បីស្វែងរកការធានាពីមេដឹកនាំអឺរ៉ុបជុំវិញចំណុចដែលសមាជិកសភាជំទាស់។ យ៉ាងណាមិញ លោកស្រីសន្យាថា ការបោះឆ្នោតនឹងធ្វើមិនឲ្យហួសថ្ងៃទី២១ ខែមករា ឆ្នាំ២០១៩ ឡើយ។
នៅថ្ងៃទី១៣ ខែធ្នូ លោកស្រីនាយករដ្ឋមន្ត្រីនឹងធ្វើដំណើរទៅកាន់ទីក្រុងព្រុចសែលដើម្បីជជែកជាមួយមេដឹកនាំអឺរ៉ុបលើកិច្ចព្រមព្រៀងនេះ។ គេរំពឹងថា លោកស្រីនឹងស្នើអឺរ៉ុបឲ្យឲ្យធ្វើសម្បទានខ្លះឲ្យអឺរ៉ុបដើម្បីលោកស្រីអាចយកទៅបញ្ចុះបញ្ចូលសមាជិកសភាអង់គ្លេសឲ្យគាំទ្រ។ ឯអឺរ៉ុបវិញ ទោះជាដឹងថា លោកស្រី ម៉េយ៍ ជួបបញ្ហាលំបាកក្នុងស្រុកក្ដី ក៏មិនជួយអ្វីច្រើនដែរ ដោយប្រធានក្រុមប្រឹក្សាអឺរ៉ុប ដូណាល់ ទូស ប្រកាសហើយថា គ្មានការចរចាម្ដងទៀតឡើយ៕
Tag:
Brexit
អឺរ៉ុប
Theresa May
© រក្សាសិទ្ធិដោយ thmeythmey.com
