អន្តរជាតិ
បុរសក្រីក្រម្នាក់ចូលពេទ្យ ឆ្កែ៤ក្បាលរង់ចាំម្ចាស់យ៉ាងអន្ទះសានៅមុខបន្ទប់ រូបថត៖ ហ្វេសប៊ុក Cris Mamprim
× អ្នកគ្រូពេទ្យប្រេស៊ីលម្នាក់ បានចែករំលែករឿងដ៏រំជួលចិត្តមួយនៅលើបណ្តាញសង្គម។ បុរសម្នាក់ឈ្មោះ Cesar ដែលជាជនគ្មានផ្ទះសំបែង បានទៅមន្ទីរពេទ្យនាម៉ោង៣ទៀបភ្លឺនាថ្ងៃទី៩ ខែធ្នូ ដើម្បីពិនិត្យជំងឺរបស់ខ្លួន។ គាត់គ្មានសាច់ញាតិណាម្នាក់ឡើយ ប៉ុន្តែនៅមុខបន្ទប់ពិនិត្យ គេឃើញឆ្កែ៤ក្បាលនៅរង់ចាំយ៉ាងអន្ទះសារ។
អ្នកគ្រូពេទ្យ Cris Mamprim និងមិត្តភក្តិមួយចំនួន ត្រូវចំវេនធ្វើការយប់នៅមន្ទីរពេទ្យ Hospital Regional Alto Vale នៅក្រុង Rio do Sul ប្រទេសប្រេស៊ីល។ លោក Cesar បានទៅកាន់ទីនោះ ដើម្បីពិនិត្យស្ថានភាពជំងឺដែលធ្វើទុក្ខក្នុងខ្លួនគាត់។
បុរសគ្មានផ្ទះសំបែងម្នាក់នេះ មិនមានទ្រព្យសម្បត្តិច្រើន ឬញាតិមិត្តនោះឡើយ ប៉ុន្តែអ្នកគ្រូពេទ្យ Mamprim រំភើបយ៉ាងខ្លាំង ដោយបានឃើញមិត្តភក្តិរបស់គាត់នៅចាំនៅមុខបន្ទប់។ អ្នកទាំងនោះ គឺជាសុនខជាទីស្រឡាញ់របស់លោក Cesar ទាំង៤ក្បាល។
យោងតាមការផ្សាយរបស់សារព័ត៌មាន The Dodo សត្វឆ្កែទាំងនោះ រង់ចាំម្ចាស់ពួកវានៅមុខបន្ទប់ពិនិត្យជំងឺយ៉ាងមានសណ្តាប់។ ពួកវាជាសុនខដែលមានការចិញ្ចឹមបីបាច់យ៉ាងល្អ ពោលគឺមានលក្ខណៈល្អប្រសើរជាងសត្វចិញ្ចឹមមួយចំនួន។
លោក Cesar បានអះអាងថា ពេលខ្លះលោកសុខចិត្តអត់ហូបអាហារខ្លួនឯង ដើម្បីបានចំណីសម្រាប់ឆ្កែដែលជាមិត្តសំឡាញ់របស់ខ្លួន។ អ្នកគ្រូពេទ្យ Mamprim បានសរសេរនៅលើហ្វេសប៊ុករបស់ខ្លួន ដោយកោតសរសើរលោក Cesar ថា ជាមនុស្សដ៏សាមញ្ញម្នាក់ គ្មានទ្រព្យសម្បត្តិ ហើយរស់នៅក្នុងភាពអត់ឃ្លាត រងា កណ្តោចកណ្តែង ប៉ុន្តែនៅក្បែរខ្លួនគាត់ បែរជាមានមិត្តភក្តិដ៏ល្អ និងស្មោះត្រង់បំផុត។
Mamprim បានសរសេរបន្ថែមថា៖ «មើលឃើញទិដ្ឋភាពដែលសុនខទាំងនោះរង់ចាំនៅមាត់ទ្វារយ៉ាងដូច្នេះ បង្ហាញថា ពួកគេពោរពេញទៅដោយការយកចិត្តទុកដាក់ និងក្តីស្រឡាញ់ដ៏ធំធេង»។ សុនខទាំងនោះ បន្តរង់ចាំរហូតដល់ម្ចាស់ខ្លួនចេញ ប៉ុន្តែក្រោយមកបុគ្គលិកមន្ទីរពេទ្យបាននាំចូលក្នុងដើម្បីឲ្យពួកវាស៊ីចំណី៕
© រក្សាសិទ្ធិដោយ thmeythmey.com