រដ្ឋាភិបាលបារាំងបានទទូចឲ្យក្រុមបាតុករអាវក្រៅពណ៌លឿងចៀសវាងការចាប់ផ្តើមប្រមូលផ្តុំគ្នាតវ៉ាជាថ្មីទៀតនៅសប្តាហ៍នេះ ដោយសារបារម្ភពីបញ្ហាសុវត្ថិភាពនិងសន្តិសុខសាធារណៈផង។ បច្ចុប្បន្នសន្តិសុខបារាំងស្ថិតក្រោមការរឹតបន្តឹងខ្លាំង បន្ទាប់ពីមានការវាយប្រហារភេរវកម្មមួយកើតឡើងនៅផ្សារគ្រឹស្មាសនាក្រុងស្ត្រាស្បួរ (Strasbourg)។
ដ្បិតមិនពេញនឹងចំណាត់ការនិងសម្បទានដែលផ្តល់ឲ្យដោយប្រធានាធិបតីបារាំង ក្រុមបាតុករ«អាវក្រៅពណ៌លឿង» ឬ Yellow Vest បានប្រកាសរួចទៅហើយថា ខ្លួននឹងរៀបចំបាតុកម្មជាថ្មីទៀតនៅចុងសប្តាហ៍នេះ។ ប៉ុន្តែអាជ្ញាធរបារាំងកំពុងស្វះស្វែងរកវិធីសាស្ត្រជំរុញឲ្យបាតុកចៀសវាងរៀបចំបាតុកម្មនៅសប្តាហ៍នេះដែរ។
បើតាមទីភ្នាក់ងារព័ត៌មាន AFP រដ្ឋាភិបាលក្រុងប៉ារីសនៅថ្ងៃព្រហស្បតិ៍ទី ១៣ ខែធ្នូនេះបានទទូចឲ្យក្រុមបាតុករពិចារណា និងចៀសវាងឲ្យបាននូវការប្រមូលផ្តុំគ្នាតវ៉ាជាថ្មីទៀត ស្របពេលដែលមានការវាយប្រហារភេរវកម្មកើតឡើងថ្មីៗនេះផង។
អ្នកនាំពាក្យរដ្ឋាភិបាលបារាំង Banjamin Griveaux ថ្លែងដូច្នេះថា រដ្ឋាភិបាលមិនបានដាក់បម្រាមលើការបាតុកម្មដែលមានក្រុមបាតុករគ្រោងធ្វើនៅថ្ងៃសៅរ៍ឡើយ។ ប៉ុន្តែអ្នកនាំពាក្យរូបនេះចង់ឲ្យបាតុករមានការពិចារណាឲ្យបានសមរម្យព្រោះរដ្ឋាភិបាលបានធ្វើសម្បទានខ្លះរួចទៅហើយ។
«សម្រាប់ពេលឥឡូវនេះ យើងមិនបានហាមឃាត់ការតវ៉ាណាមួយឡើយ។ ប៉ុន្តែវាល្អបើសិនជាគ្រប់គ្នាអាចរក្សាការអត់ធ្មត់នៅថ្ងៃសៅរ៍ មុនពេលការរៀបចំពិធីជួបជុំគ្នាចុងឆ្នាំ ជាជាងរៀបចំការជួបជុំបាតុកម្មតវ៉ា និងធ្វើបង្ខំឲ្យកងកម្លាំងសន្តិសុខត្រូវបំពេញកាតព្វកិច្ចជាថ្មី»។ លោក Griveaux និយាយដូច្នេះ។
តាមពិតទៅ ការអំពាវនាវរបស់រដ្ឋាភិបាលនេះក៏ធ្វើឡើងស្របពេលដែលសន្តិសុខ និងសណ្តាប់សាធារណៈនៅបារាំងរងការគំរាមកំហែងខ្លាំងដែរ។ បញ្ហាសន្តិសុខនោះ គឺសំដៅលើការវាយប្រហារនៅផ្សារគ្រឹស្មាសនាទីក្រុង ស្តាស្បួរ ដោយខ្មាន់កាំភ្លើងដែលបណ្តាលឲ្យមនុស្សបួននាក់ស្លាប់និង ច្រើននាក់ផ្សេងទៀតរងរបួសផង។ ប៉ូលិសបានវាយតម្លៃបឋមថា វាជាករណីភេរវកម្ម។
ត្រឡប់មកវិញ ចលនាបាតុកម្មអាវក្រៅពណ៌លឿងនេះបានចាប់ផ្តើមឡើងដំបូងនៅថ្ងៃ ១៧ ខែវិច្ឆិកា ដើម្បីឆ្លើយតបនឹងផែនការដំឡើងពន្ធប្រេងរបស់រដ្ឋាភិបាលបារាំង។ ចលនានេះប្រមែរប្រមូលបានអ្នកគាំទ្រច្រើន ហើយបន្តរីកសាយភាយគួរឲ្យបារម្ភ។ ចលនាបាតុកម្មនេះបានបន្តធ្វើឡើងជាបន្តបន្ទាប់ ហើយចុងសប្តាហ៍មុនជាពេលចុងក្រោយបង្អស់ដែលបាតុករចេញតវ៉ា រហូតមានការប៉ះទង្គិចគ្នា និងមានការខូចខាតទ្រព្យសម្បត្តិឯកជននិងសាធារណៈច្រើនសន្ធឹកដែរ។ ប៉ូលិស ប្រាំបីម៉ឺននាក់ត្រូវបានពង្រាយនៅទូទាំងទីក្រុងប៉ារីសចុងសប្តាហ៍មុន ប៉ុន្តែក្រុមបាតុករនៅតែអាចវាយកម្ទេចទ្វារ កញ្ចក់ហាង ចូលលួចឥវ៉ាន់ និងដុតកម្ទេចរថយន្តជាច្រើនគ្រឿងតាមដងផ្លូវដែរ។
ឃើញស្ថានការណ៍មិនសូវស្រួល រដ្ឋាភិបាលបារាំងបានសម្រេចព្យួរគម្រោងដំឡើងពន្ធប្រេង ហើយដល់ថ្ងៃចន្ទដើមសប្តាហ៍នេះទៀត ប្រធានាបធិបតីបារាំងលោក អេម៉ានុយអែល ម៉ាក្រុង បានចេញអន្តរាគមន៍ ដោយសាក់ចេញវិធានការមួយចំនួនដើម្បីឆ្លើយតបនឹងការទាមទាររបស់បាតុករដែរ។
ចំណុចសម្បទានទីមួយរបស់រដ្ឋាភិបាលគឺ បារាំងសម្រេចដំឡើងប្រាប់ឈ្នួលអប្បបរមាក្នុងទំហំ ៧ ភាគរយ ឬ ១០០ អឺរ៉ូក្នុងមួយខែពីឆ្នាំ ២០១៩ នេះតទៅ។ ត្រឹមឆ្នាំ ២០១៨ ប្រាក់ឈ្នួលអប្បបរមារបស់ប្រជាជនបារាំងគឺ ១៤៩៨ អឺរ៉ូមុនពេលបង់ពន្ធ ហើយក្រោយបង់ពន្ធឈ្នួលនៅសល់ប្រហែល ១១៨៥អឺរ៉ូ។ ចំណុចទីពីរ គឺបារាំងលុបចោលគម្រោងដាក់ពន្ធលើអ្នកដែលបានប្រាក់សោធនិវត្តន៍តិចជាង ២០០០ អឺរ៉ូ និង លុបចោលពន្ធលើប្រាក់ថែមម៉ោងផង។ ចំណុចទីបី គឺរដ្ឋាភិបាលបារាំងក៏ជំរុញលើកទឹកចិត្តឲ្យនិយោជកផ្តល់ប្រាក់រង្វាន់លើកទឹកចិត្តដោយនិយោជិកនៅចុងឆ្នាំដោយគ្មានបង់ពន្ធដែរ។
យ៉ាងណាក៏ដោយចុះ សម្បទានទាំងអម្បាម៉ានរបស់រដ្ឋាភិបាលក្រុងប៉ារីសមិនធ្វើឲ្យបាតុករស្ងប់ចិត្តឈប់តវ៉ាឡើយ។ ពួកគេអះអាងថា សម្បទានរបស់រដ្ឋាភិបាលតិចជាងការចង់បាន ហើយវាក៏ហាក់យឺតយ៉ាវបន្តិចដែរ។ ដូច្នេះហើយ បើសិនជាគ្មានការចរចាណាមួយជាថ្មីទៀតទេជាមួយរដ្ឋាភិបាលនោះ វាគ្មានឡើយការរំសាយចលនាបាតុកម្មនៅពេលនេះ៕