ការវិនិយោគផ្ទាល់ពីបរទេសនៅក្នុងប្រទេសចិន (FDI) បានធ្លាក់ចុះយ៉ាងគំហុកក្នុងខែវិច្ឆិកា ស្របពេលដែលកង្វល់ជុំវិញសមភូមិពាណិជ្ជកម្មរវាងចិន និងសហរដ្ឋមេរិកប៉ះពាល់ដល់ទំនុកចិត្តរបស់វិនិយោគិនបរទេស។ ការធ្លាក់ចុះនេះដែរក៏បានកើតឡើង នៅមុនពេលការផ្អាកជម្លោះពាណិជ្ជកម្មរវាងក្រុងវ៉ាស៊ីនតោន និងក្រុងប៉េកាំងទៅទៀត។
យោងតាមទិន្នន័យរបស់ក្រសួងពាណិជ្ជកម្មចិន នៅថ្ងៃទីព្រហស្បតិ៍ ទី១៣ ខែធ្នូ ការវិនិយោគផ្ទាល់ពីបរទេសក្នុងប្រទេសចិន ក្នុងខែវិច្ឆិកា មានទំហំទឹកប្រាក់ស្មើនឹង ១៣,៦ពាន់លានដុល្លារ។ ចំនួននេះ បានធ្លាក់ចុះដល់ទៅ ២៧,៦ ភាគរយឯណោះ បើធៀបទៅនឹងពេលវេលាដូចគ្នា កាលឆ្នាំ២០១៧។
អ្វីដែលគួរឲ្យចាប់អារម្មណ៍នោះ ការធ្លាក់ចុះយ៉ាងលឿននេះបានកើតឡើង នៅមុនប្រធានាធិបតីចិន ស៊ី ចិនភីង និងសមភាគីអាមេរិក ដូណាល់ ត្រាំ បានយល់ព្រមបង្កើតបទឈប់បាញ់ក្នុងសង្គ្រាមពាណិជ្ជកម្មចំនួន ៩០ថ្ងៃ អំឡុងជំនួបក្រៅកិច្ចប្រជុំកំពូល G-20 នារដ្ឋធានី Buenos Aires អាហ្សង់ទីន កាលពីថ្ងៃទី០១ ខែធ្នូ ថ្មីៗនេះ។
ទាក់ទិននឹងទិន្នន័យចុងក្រោយនេះ អ្នកនាំពាក្យក្រសួងពាណិជ្ជកម្មចិន Gao Feng បានថ្លែងបញ្ជាក់ថា៖ «មូលហេតុនៃការធ្លាក់ចុះយ៉ាងគំហុកនៅក្នុងខែវិច្ឆិកានេះគឺមកពី ការប្រៀបធៀបរវាងរយៈពេលដូចគ្នាកាលពីឆ្នាំមុន មានកម្រិតខ្ពស់ពេក»។
យ៉ាងណាមិញ អ្នកជំនាញសេដ្ឋកិច្ច បានលើកឡើងថា ការថយចុះនៃការវិនិយោគផ្ទាល់ពីបរទេសក្នុងចិនគឺមិនអាចជៀសផុតនោះឡើយ ដ្បិតថា ឥទ្ធិពលមកពីភាពតានតឹងពាណិជ្ជកម្មរវាងក្រុងប៉េកាំង និងក្រុងវ៉ាស៊ីនតោន ប៉ះពាល់ដល់ទំនុកចិត្តធ្វើជំនួញរបស់ពួកវិនិយោគិនបរទេស។
បើតាមសារព័ត៌មានហុងកុង South China Morning Post លោក Shen Jianguang ប្រធានផ្នែកហិរញ្ញវត្ថុនៃក្រុមហ៊ុនហិរញ្ញវត្ថុ JD ក្នុងទីក្រុងប៉េកាំង បានគូសបញ្ជាក់ថា រូបភាពដែលពិភពលោកបានឃើញពាក់ព័ន្ធនឹងការដំឡើងពន្ធទៅវិញទៅមក រវាងមហាអំណាចសេដ្ឋកិច្ចទីមួយ និងទីពីរ គឺជាមូលហេតុចម្បងធ្វើឲ្យ បណ្តាក្រុមហ៊ុនបរទេសភ័យខ្លាចក្នុងការដាក់វិនិយោគទុន ក្នុងចិននាពេលបច្ចុប្បន្ននេះ។
សង្គ្រាមពាណិជ្ជកម្មមិនត្រឹមតែប៉ះពាល់ដល់ការវិនិយោគបរទេសប៉ុណ្ណោះទេ ប៉ុន្តែក៏កំពុងបង្ខំក្រុមហ៊ុនមួយចំនួនក្នុងសង្វាក់ផ្គត់ផ្គង់ឧស្សាហកម្ម ផ្លាស់ប្តូររោងចក្ររបស់ខ្លួនចេញពីចិនថែមទៀតផង។ ហើយការផ្លាស់ប្តូរទីតាំងរបស់ក្រុមហ៊ុនបរទេសពីចិនបែបនេះ នឹងបង្កើតផលប៉ះពាល់កាន់តែខ្លាំងថែមទៀតទៅលើសេដ្ឋកិច្ចទំហំ១២ ទ្រីលានដុល្លាររបស់ចិន។ នេះជាការអះអាងរបស់លោក Shen Jianguang។ អ្នកជំនាញរូបនេះ បានពន្យល់ទៀតថា៖ «នេះជាហេតុផលដែលចិនកំពុងប្រឹងប្រែងយ៉ាងខ្លាំង ដើម្បីឈានដល់ការបង្កើតកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក»។
គួរឲ្យដឹងដែរថា ការវិនិយោគផ្ទាល់ពីបរទេសក្នុងប្រទេសចិន ក្នុងរយៈពេល១១ខែ ឆ្នាំ២០១៨នេះ បានធ្លាក់ចុះ ១,២ភាគរយ បើធៀបទៅនឹងឆ្នាំមុន ដែលស្មើនឹងទំហំទឹកប្រាក់ប្រមាណ ១១៥,៣ពាន់លានដុល្លារ៕