ONE Championship បន្តពង្រីកខ្លួនកាន់តែធំជាងមុន ដោយពួកគេទើបចុះកិច្ចសន្យាចំនួន ៣ឆ្នាំ ជាមួយក្រុមហ៊ុនផ្សព្វផ្សាយកីឡាដ៏ធំដែលមានមូលដ្ឋាននៅសហរដ្ឋអាមេរិក ឈ្មោះ Turner Sports។
ការសហការគ្នារវាងស្ថាប័នក្បាច់គុនធំជាងគេនៅអាស៊ី ជាមួយប៉ុស្តិ៍កីឡា Turner Sports គោលដៅចាក់បញ្ចាំងឲ្យទស្សនិកជននៅតំបន់អាមេរិកខាងជើងបានរីករាយទស្សនាការផ្សាយផ្ទាល់ព្រឹត្តិការណ៍ប្រដាល់ពិសេសៗរបស់ជើងខ្លាំងដូចជា Demetrious Johnson និងកីឡាការិនី Angela Lee ព្រមទាំងការប្រកួតរបស់ ចាន់ រតនា ជាដើម។ ទស្សនិកជនទាំងអស់អាចចូលមើលក្នុងការផ្សាយផ្ទាល់តាមរយៈបណ្តាញគេហទំព័រមួយរបស់ Turner ហៅថា B/R Live។
បន្ថែមពីលើនេះដែរ ប៉ុស្តិ៍ TNT ក៏នឹងចាក់ផ្សាយឡើងវិញនូវព្រឹត្តិការណ៍របស់ ONE លើប៉ុស្តិ៍ទូរទស្សន៍របស់ខ្លួនចំនួនមួយម៉ោងពេញ ហើយយ៉ាងតិចណាស់ក៏ ១២ដងក្នុងមួយឆ្នាំផងដែរ។
លោក Chatri Sityodtong ប្រធានប្រតិបត្តិការ និងជា CEO របស់ ONE Championship បានថ្លែងថា៖
«យើងរំភើបខ្លាំងណាស់ដែលបានចាប់ដៃជាមួយ Turner Sports ដែលជាក្រុមហ៊ុនផ្សព្វផ្សាយពីកីឡាជួរមុខគេ ខាងបង្ហាញមាតិកា និងដាក់ផ្សាយសកម្មភាពក្បាច់គុនបែបស្តង់ដារខ្ពស់ និងមានការផ្ទៀងផ្ទាត់ត្រឹមត្រូវ សម្រាប់ទស្សិកជនទាំងអស់នៅសហរដ្ឋអាមេរិកបានតាមដាន»។
«ONE Championship គឺជាគ្រួសារក្បាច់គុនមួយដែលឲ្យតម្លៃសំខាន់ទៅលើកីឡាកររបស់យើង និងរឿងរ៉ាវរបស់អ្នកប្រយុទ្ធទាំងនោះ ធ្វើយ៉ាងណាឲ្យបានជ្រាបចូលក្នុងបេះដូងមនុស្សជាតិ។ យើងទន្ទឹងរង់ចាំដាក់បញ្ចាំងពីសមត្ថភាពដ៏អស្ចារ្យរបស់កីឡាករយើងទូទាំងពិភពលោក»។
នេះជាសារមួយបង្ហាញថា អ្នកគាំទ្រ និងទស្សនិកជនទាំងឡាយនៅដ្ឋអាមេរិក មានឱកាសបានលឺបានស្គាល់អ្នកប្រដាល់ក្បាច់គុនកម្ពុជាដែលបានសាងកេរ្តិ៍ឈ្មោះនៅ ONE កាន់តែច្រើនកុះករថែមទៀត។
លោក ហ៊ុន ចន្ទរាជ អ្នកដឹកនាំក្លិប Cambodian Top Team និងជាអគ្គលេខាធិការសហព័ន្ធយុទ្ធគុនចម្រុះកម្ពុជា សំលឹងឃើញឱកាសច្រើនសម្រាប់កម្ពុជា ក៏ដូចជាប្រទេសនានាទូទាំងអាស៊ី។
គាត់ពន្យល់ថា៖ «ការព្រមព្រៀងរវាងប៉ុស្តិ៍ទូរទស្សន៍ទាំងនេះ មានន័យថាអាស៊ីយើងអាចបង្ហាញពិភពលោកពីអ្វីជាក្បាច់គុន និងតម្លៃរបស់វាពិតប្រាកដ។ ម្យ៉ាងទៀតប្រទេសនីមួយៗនៅអាស៊ី នឹងមានឱកាសផ្សព្វផ្សាយក្បាច់គុនប្រចាំប្រទេសរៀងៗខ្លួនដែរ»។
«កម្ពុជាអាចផ្សព្វផ្សាយពីក្បាច់គុនខ្មែរទៅឲ្យភាគខាងលិចស្គាល់ រីឯថៃមានក្បាច់គុនមួយថៃ ភូមាមានក្បាច់ Lethwei
ចិនមានក្បាច់ Sanda និងឈ្មោះក្បាច់គុនផ្សេងៗទៀតជាច្រើន»។
ជាមួយវត្តមានខ្លាកំណាចជើងឯកខ្សែក្រវាត់ពិភពលោក Demetrious Johnson រួមជាមួយ Eddie Alvarez ធ្វើឲ្យស្ថាប័ន ONE ជាប់លំដាប់ជាស្ថាប័ននាំមុខគេខាងដឹកនាំការប្រកួតក្បាច់គុនអាស៊ី ហើយកំពុងមានសន្ទុះបោះសំឡេងកាន់តែខ្លាំងទៀតនៅឆ្នាំ ២០១៩។
B/R Live នឹងចាក់ផ្សាយការប្រកួតរបស់អាស៊ីជាលើកដំបូងនៅថ្ងៃសៅរ៍ ទី១៩ ខែមករា ខាងមុខនេះនូវព្រឹត្តិការណ៍
ONE: ETERNAL GLORY ហើយបន្តចាក់ផ្សាយព្រឹត្តិការណ៍ចំនួន ២៤ទៀតពេញមួយឆ្នាំ ២០១៩តែម្តង។
លោកចន្ទរាជ បន្ត៖ «នេះពិតជាមិនធម្មតាទេ វាសំខាន់សម្រាប់កីឡារ ហើយក៏សំខាន់សម្រាប់អាស៊ីផងដែរ»៕
អត្ថបទ៖ Matias Andres