ជាតិ
សង្គមជាតិ
រដ្ឋបាលខេត្តកែប ស្នើឲ្យសាធារណជនជួយផ្តល់ថវិកា សម្រាប់រៀបចំថ្ងៃឆ្លងឆ្នាំនិង៧មករា
× រដ្ឋបាលខេត្តកែប នឹងរៀបចំពិធីផ្សេងៗ ដូចជា បាញ់កាំជ្រួចជាច្រើនគ្រាប់ អុំទូកផ្កាចារសមុទ្រ បង្ហើរខ្លែង បង្ហោះគោម និងប្រគំតន្ត្រី ដែលប្រពឹត្តទៅនៅថ្ងៃទី៣០-៣១ ខែឆ្នូ ឆ្នាំ២០១៨ នៅខេត្តកែប សម្រាប់អបអរសាទរពិធីបុណ្យឆ្លងឆ្នាំសាកល និងពិធីរំលឹកខួបលើកទី៤០ នៃជ័យជម្នះ៧មករា។ ដើម្បីឲ្យព្រឹត្តការណ៍នេះ មានភាពអាឡារិក អ៊ូរអរ និងសប្បាយរីករាយ រដ្ឋបាលខេត្តកែប បានលិខិតមួយ ដើម្បីសុំសំណូមពរឲ្យម្ចាស់សណ្ឋាគារ ម្ចាស់ផ្ទះសំណាក់ ម្ចាស់រមណីយដ្ឋាន អាជីករ និងក្រុមហ៊ុនឯកជន ជាដើម ចូលរួមផ្តល់ជាថវិកានិងសម្ភារផ្សេងៗ ឲ្យបានគ្រប់ៗគ្នា។
លោក ទឹម វុទ្ធី នាយករដ្ឋបាលខេត្តកែប បានប្រាប់សារព័ត៌មានថ្មីៗតាមទូរសព្ទថា លោកអំពាវនាវឲ្យភ្ញៀវទេសចរជាតិនិងអន្តរជាតិ ចូលរួមអបអរពិធីឆ្លងឆ្នាំសាកល និង៧មករា ខាងមុខនេះឲ្យបានច្រើនកុះករ និងចូលរួមផ្តល់ជាថវិកា សម្រាប់ឲ្យព្រឹត្តការណ៍នេះប្រព្រឹត្តទៅបានយ៉ាងរលូន។ លោក បញ្ជាក់ថា៖«បច្ចុប្បន្នខេត្តកែបយើង កំពុងតែមានឥទ្ធិពល ដែលទាក់ទាញភ្ញៀវទេសចរច្រើន។ ដោយសារកំណើនភ្ញៀវទេសចរច្រើនដូច្នេះ ខេត្តកែបរបស់យើងនឹងរៀបចំកម្មវិធីសប្បាយៗដែលទាញយកភ្ញៀវទេសចរឲ្យកាន់តែច្រើនបន្ថែមទៀតផងដែរ»។
បើតាមនាយករដ្ឋបាលកែបរូបនេះ ប្រជាពលរដ្ឋ ភ្ញៀវទេសចរជាតិ-អន្តរជាតិ ម្ចាស់រមណីយដ្ឋាន ម្ចាស់ក្រុមហ៊ុន ម្ចាស់ផ្ទះសំណាក់ ឬអាជីករផ្សេងៗ រួមគ្នារៀបចំសណ្តាប់ធ្នាប់តាមភូមិឋាន តាមទីសាធារណៈ ឬតាមរមណីយដ្ឋាននានា រក្សាអនាម័យ ដើម្បីឲ្យបរិសា្ថនល្អស្អាត និងមានរបៀបរៀបរយផងដែរ៕
© រក្សាសិទ្ធិដោយ thmeythmey.com