អត្តពលិកកម្ពុជាទាំងបុរសនារី បានគ្រងជើងឯករៀងខ្លួនៗលើវិញ្ញាសារត់ចម្ងាយ៣២គីឡូម៉ែត្រ នាព្រឹត្តិការណ៍រត់ចម្ងាយឆ្ងាយ Angkor Ultra Trail ដែលរៀបចំនៅបរិវេណអង្គរ ខេត្តសៀមរាបពីថ្ងៃទី១៩-២០ ខែមករា ឆ្នាំ២០១៩។ ព្រឹត្តិការណ៍នេះ បានទាក់ទាញអត្តពលិកជាតិអន្តរជាតិជាង១ពាន់នាក់មកពី៤២ប្រទេសចូលរួម ដោយកើនឡើង៣០ភាគរយបើធៀបនឹងឆ្នាំមុន។
នៅម៉ោងប្រមាណ៣ទៀបភ្លឺអត្តពលិកជាតិនិងអន្តរជាតិ ដែលមានបំពាក់ដោយពិលបំភ្លឺនៅលើថ្ងាស និងស្ពាយកាតាមដាក់ទឹកពីក្រោយខ្នង បានជួបជុំគ្នានៅទីលានជល់ដំរីក្នុងបរិវេណរមណីយដ្ឋានប្រវត្តិសាស្ត្រអង្គរ ដែលជាទីចាប់ផ្តើមលើវិញ្ញាសារត់ចម្ងាយ៦៤គីឡូម៉ែត្រ និង១២៨គីឡូម៉ែត្រ។ មិនមែនមានតែអត្តពលិកលើវិញ្ញាសាទាំងពីរនេះទេ សូម្បីអត្តពលិកលើវិញ្ញាសាផ្សេងទៀត ក៏មកជួបជុំគ្នានៅទីនេះដែរ គឺដើម្បីស្តាប់ការណែនាំ និងបង្ហាញផ្លូវរត់ពីគណៈកម្មការរៀបចំព្រឹត្តិការណ៍ Angkor Ultra Trail។
ក្រោយការចេញដំណើររបស់អត្តពលិករត់ចម្ងាយ៦៤និង១២៨គីឡូម៉ែត្រនៅទីលានជល់ដំរី អត្តពលិកលើវិញ្ញាសារត់ចម្ងាយ៤២, ៣២ និង១៦គីឡូម៉ែត្របាននាំគ្នាឡើងរថយន្តក្រុងធ្វើដំណើរទៅកាន់ទីតាំងចេញដំណើររៀងៗខ្លួន។ ខណៈអត្តពលិកលើវិញ្ញាសារត់ចម្ងាយ៣២គីឡូម៉ែត្រធ្វើដំណើរប្រមាណ២០គីឡូម៉ែត្រឆ្ពោះទៅកាន់រមណីយដ្ឋានភ្នំបូក ដែលជាទីចាប់ផ្តើមនៃវិញ្ញាសានេះ។
ក្រោយចំណាយពេលរត់ជាងមួយព្រឹកថ្ងៃទី១៩ ខែមករា ឆ្នាំ២០១៩ កីឡាករ វ៉ាន់ ភារ៉ា បានគ្រងជើងឯកលើវិញ្ញាសារត់ចម្ងាយ៣២គីឡូម៉ែត្រផ្នែកបុរស ក្រោយប្រើពេល២ម៉ោង១៥នាទីនិង១១វិនាទី ខណៈលេខ២ និងលេខ៣បានទៅ Bacry Charley និង Haddad Sofiane មកពីបារាំងក្រោយចំណាយពេល២ម៉ោង២៦នាទី៣៧វិនាទី និង២ម៉ោង៣២នាទី៣៧វិនាទីជាបន្តបន្ទាប់។
ចំណែកកីឡាការិនីខ្មែរ-បារាំង Phai Laurie បានគ្រងជើងឯកលើវិញ្ញាសារត់ចម្ងាយ៣២គីឡូម៉ែត្រផ្នែកនារី ក្រោយប្រើពេល២ម៉ោង៤៤នាទី៣៨វិនាទី ខណៈកីឡាការិនីបារាំង Gaillard Severine ក៏ទទួលបានលេខ១ផងដែរ ក្រោយចាយពេល២ម៉ោង៤៤នាទីនិង៣៨វិនាទីដូចគ្នា។ រីឯកីឡាការិនីអ៊ូហ្គង់ដា Nikitas Olena បានលេខ២ក្រោយប្រើពេល២ម៉ោង៥០នាទី១៨វិនាទី និងលេខបានទៅកីឡាការិនីមកពីបារាំង Davison Stephanie ក្រោយប្រើពេល២ម៉ោង៥៥នាទីនិង១១វិនាទី។ សម្រាប់វិញ្ញាសារត់ចម្ងាយ៣២គីឡូម៉ែត្រនេះដែរ មានអត្តពលិកជាតិនិងអន្តរជាតិចំនួន១៩០នាក់ចូល។
កីឡាករបារាំង Gasnier Thomas គ្រងជើងឯកលើវិញ្ញាសារត់ចម្ងាយ៤២គីឡូម៉ែត្រក្រោយប្រើពេល៣ម៉ោង៤៩នាទី ដែលជាពីដោយកីឡាករបារាំង Barost Sylvain និង De Robillard Axel ក្រោយប្រើពេល៣ម៉ោង៥០នាទី២៦វិនាទី និង៤ម៉ោង៥នាទី៩វិនាទីជាបន្តបន្ទាប់។ រីឯផ្នែកនារីជើងឯកបានទៅកីឡាការិនីចក្រភពអង់គ្លេស Washington Harri ក្រោយប្រើពេល៤ម៉ោង១៥នាទី៤៦វិនាទី ខណៈលេខ២និងលេខ៣បានទៅកីឡាការិនីបារាំង Brohan Isabelle និង Favier Fanny ក្រោយប្រើពេល៤ម៉ោង៤២នាទី១៩វិនាទី និង៥ម៉ោង៥៦វិនាទី។
វិញ្ញាសារត់ចម្ងាយ១៦គីឡូម៉ែត្រចំណាត់ថ្នាក់លេខ១បានទៅកីឡាករ Suarez Mathieu មកពីបារាំងក្រោយប្រើពេល១ម៉ោង១៤នាទី៥៥វិនាទី ឯលេខ២និងលេខ៣បានទៅកីឡាករបារាំង Poirel Mathieu និង Pankanin Richard ក្រោយប្រើពេល១ម៉ោង១៦នាទី១៤វិនាទី និង១ម៉ោង២១នាទី២៥វិនាទី។
សម្រាប់វិញ្ញាសារត់ចម្ងាយ១២៨គីឡូម៉ែត្រ ដែលបានចេញដំណើរតាំងពីម៉ោង៤ទៀបភ្លឺថ្ងៃទី១៩ ខែមករា ឆ្នាំ២០១៩ អត្តពលិកបានមកទល់ហើយនៅថ្ងៃទី២០ ខែមករានេះ ក្រោយចំណាយពេល១យប់២ថ្ងៃក្នុងការរត់។ ជាលទ្ធផលម្ចាស់ជើងឯកលើវិញ្ញាសារត់ចម្ងាយ១២៨គីឡូម៉ែត្របានទៅកីឡាករមកពីអេស្ប៉ាញ Puig Amiel Marc ក្រោយប្រើពេល១៣ម៉ោង៣៦នាទី៣១វិនាទី។ ឯលេខ២និងលេខ៣បានទៅកីឡាករមកពីចក្រភពអង់គ្លេស Kelsall Timothy និង Bowdery Grant ក្រោយប្រើពេល១៦ម៉ោង៤នាទី២៧វិនាទី និង១៨ម៉ោង៨នាទី៣០វិនាទី។
ចំណែកកីឡាការិនីបារាំង Messina Veronique ក្រោយប្រើពេល១៨ម៉ោង៣៨នាទី២៧វិនាទី រីឯកីឡាការិនីឆាយនីសតៃប៉ិ Ye Yan ទទួលបានលេខ២ក្រោយប្រើពេល១៩ម៉ោង៥៣នាទី៣៥វិនាទី និងលេខ៣បានទៅ Laurent Marjorie ក្រោយចាយពេល២៣ម៉ោង៣នាទី២៦វិនាទី។
ព្រឹត្តិការណ៍រត់ប្រណាំងចម្ងាយឆ្ងាយ Angkor Ultra Trail ឆ្នាំនេះបានបញ្ចប់ដោយជោគជ័យ ជាមួយកំណើនអ្នកចូលរួមរហូតជាង១ពាន់នាក់ បើធៀបនឹងឆ្នាំមុនមានចំនួនប្រមាណ៧០០នាក់។ អត្តពលិកទាំងនេះមកពី៤២ប្រទេស ដោយចិនឈរលំដាប់ទី១ និងកម្ពុជាឈរលំដាប់ទី២៕