នាយករដ្ឋមន្ត្រី ជំរុញក្រុមហ៊ុនចិន ឆាប់សង់ផ្លូវល្បឿនលឿនពីភ្នំពេញ ទៅព្រះសីហនុ និងទៅព្រំដែនវៀតណាម

ជាតិ

នាយករដ្ឋមន្ត្រី ជំរុញក្រុមហ៊ុនចិន ឆាប់សង់ផ្លូវល្បឿនលឿនពីភ្នំពេញ ទៅព្រះសីហនុ និងទៅព្រំដែនវៀតណាម

21, Jan 2019 , 6:59 pm

រូបភាព

ជំនួបរវាងនាយករដ្ឋមន្រ្តីកម្ពុជានិងតំណាងក្រុមហ៊ុនចិន

ដោយ: ឡាយ សុភាវតី

ក្នុងអំឡុងនៃការបំពេញទស្សនកិច្ចនៅប្រទេសចិន សម្ដេចនាយករដ្ឋមន្ត្រី ហ៊ុន សែន បានជួបតំណាងក្រុមហ៊ុនវិនិយោគសាជីវកម្មស្ពាននិងថ្នល់ចិននៅកម្ពុជា (china Road Bridge Comrporation CRBC) នៅថ្ងៃទី២១មករា ឆ្នាំ២០១៩។

ទំព័រហ្វេសប៊ុករបស់សម្តេច ហ៊ុន សែន បានសរសេរថា បច្ចុប្បន្ន ក្រុមហ៊ុននេះ រាយការណ៍ប្រាប់សម្តេច ពីបច្ចុប្បន្នភាពនៃគម្រោងវិនិយោគរបស់ខ្លួននៅប្រទេសកម្ពុជា និងផែនការសម្រាប់អនុវត្តន៍នៅពេលខាងមុខ ដែលកន្លងមកក្រុមហ៊ុននេះ បានរួមចំណែកសាងសង់ផ្លូវ និងស្ពាន ជាច្រើនក្នុងប្រទេសកម្ពុជា។ ក្រុមហ៊ុននេះ បានប្រាប់សម្តេចទៀតថា ក្រុមហ៊ុន នឹងសាងសង់ផ្លូវល្បឿនលឿន ពីភ្នំពេញទៅកាន់ខេត្តព្រះសីហនុ ដែលគ្រោងនឹងបើកការដ្ឋានសាងសង់ក្នុងពេលដ៏ខ្លីខាងមុខ។

លើសពីនេះ ក្រុមហ៊ុននេះ ក៏មានគម្រោងសាងសង់ផ្លូវល្បឿនលឿន ពីភ្នំពេញទៅកាន់ព្រំដែនកម្ពុជា-វៀតណាម បាវិត ការស្ថាបនាផ្លូវលេខ១៥-៥១ ដែលតភ្ជាប់ខេត្តកោះកុង ពោធិ៍សាត់ និងខេត្តបាត់ដំបងផងដែរ។

ជាការឆ្លើយតប សម្តេច ហ៊ុន សែន បានជំរុញឲ្យក្រុមហ៊ុនខាងលើ បើកការដ្ឋានសាងសង់គម្រោងផ្លូវល្បឿនលឿនភ្នំពេញទៅខេត្តព្រះសីហនុ។ ជំវិញផ្លូវល្បឿនលឿនដែលត្រូវភ្ជាប់ពីភ្នំពេញទៅបាវិត សម្ដេច បានឲ្យក្រុមហ៊ុនសិក្សានិងជជែកជាមួយស្ថាប័នពាក់ព័ន្ធ ដោយធ្លាប់មានក្រុមហ៊ុនសិក្សាពីមុនមកច្រើនមកហើយ។

សូមបញ្ជាក់ថា រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានប្រកាសកន្លងមកថា ការស្ថាបនាផ្លូវល្បឿនលឿនភ្នំពេញទៅព្រះសីហនុ នឹងត្រូវបើកការដ្ឋាន នៅក្នុងខែកុម្ភៈ ឬដើមខែមីនា ឆ្នាំ២០១៩នេះ៕