​សារព័ត៌មាន Bloomberg បានចេញ​ផ្សាយ​បញ្ជី​ឈ្មោះ​មហាសេដ្ឋី​ដែលមាន​ទឹកប្រាក់​វាល់​លា​ន ចំនួន​៥០០​នាក់​នៅលើ​ពិភពលោក​។ ក្នុង​បញ្ជី Bloomberg Billionaires Index មហាសេដ្ឋី​ម្នាក់​ក្នុងចំណោម​៥​នាក់ មាន​អាយុ​យ៉ាងតិច​៨០​ឆ្នាំ និង​២១​នាក់ មាន​អាយុ​ជាង​៩០​ឆ្នាំ​។​

 

​ក្នុងចំណោម​មហាសេដ្ឋី​ដែលមាន​អាយុ​ជាង​៩០​ឆ្នាំ​នាពេល​បច្ចុប្បន្ន អាស៊ី​មាន​រហូតដល់​ទៅ​៨​នាក់​នៅក្នុង​បញ្ជី ដោយ​ទ្រព្យសម្បត្តិ​រួម​របស់​អ្នក​ទាំងនោះ មាន​សរុប​រហូតដល់​ទៅ​១២៥​ពាន់​លាន​ដុល្លារ​អាមេរិក​។​

 

​លោក Robert Kuok មហាសេដ្ឋី​ម៉ាឡេស៊ី អាយុ​៩៦​ឆ្នាំ មានទ្រព្យ​សម្បត្តិ​រហូត​ដល់​ទៅ​១៧,២​ពាន់​លាន​ដុល្លារ​អាមេរិក​។ លោក​ជា​អតីត​មិត្ត​រួម​ថ្នាក់​របស់​មេដឹកនាំ​សិង្ហ​បុរី លោក លី ក្វាន់​យូ​។ លោក​គ្រប់គ្រង​ក្រុមហ៊ុន Wilmar International លើ​អាជីវកម្ម​ប្រេង​ត្នោត​នៅ​ម៉ាឡេស៊ី សិង្ហ​បុរី និង​ហុងកុង ថែមទាំង​មូលភាគ​ហ៊ុន​នៅ​ក្រុមហ៊ុន​អចល​ទ្រព្យ និង​សណ្ឋាគារ​ផ្សេង​ទៀង​ផងដែរ​។​

 
 

​លោក Masatoshi Ito មហាសេដ្ឋី​ជប៉ុន​អាយុ​៩៥​ឆ្នាំ មានទ្រព្យ​៤,៤១​ពាន់​លាន​ដុល្លារ​អាមេរិក​។ លោក​ជា​ប្រធានកិត្តិយស និង​ជា​ម្ចាស់​ភាគហ៊ុន​ធំ​នៃ​ក្រុមហ៊ុន Seven & i Holdings ដែលមាន​ហាង​ទំនិញ​ជាង​២​ម៉ឺន​នៅ​ជប៉ុន រួមទាំង​ហាង 7-Eleven និង​ផ្សា​ទំនើប​ជាច្រើន​ទៀត​។​

 
 

​លោក Goh Cheng Liang មហាសេដ្ឋី​សិង្ហ​បុរី អាយុ​៩២​ឆ្នាំ មានទ្រព្យ​សម្បត្តិ ៧,២​ពាន់​លាន​ដុល្លារ​អាមេរិក​។ លោក​ជា​ស្ថាបនិក​ក្រុមហ៊ុន​ថ្នាំលាប Wuthelam Holdings​។ ក្រុមហ៊ុន​លោក​ចាប់​ដៃគូ​ជាមួយ​ក្រុមហ៊ុន Nippon Paint របស់​ប៉ុន ដោយមាន​បុគ្គលិក​ជាង​២១០០០​នាក់ និង​ប្រតិបត្តិការ​នៅ​១៦​ប្រទេស​។​

 
 

​លោក Li Ka-Shing មហាសេដ្ឋី​ហុងកុង អាយុ​៩១​ឆ្នាំ មានទ្រព្យ​៣០,៧​ពាន់​លាន​ដុល្លារ​អាមេរិក​។ លោក​ជា​ស្ថាបនិក​ក្រុមហ៊ុន​អចលនទ្រព្យ CK Hutchison Holdings និង CK Asset Holdings​។ កាលពី​ខែឧសភា ឆ្នាំ​២០១៨ លោក​បាន​ផ្ទេរសិទ្ធិ​គ្រប់គ្រង​ទៅ​ឲ្យ​លោក Victor ដែលជា​កូនប្រុស​បង្កើត​។​

 
 

​លោក Lee Shau Kee មហាសេដ្ឋី​ហុងកុង អាយុ​៩១​ឆ្នាំ មានទ្រព្យ​២៣,៦​ពាន់​លាន​ដុល្លារ​អាមេរិក​។ លោក​ជា​ស្ថាបនិក និង​ជា​ម្ចាស់​ភាគហ៊ុន​ដ៏​ធំ​នៅ​ក្រុមហ៊ុន​អចលនទ្រព្យ Henderson Land Development​។ ក្រុមហ៊ុន​នេះ​ប្រតិបត្តិ​លើ​សេវាកម្ម​ហិរញ្ញវត្ថុ អាគារ​ទំនិញ សណ្ឋាគារ និង​ហេដ្ឋារចនាសម្ព័ន្ធ​ផ្សេងៗ​។​

 
 

​លោក Pallonji Mistry មហាសេដ្ឋី​ឥណ្ឌា អាយុ​៩០​ឆ្នាំ លោក​ទទួលបាន​សញ្ជាតិ​អៀរ​ឡង់​កាលពី​ឆ្នាំ​២០០៣​។ លោក​មានទ្រព្យ​សម្បត្តិ​២០,៤​ពាន់​លាន​ដុល្លារ​អាមេរិក​។ លោក និង​គ្រួសារ​ជា​ម្ចាស់​ភាគហ៊ុន​ក្រុមហ៊ុន​សំណង់ Tata Sons និង​បណ្តាញ​សង្គម​ផ្សេងទៀត​ដែល​ប្រតិបត្តិការ​នៅ​អាស៊ី​ខាងត្បូង ម​ជ្ឈឹ​ម​បូព៌ា និង​អាហ្វ្រិក​។​

 
 

​លោក Lui Che Woo មហាសេដ្ឋី​ហុងកុង អាយុ​៩០​ឆ្នាំ មានទ្រព្យ​សម្បត្តិ​១៤,៣​ពាន់​លាន​ដុល្លារ​អាមេរិក​។ លោក​គ្រប់គ្រង​ក្រុមហ៊ុន​កាស៊ីណូ Galaxy Entertainment និង​ក្រុមហ៊ុន​អចលនទ្រព្យ K.Wah International​។​

 
 

​លោក Wee Cho Yaw មហាសេដ្ឋី​សិង្ហ​បុរី អាយុ​៩០​ឆ្នាំ មាន​ទ្រ​ព្ស​៨,១៦​ពាន់​លាន​ដុល្លារ​អាមេរិក​។ លោក​ជា​ម្ចាស់​ភាគហ៊ុន​ធំ​នៅ​ធនាគារ United Overseas Bank ដែល​ធំ​លំដាប់​ទី​បី​នៅ​សិង្ហ​បុរី និង​មាន​សា​ខាង​ជាង​៥០០ នៅ​បណ្តា​ប្រទេស​ចំនួន​១៩៕