អន្តរជាតិ
នយោបាយអន្តរជាតិ
ឧត្តមសេនីយ៍ទ័ពអាកាសផ្តាច់ខ្លួនពីរបបដឹកនាំ ម៉ាឌុយរ៉ូ និងអំពាវនាវឲ្យយោធាងាកមកគាំទ្រ កៃ្វដូ
×![]()
ដោយ: ថ្មីៗ
ឧត្តមសេនីយ៍កងទ័ពជើងអាកាសវ៉េណេស៊ុយអេឡាម្នាក់បានសម្រេចដកខ្លួនឈប់គាំទ្ររបបដឹកនាំលោក នីកូឡា ម៉ាឌុយរ៉ូ នៅថ្ងៃសៅរ៍ទី ២ខែកុម្ភៈ ហើយអំពាវនាវឲ្យបណ្តាយោធាផ្សេងទៀតធ្វើតាមខ្លួនដោយងាកទៅទ្រទ្រង់មេដឹកនាំថ្មីលោក ហ័ន កៃ្វដូវិញម្តង។
បើតាមទូរទស្សន៍ Bloomberg និងកាសែតអាមេរិក Washington Post ដែលដកស្រង់ព័ត៌មានពីកាសែតវ៉េណេស៊ុយអេឡា El Nacional ឧត្តមសេនីយ៍រូបនេះមានឈ្មោះថា Francisco Esteban Yanez Rodriguez។ លោកបានបង្ហោះសារតាមខ្សែអាត់វីដេអូដោយប្រកាសពីការគាំទ្ររបស់លោកចំពោះលោក កៃ្វដូ ដែលត្រូវបានអាមេរិក និងរដ្ឋជាច្រើនក្នុងតំបន់គាំទ្រជាមេដឹកនាំបណ្តោះអាសន្ននោះ។
លោក Francisco ដែលអះអាងថាខ្លួនជាប្រធានការិយាល័យផែនការយុទ្ធសាស្ត្រនៃទីបញ្ជាការកងទ័ពជើងអាកាសនោះបានបង្ហើបថា កងទ័ពជើងគោកវ៉េណេស៊ុយអេឡារហូតដល់ ៩០ភាគរយឯណោះដែលប្រឆាំងនឹងលោក ម៉ាឌុយរ៉ូ ដែលកំពុងរងទណ្ឌកម្ម និងសម្ពាធពីសហគមន៍អន្តរជាតិ។ មន្ត្រីជាន់ខ្ពស់រូបនេះក៏អំពាវនាវឲ្យទាហានដទៃទៀតងើបឡើងនិងប្រកាសគាំទ្រមេដឹកនាំថ្មីផងដែរ។
«ប្រជាជនរងទុក្ខលំបាកគ្រប់គ្រាន់ហើយ។ កុំបន្តធ្វើទុក្ខបុកម្នេញពួកគេទៀត។ វាជាពេលសម្រាប់លទ្ធិប្រជាធិបតេយ្យ»។ ឧត្តមសេនីយ៍ខាងលើនិយាយដូច្នេះ។
ចលនាផ្តាច់ខ្លួនថ្មីរបស់មន្ត្រីយោធាជាន់ខ្ពស់វ៉េណេស៊ុយអេឡាពេលនេះបង្ហាញឲ្យឃើញពីការចុះខ្សោយនៃការគាំទ្រចំពោះរបបដឹកនាំលោក ម៉ាឌុយរ៉ូ ដ្បិតថា មកដល់បច្ចុប្បន្នរបបដឹកនាំលោកមិនត្រូវបានគេចាត់ទុកជារបបដឹកនាំស្របច្បាប់ឡើយ។ ប៉ុន្តែរបបដឹកនាំនេះទទួលបានការគាំទ្រ និងការពារពីសំណាក់ក្រុមយោធា។
ក្រុមអ្នកប្រឆាំងរដ្ឋាភិបាលនិងជាអ្នកគាំទ្រលោក កៃ្វដូ បានបន្តប្រមូលផ្តុំគ្នាបាតុកម្មតាមចិញ្ចើមផ្លូវនាទីក្រុងធំជាពិសេសរដ្ឋធានី ការ៉ាកាស់ ហើយលោក កៃ្វដូ បានអំពាវនាវឲ្យប្រជាជនចូលរួមកាន់តែច្រើនក្នុងចលនានេះ។ យ៉ាងណាមិញ អ្នកគាំទ្រលោក ម៉ាឌុយរ៉ូ ក៏ត្រៀមចេញមុខបាតុកម្មតបតវិញដែរ។ ប៉ុន្តែគេរំពឹងថា ចលនាបាតុកម្មរបស់ក្រុមអ្នកគាំទ្រមានទ្រង់ទ្រាយតូចៗប៉ុណ្ណោះ។
កាលពិចុងខែមករា រដ្ឋាភិបាលវ៉េណេស៊ុយអេឡារបស់លោក ម៉ាឌុយរ៉ូ បានបង្ក្រាប ចលនាបះបោររបស់ក្រុមទាហានដោយជោគជ័យ។ ទាហាន ២៧នាក់ត្រូវបានចាប់ខ្លួនផងដែរក្រោយការបង្ក្រាបនេះ។
ក្នុងពេលមានចលនាបះបោរ ដោយឃើញស្ថានការមិនស្រួល លោក ម៉ាឌុយរ៉ូ បានប្រញាប់អំពាវនាវឲ្យទាហាន និងកងកម្លាំងប្រដាប់អាវុធរក្សាវិន័យឲ្យខ្ជាប់ខ្ជួន និងរួបរួមគ្នាជាធ្លុងមួយ ដើម្បីទប់ទល់នឹងរាល់ការគំរាមកំហែងដល់របបដឹកនាំរបស់លោកផង។
ចំណែកក្រសួងការពារជាតិវេណេស៊ុយអេឡា ដែលទទួលបន្ទុកការពាររបបដឹកនាំលោក ម៉ាឌុយរ៉ូនោះ ក៏បានចេញមុខប្រកាសគាំទ្រតែរដ្ឋាភិបាលលោក ម៉ាឌុយរ៉ូ តែមួយគត់ ហើយរាល់ការតាំងខ្លួនជាប្រធានាធិបតីប្រជែងនឹងមេដឹកនាំស្របច្បាប់នោះជាទង្វើដែលមិនអាចអត់ឱនឲ្យបានឡើយ។
សូមបញ្ជាក់ថា លោក ម៉ាឌុយរ៉ូ បានស្បថចូលកាន់តំណែងជាប្រធានាធិបតីវ៉េណេស៊ុយអេឡាសម្រាប់អាណត្តិទីពីរកាលពីថ្ងៃទី ១០ខែមករា បន្ទាប់ពីឈ្នះឆ្នោតខែឧសភាឆ្នាំមុន ទោះជាមិនមានការទទួលស្គាល់ពីសហគមន៍អន្តរជាតិក៏ដោយ។ ទោះបីជាសេដ្ឋកិច្ចរលំរលាយក៏ដោយ ហើយប្រជាជនរាប់លាននាក់ភៀសខ្លួនក៏ដោយចុះ ម៉ាឌុយរ៉ូ នៅតែទទួលបានការស្ម័គ្រស្មោះ និងគាំទ្រឥតងាករេពីក្រុមយោធាដដែល។ ដរាបណានៅមានកងទ័ពគាំទ្រលើសលុប ការផ្លាស់ប្តូររបបដឹកនាំនោះមិនអាចនឹងកើតឡើយនៅវេណេស៊ុយអេឡា។ ប៉ុន្តែសញ្ញាប្រែប្រួលដោយមានការផ្តាច់ខ្លួន និងងើបបះបោររបស់ក្រុមយោធា របបដឹកនាំលោក ម៉ាឌុយរ៉ូ អាចប្រឈមនឹងការដួលរលំផងដែរ៕
Tag:
ហ័ន កៃ្វដូ
វ៉េណេស៊ុយអេឡា
កងទ័ពជើងអាកាស
នីកូឡា ម៉ាឌុយរ៉ូ
© រក្សាសិទ្ធិដោយ thmeythmey.com
