ជាតិ
រថយន្ត
សេដ្ឋកិច្ច
ច្រកប៉ោយប៉ែត នឹងមិនអនុញ្ញាតឲ្យរថយន្តដឹកទំនិញឆ្លងកាត់ទៀតទេ នៅពេលបើកច្រកស្ទឹងបត់
រូបពីក្រសួងសាធារណការ និងដឹកជញ្ជូន
×![]()
ភ្នំពេញ៖ ច្រកទ្វារអន្តរជាតិស្ទឹងបត់ ក្នុងក្រុងប៉ោយប៉ែត កំពុងត្រូវបានស្ថាបនាហេដ្ឋារចនាសម្ព័ន្ធ ដែលនឹងរួចរាល់នៅឆ្នាំ២០២០ ។ នៅពេលបើកច្រកនេះ ច្រកអន្តរជាតិប៉ោយប៉ែត នឹងទុកសម្រាប់ឲ្យតែពលរដ្ឋ និងភ្ញៀវទេសចរឆ្លងកាត់ប៉ុណ្ណោះ រីឯរថយន្តដឹកទំនិញផ្សេងៗ នឹងត្រូវបង្វែរទៅច្រកអន្តរជាតិថ្មីនេះវិញ។
ច្រកស្ទឹងបត់ នឹងជួយសម្រួលការដឹកជញ្ជូន និងធ្វើដំណើរឆ្លងកាត់ច្រកអន្តរជាតិប៉ោយប៉ែតដែលកំពុងមមាញឹកខ្លាំង។ លោក សាន ស៊ានហូ អភិបាលក្រុងប៉ោយប៉ែត ខេត្តបន្ទាយមានជ័យ បានប្រាប់សារព័ត៌មានថ្មីៗដូច្នេះថា៖«ច្រកអន្តរជាតិស្ទឹងបត់ នឹងជួយបញ្ចៀសចរាចរណ៍នៅច្រកប៉ោយប៉ែត ដែលជំរុញដោយសារកំណើនសេដ្ឋកិច្ច ដែលមានរថយន្តធំៗដឹកស៊ីងម៉ង់ត៍ ដឹកដែកជាដើម ចរាចរឆ្លងកាត់ច្រើន ត្រូវតែដោះស្រាយ»។
នៅពេលច្រកស្ទឹងបត់បើកឲ្យដំណើរការ អាជ្ញាធរនឹងមិនអនុញ្ញាតឲ្យរថយន្តដឹកទំនិញឆ្លងកាត់ច្រកប៉ោយប៉ែតទៀតឡើយ ដោយទុកសម្រាប់ភ្ញៀវទេសចរធ្វើដំណើរ។ នេះបើតាមលោក សាន ស៊ានហូ មុននឹងលោកបញ្ជាក់ថា ក្នុងមួយថ្ងៃរថយន្តដឹកទំនិញប្រមាណ ២០០គ្រឿងបានឆ្លងកាត់ច្រកប៉ោយប៉ែត។
លោក សាន ស៊ាន ឲ្យដឹងថា ហេដ្ឋារចនាសម្ព័ន្ធផ្នែកស្ពាននៃច្រកស្ទឹងបត់ ត្រូវបានសាងសង់រួចរាល់ គឺនៅតែផ្លូវជាងមួយគីឡូម៉ែត្រតភ្ជាប់ទៅផ្លូវលេខ៥៨ប៉ុណ្ណោះ។ បើតាមក្រសួងសាធារណការ និងដឹកជញ្ជូន ដែលបានបញ្ជាក់នៅលើទំព័រហ្វេសប៊ុកនៅថ្ងៃទី៩ខែកុម្ភៈ ច្រកទ្វារអន្តរជាតិស្ទឹងបត់ នឹងត្រូវស្ថាបនារួចរាល់នៅឆ្នាំ២០២០ ខាងមុខនេះ។
ក្រសួងសាធារណការប្រាប់ដូច្នេះថា៖«ច្រកទ្វារអន្តរជាតិនេះគ្រោងបញ្ចប់នៅឆ្នាំ២០២០ ដែលច្រកនេះនឹងដើរតួនាទីសំខាន់ដើម្បីជួយសម្រួលចរាចរណ៍រថយន្តដឹកទំនិញឆ្លងកាត់រវាងកម្ពុជា និងថៃ ព្រមទាំងជួយកាត់បន្ថយការកកស្ទះនៅច្រកប៉ោយប៉ែតនាពេលបច្ចុប្បន្ន ហើយរថយន្តដឹកទំនិញ នឹងតម្រូវឲ្យឆ្លងកាត់ច្រកថ្មីនេះ ដើម្បីពិនិត្យ បំពេញសំណុំបែបបទផ្លូវការ និងបង់ពន្ធគយ»។
ស្ពានច្រកទ្វារអន្តរជាតិស្ទឹងបត់ ត្រូវបានបើកការដ្ឋានសាងសង់កាលពីចុងឆ្នាំ២០១៧ ក្រោយពីរដ្ឋាភិបាលនៃប្រទេសទាំងពីរកម្ពុជា និងថៃ បានចុះកិច្ចព្រមព្រៀងបើកច្រកអន្តរជាតិ និងកិច្ចព្រមព្រៀងផ្ដល់ហិរញ្ញប្បទានសម្រាប់គម្រោងនៃចក្រស្ទឹងបត់នេះនៅឆ្នាំ២០១៥ និងឆ្នាំ២០១៦ ៕
Tag:
ច្រកស្ទឹងបត់
© រក្សាសិទ្ធិដោយ thmeythmey.com
