គណៈកម្មការរៀបចំការបោះឆ្នោតថៃសម្រេចបញ្ជូនសំណុំរឿង គណបក្សរក្សាជាតិថៃ (Thai Raksa Chart) ទៅកាន់តុលាការធម្មនុញ្ញដើម្បីសម្រេចពាក់ព័ន្ធនឹងការស្នើឈ្មោះម្ចាស់ក្សិយ៍ព្រះរៀមមហាក្សត្រជាបេក្ខជននាយករដ្ឋមន្ត្រី។ គណបក្សនយោបាយដែលស្និទ្ធនឹងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់នេះនឹងអាចត្រូវរំលាយចោលផង ក្នុងករណីដែលតុលាការសម្រេចជាផ្លូវការថា សកម្មភាពរបស់បក្សបំពានច្បាប់នោះ។
សំណុំរឿងគណបក្សរក្សាជាតិថៃនេះត្រូវបានបញ្ជូនទៅកាន់តុលាការដោយគណៈកម្មការបោះឆ្នោតនៅល្ងាចថ្ងៃអង្គារទី ១២ ខែកុម្ភៈ ដោយមានការចោទប្រកាន់ថា គណបក្សនេះបំពានច្បាប់ដោយទាញសែស្រឡាយរាជវង្សម្ចាស់ក្សត្រិយ៍ អ៊ូប៊ុនរ័តន៍ រាជកញ្ញា ចូលក្នុងនយោបាយ។
បើតាមកាសែតថៃបាងកកប៉ុសិ៍្ត គណៈកម្មការនេះបានសម្រេចបោះឆ្នោតដោយស្នើឲ្យតុលាការធម្មនុញ្ញរំលាយគណបក្សនេះចោលតែម្តងដោយចោទថា សកម្មភាពដែលបក្សនេះប្រព្រឹត្តជាទង្វើប៉ះពាល់ដល់ប្រព័ន្ធរាជានិយមអាស្រ័យធម្មនុញ្ញរបស់ថៃ។
តាមពិតទៅ ការចោទប្រកាន់របស់គណៈកម្មការបោះឆ្នោតនេះធ្វើឡើតាមមាត្រាមានចែងក្នុងច្បាប់ស្តីពីគណបក្សនយោបាយឆ្នាំ ២០១៨ ប៉ុន្តែការសម្រេចដាក់ទណ្ឌកម្មឬយ៉ាងណានោះ គឺជាឆន្ទានុសិទ្ធិរបស់តុលាការធម្មនុញ្ញប៉ុណ្ណោះ។
ក្នុងករណីដែលតុលាការឯកភាពជាមួយគណៈកម្មការបោះឆ្នោតដោយសម្រេចរំលាយគណបក្សមែន បើតាមបាងកកប៉ុស្តិ៍ ថ្នាក់ដឹកនាំរបស់បក្សក្នុងតំណែងប្រតិបត្តិ ១៣រូបនឹងត្រូវហាមឃាត់ចូលធ្វើនយោបាយក្នុងរយៈពេលដប់ឆ្នាំពោលគឺ រាប់ទាំងចូលរួមបោះឆ្នោត និងឈរឈ្មោះផង។
ចំពោះសមាជិកជាបេក្ខជនមិនស្ថិតក្នុងតំណែងប្រតិបត្តិ ថ្វីបើមិនត្រូវស្ថិតក្រោមបម្រាមធ្វើនយោបាយក៏ដោយ ពួកគេត្រូវជាសមាជិកគណបក្សនយោបាយមួយជាក់លាក់ក្នុងរយៈពេលយ៉ាងហោចណាស់ ៩០ថ្ងៃមុនការបោះឆ្នោតមកដល់។ ខណៈការបោះឆ្នោតនឹងមកដល់នៅថ្ងៃ ២៤ ខែមីនា វាមានន័យថា បេក្ខជនទាំងនោះគ្មានពេលវេលាគ្រប់គ្រាន់ដើម្បីប្តូរបក្ស និងចូលទៅរួមរស់ជាមួយគណបក្សផ្សេងដើម្បីមានសិទ្ធិប្រកួតក្នុងការបោះឆ្នោតនេះឡើយ។
ដោយឡែក ក្រោយមានការលើកឡើងពីលទ្ធភាពនៃការរំលាយគណបក្សនេះចោល ម្ចាស់ក្សត្រិយ៍ អ៊ូប៊ុនរ័តន៍ រាជកញ្ញា បានបង្ហោះសារមួយក្នុងគណនី Instagram ផ្លូវការរបស់ទ្រង់ ដោយបង្ហាញព្រះទ័ពសោកស្តាយចំពោះរឿងរ៉ាវដែលកើតឡើងជាពិសេសព្រះរាជបំណងរបស់ទ្រង់ក្នុងការជួយប្រទេសជាតិនេះ។
«ខ្ញុំសោកស្តាយណាស់ដែលចេតនារបស់ខ្ញុំក្នុងការធ្វើការងារដើម្បីជួយប្រទេសជាតិ និងប្រជាជនថៃបានបង្កឲ្យមានបញ្ហាដែលមិនគួរកើតឡើងដូច្នេះសោះ»។ ម្ចាស់ក្សត្រិយ៍ អ៊ូប៊ុនរ័តន៍ មានបន្ទូលក្នុងសារ ដ៏ខ្លីរបស់ទ្រង់ដូច្នេះ។
សូមបញ្ជាក់បន្តិចថា បក្សរក្សាជាតិថៃ បានប្រកាសព្រះនាមម្ចាស់ក្សត្រិយ៍ អ៊ូប៊ុនរ័តន៍ ជាបេក្ខជននាយករដ្ឋនៅថ្ងៃទី ៨ខែកុម្ភៈដែលធ្វើឲ្យរញ្ជួយនយោបាយថៃ។ ប៉ុន្តែប៉ុន្មានម៉ោងក្រោយមក មហាក្សត្រថៃ មហាវជិរាលង្ករណ៍ បានចេញរាជបញ្ជាមួយហាមព្រះរៀម ប្រឡូកក្នុងនយោបាយជាដាច់ខាត។ តាមពិតទៅ ម្ចាស់ក្សត្រិយ៍ អ៊ូប៊ុនរ័តន៍ ជាបុត្រីច្បងរបស់ព្រះចៅ ភូមិបុល អាឌុលយ៉ាដេត និងម្ចាស់ក្សត្រិយានី ស៊ីរីគិត (Sirikit) ហើយទ្រង់បានលាលែងពីឋានៈរាជវង្សក្នុងឆ្នាំ១៩៧២ ដើម្បីទៅរៀបការជាមួយជនជាតិអាមេរិកម្នាក់។
ប៉ុន្តែក្នុងរាជប្រកាសរបស់ក្សត្រថៃ ទោះបោះបង់តំណែងជាសមាជិករាជវង្សមែន ម្ចាស់ក្សត្រិយ៍អង្គនេះនៅតែមានទំនាក់ទំនងជិតស្និទ្ធជាមួយសមាជិករាជវង្សផ្សេងទៀត និងបានបំពេញរាជកិច្ចក្រោមព្រះនាមមហាក្សត្រថែមទៀតផង៕