លោក Ted Cruz សមាជិកព្រឹទ្ធសភាអាមេរិក ដែលឧស្សាហ៍ចេញមុខជំរុញឲ្យរដ្ឋាភិបាលអាមេរិក ដាក់ទណ្ឌកម្មលើរដ្ឋាភិបាលកម្ពុជា បានសម្តែងការស្វាគមន៍ចំពោះគណៈកម្មការអឺរ៉ុប ដែលបានសម្រេចបើកកិច្ចពិភាក្សា ដើម្បីឆ្ពោះទៅរកការដកប្រព័ន្ធអនុគ្រោះពន្ធ EBA ជាបណ្តោះអាសន្ន ចេញពីកម្ពុជា។ តាមរយៈសារលើបណ្តាញ Twitter សមាជិកព្រឹទ្ធសភាអាមេរិករូបនេះ បានហៅចំណាត់ការរបស់គណៈកម្មការអឺរ៉ុប ថាជាជំហានមួយផ្សេងទៀត ដែលត្រូវត្រួតពិនិត្យឡើងវិញលើវិស័យពាណិជ្ជកម្មនៅកម្ពុជា។
បន្ទាប់ពីលើកឡើងពីវិធានការរបស់គណៈកម្មការអឺរ៉ុបរួចហើយ លោក Ted Cruz ក៏លើកឡើងពីវិធានការរបស់លោកវិញម្តែង ដែលលោក បានរួមដៃជាមួយសមាជិកព្រឹទ្ធសភាអាមេរិកម្នាក់ទៀត គឺលោក Chris Coons នាពេលថ្មីៗនេះ។ លោក Ted Cruz ដែលធ្លាប់ឈរឈ្មោះជាបេក្ខជនប្រធានាធិបតីអាមេរិក បានសរសេរលើ Twitter យ៉ាងដូច្នេះថា៖«សេចក្តីព្រាងច្បាប់ស្តីពីការដាក់ទណ្ឌកម្មលើពាណិជ្ជកម្មនៅកម្ពុជា របស់ខ្ញុំនិងលោក Chris Coons នឹងទាមទារឲ្យរដ្ឋាភិបាលអាមេរិក ធ្វើដូចសហភាពអឺរ៉ុបដែរ»។
លោក Ted Cruz និង លោក Chris Coons បានចាប់ផ្តើមធ្វើសេចក្តីព្រាងច្បាប់ស្តីពីការដាក់ទណ្ឌកម្មលើពាណិជ្ជកម្មនៅកម្ពុជា (Cambodia Trade Act Bill) កាលពីដើមខែមករា ឆ្នាំ២០១៩មក។ គោលបំណងនៃការធ្វើច្បាប់នេះ គឺដើម្បីឲ្យលោក ដូណាល់ ត្រាំ ប្រធានាធិបតីអាមេរិក ពិនិត្យឡើងវិញលើការអនុគ្រោះពន្ធនៃការនាំចូលទំនិញពីកម្ពុជា តាមរយៈប្រព័ន្ធអនុគ្រោះពន្ធមួយ ដែលហៅថា General System Preference (GSP)។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា និងលោក សុខ ឥសាន អ្នកនាំពាក្យគណបក្សកាន់អំណាច ធ្លាប់សើចចំអកឲ្យសមាជិកព្រឹទ្ធសភាអាមេរិកទាំងពីរនេះ ពេលពួកលោក ប្រកាសពីការធ្វើច្បាប់ខាងលើ។
លោក ផៃ ស៊ីផាន អះអាងកន្លងមកថា បើទោះបីជាព្រឹទ្ធសភាអាមេរិក អនុម័តសេចក្តីស្នើច្បាប់នេះក៏ដោយ ក៏រដ្ឋបាលរបស់លោក ត្រាំ មិនយកទៅអនុវត្តដែរ។ ចំណែកលោក សុខ ឥសាន ហ៊ានសន្និដ្ឋានជាមុនថា ការស្នើច្បាប់របស់សមាជិកព្រឹទ្ធសភាអាមេរិក នឹងមិនអាចទៅរួចនោះទេ។
មូលហេតុដែលជំរុញឲ្យសមាជិកព្រឹទ្ធសភាអាមេរិកទាំងពីរ សម្រេចធ្វើច្បាប់នេះឡើង គឺដោយសារតែពួកលោក មិនពេញចិត្តនឹងទង្វើរបស់រដ្ឋាភិបាលកម្ពុជា។ លោក Ted Cruz បាននិយាយថា អាមេរិកបានវិនិយោគលើអនាគតនយោបាយកម្ពុជា ដោយបង្កើតពាណិជ្ជកម្មដែលអាចជឿទុកចិត្តបាន ក្នុងក្របខ័ណ្ឌប្រព័ន្ធអនុគ្រោះ GSP។
ប្រព័ន្ធអនុគ្រោះពន្ធ GSP បានអនុគ្រោះពន្ធដល់ប្រទេសក្រីក្រឬប្រទេសកំពុងអភិវឌ្ឍ លើការនាំចូលទំនិញ និងផលិតផលរាប់ពាន់មុខឯណោះ ទៅកាន់ទីផ្សារអាមេរិក។ យ៉ាងណាក៏ដោយ កម្ពុជា ពុំមានទំនិញ និងផលិតផលច្រើនមុខបែបនេះនាំចូលទៅទីផ្សារមេរិកនោះទេ។ ភាគច្រើនគឺមានតែផលិតផលសម្រាប់ធ្វើដំណើរ (Travel Goods) ប៉ុណ្ណោះ ជាពិសេស វ៉ាលី និង កាបូប ដែលកម្ពុជានាំទៅកាន់ទីផ្សារអាមេរិក។
រីឯ EBA (Everything but Arms) គឺសំដៅលើប្រព័ន្ធអនុគ្រោះពន្ធ លើទំនិញនិងផលិតផលសព្វបែបយ៉ាង ដូចជា សម្លៀកបំពាក់ និង អង្ករ ជាដើម ដែលកម្ពុជា នាំចូលទៅកាន់ទីផ្សារអឺរ៉ុប ដោយលើកលែងតែអាវុធប៉ុណ្ណោះ ដែលមិនរាប់បញ្ចូល។ កម្ពុជា ជាប្រទេសមួយ ដែលបានចុះកិច្ចព្រមព្រៀងជាមួយសហភាពអឺរ៉ុបស្តីពី EBA នេះ ហើយតែងតែទទួលបានការអនុគ្រោះពន្ធ។
គណៈកម្មការអឺរ៉ុប បានបើកកិច្ចពិភាក្សានៅថ្ងៃទី១១ ខែកុម្ភៈ ឆ្នាំ២០១៩ ដើម្បីឆ្ពោះទៅរកការដកជាបណ្តោះអាសន្ននូវប្រព័ន្ធអនុគ្រោះពន្ធ EBA ចេញពីកម្ពុជា។ ប៉ុន្តែ ការបើកកិច្ចពិភាក្សាលើកនេះ ពុំទាន់អាចឈានទៅដល់ការសម្រេចដកប្រព័ន្ធអនុគ្រោះពន្ធ EBA នោះទេ ពីព្រោះថា នីតិវិធីនេះ ត្រូវការពេល១ឆ្នាំឯណោះ ហើយនីតិវិធី ទើបនឹងចាប់ផ្តើម នៅថ្ងៃទី១១ ខែកុម្ភៈ ឆ្នាំ២០១៩នេះទេ។ ដូច្នេះ រហូតដល់អំឡុងខែកុម្ភៈ ឆ្នាំក្រោយ ទើបសហភាពអឺរ៉ុប នឹងធ្វើសេចក្តីសម្រេចចុងក្រោយថាដកឬមិនដក។
នីតិវិធីនេះ មាន៣ដំណាក់កាល។ ដំណាក់កាលទី១ មានរយៈពេល៦ខែ ដោយរយៈពេលនេះ សហភាពអឺរ៉ុប ត្រូវតាមដាននិងត្រួតពិនិត្យ ដោយមានការចូលរួមពិភាក្សាពីភាគីកម្ពុជា ដែលជាសាមីខ្លួន។ ដំណាក់កាលទី២ មានរយៈពេល៣ខែ ដែលដំណាក់កាលនេះ សហភាពអឺរ៉ុប ត្រូវធ្វើរបាយការណ៍។ ដំណាក់កាលទី៣ ដែលជាដំណាក់កាលគ្រប់រយៈ១២ខែ សហភាពអឺរ៉ុប នឹងធ្វើសេចក្តីសន្និដ្ឋានចុងក្រោយនិងធ្វើសេចក្តីសម្រេចផ្លូវការថា ត្រូវដកប្រព័ន្ធអនុគ្រោះពន្ធ EBA ចេញពីកម្ពុជា ឬក៏មិនដក។ នេះជាការពន្យល់របស់សហភាពអឺរ៉ុប ក្នុងសេចក្តីប្រកាសព័ត៌មានស្តីពីកិច្ចពិភាក្សាខាងលើ ដែលចេញផ្សាយនៅថ្ងៃទី១១ ខែកុម្ភៈ ឆ្នាំ២០១៩។
សហភាពអឺរ៉ុប ពន្យល់ទៀតថា បើដំណាល់កាលចុងក្រោយ សហភាពអឺរ៉ុប សម្រេចថាដក នីតិវិធីបន្ទាប់ គឺ សហភាពអឺរុប នឹងត្រូវការពេល៦ខែបន្ថែមទៀត ដើម្បីកំណត់វិសាលភាពនិងកំណត់ពីរយៈពេលថា សហភាពអឺរ៉ុប ត្រូវដកប្រព័ន្ធអនុគ្រោះពន្ធនេះរយៈពេលយូរប៉ុនណា ពីកម្ពុជា។ បន្ទាប់មកទៀត ទើបសហភាអឺរ៉ុប ដាក់សេចក្តីសម្រេចស្តីពីការដកប្រព័ន្ធអនុគ្រោះពន្ធនេះ ឲ្យចូលធរមាន។ ដូច្នេះ សរុបទាំងពេលវេលា ដែលត្រូវសម្រេចថាដក (១២ខែ) និងពេលវេលាដែលត្រូវដាក់ឲ្យចូលជាធរមាន (៦ខែ) វា ត្រូវការពេលវេលាដល់ទៅ១ឆ្នាំកន្លះឯណោះ។
សេចក្តីប្រកាសព័ត៌មាន បានសរសេរពីសម្តីរបស់អ្នកស្រី Cecilia Malmstrom ប្រធានគណៈកម្មការពាណិជ្ជកម្មនៃសហភាពអឺរ៉ុប យ៉ាងដូច្នេះថា៖«កិច្ចពិភាក្សានេះ មិនមែនជាសេចក្តីសម្រេចចុងក្រោយទេ ហើយនីតិវិធី ក៏មិនទាន់ឈានដល់ដំណាក់កាលបញ្ចប់ដែរ។ ប៉ុន្តែ ពេលវេលា ដើរទៅមុខហើយ ហើយយើង ចង់ឃើញសកម្មភាពជាក់ស្តែងក្នុងពេលខាងមុខឆាប់ៗនេះ»។
ចំណែក អ្នកស្រី Federica Mogherini អនុប្រធានគណៈកម្មការអឺរ៉ុប និងជាតំណាងជាន់ខ្ពស់ទទួលបន្ទុកកិច្ចការអន្តរជាតិ បានលើកឡើងក្នុងសេចក្តីប្រកាសព័ត៌មានថា ក្នុងរយៈពេល១៨ខែកន្លងមកនេះ សហភាពអឺរ៉ុប សង្កេតឃើញថា កម្ពុជា មានការធ្លាក់ចុះខ្លាំងនូវលទ្ធិប្រជាធិបតេយ្យ ការគោរពសិទ្ធិមនុស្ស និង នីតិរដ្ឋ។
សេចក្តីប្រកាសព័ត៌មាន បានសង្កត់ធ្ងន់ថា៖«ប្រព័ន្ធអនុគ្រោះពន្ធ EBA អាចនឹងត្រូវលុបចេញពីប្រទេសណា ដែលបរាជ័យក្នុងការគោរពសិទ្ធិមនុស្សនិងសិទ្ធិនិយោជិតកម្មករ»។
ក្រោយគណៈកម្មការអឺរ៉ុប សម្រេចចិត្តផ្តើមដំណើរការនីតិវិធីនេះ ក្រសួងការបរទេស ក្រសួងពាណិជ្ជកម្ម រួមទាំងការិយាល័យអ្នកនាំពាក្យរដ្ឋាភិបាលកម្ពុជា បានចេញសេចក្តីថ្លែងការណ៍រៀងៗខ្លួន ដើម្បីឆ្លើយតប។ សេចក្តីថ្លែងការណ៍ទាំងនោះ សុទ្ធតែសម្តែងភាពរឹងមាំថា មកដល់ពេលនេះ រដ្ឋាភិបាលកម្ពុជា មានសមត្ថភាពនិងអាចជួយខ្លួនឯងផ្នែកសេដ្ឋកិច្ច។
សម្តេច ហ៊ុន សែន ប្រមុខរដ្ឋាភិបាល ក៏មានសារនយោបាយដែរ ពេលគណៈកម្មការអឺរ៉ុប ធ្វើដូច្នេះដាក់កម្ពុជា។ ប្រមុខរដ្ឋាភិបាល បានសរសេរលើទំព័រហ្វេសប៊ុកបែបនេះថា៖«ចំពោះចំណូលពន្ឋ គឺបានកើនឡើងជាបន្តបន្ទាប់។ សេដ្ឋកិច្ចកម្ពុជាពីមុនហ៊ុមព័ទ្ឋដោយទារុណកម្ម និងការកៀបសង្កត់ ប៉ុន្តែពេលនេះគឺបានងើបលូតលាស់និងកាន់តែរឹងមាំ»៕