ជាតិ
សេដ្ឋកិច្ច
ជប៉ុនផ្តល់ជំនួយជាង៥០ម៉ឺនដុល្លារ សម្រាប់គម្រោងអភិវឌ្ឍសាលាមត្តេយ្យ នៅខេត្តបាត់ដំបង
រូបភាពបានពី AKP
×![]()
ភ្នំពេញ៖ រដ្ឋាភិបាលជប៉ុនបានសម្រេចផ្តល់ថវិកាជាង៥២,៩ម៉ឺនដុល្លារអាមេរិក ដល់អង្គការ សន្តិស្ម័គ្រចិត្ត ក្រោមគម្រោងអភិវឌ្ឍសាលារៀនមត្តេយ្យសិក្សាធនធានគំរូ ដែលផ្តោតលើ បណ្ណាល័យនៅក្នុងខេត្តបាត់ដំបង។ ថវិកានេះជាជំនួយឥតសំណង សម្រាប់គម្រោងរបស់អង្គការក្រៅរដ្ឋាភិបាលជប៉ុន ដែលបានចុះហត្ថលេខាលើកិច្ចសន្យាផ្តល់ជំនួយ រវាងលោក ហ៊ីដេហ៊ីសា ហូរីណូអ៊ុជិ ឯកអគ្គរាជទូតជប៉ុនប្រចាំកម្ពុជា ជាមួយលោក Kase Takashi នាយកអង្គការសន្តិស្ម័គ្រចិត្ត នៅស្ថានទូតជប៉ុន កាលពីថ្ងៃទី១២ កុម្ភៈ។
លោក ហូរីណូអ៊ុជិ ហ៊ីដេហ៊ីសា បានមានប្រសាសន៍ថា ថវិកាជំនួយជាង៥០ម៉ឺនដុល្លារនេះ នឹងបង្កើតសាលារៀនមត្តេយ្យគំរូដែលបំពាក់ដោយបណ្ណាល័យ និងលើកកម្ពស់ការអានសៀវភៅសម្រាប់កុមារតូច ដើម្បីកែលម្អគុណភាពនៃការអប់រំកុមារតូចៗ និងអភិវឌ្ឍឱ្យកាន់តែប្រសើរឡើងសម្រាប់ពួកគេ។ ជំនួយនេះ ក៏នឹងរួមចំណែកបង្កើនសមត្ថភាពគ្រូបង្រៀនសាលាមត្តេយ្យក្នុងខេត្តបាត់ដំបងផងដែរ។ ឯកអគ្គរាជទូតជប៉ុនប្រចាំកម្ពុជា សង្ឃឹមថា គម្រោង និងសកម្មភាពរបស់បណ្ណាល័យនេះ នឹងធ្វើឲ្យមានការរីកចម្រើននៅទូទាំងខេត្ត ហើយការអប់រំកុមារតូចៗក្នុងខេត្តបាត់ដំបងនឹងអភិវឌ្ឍ កាន់តែខ្លាំង។
ក្នុងពិធីចុះហត្ថលេខានោះ លោក Kase Takashi បានគូសបញ្ជាក់ថា គម្រោងនេះអាចរួមចំណែកដល់ការបង្កើតទំនាក់ទំនងមិត្តភាព រវាងជប៉ុន និងកម្ពុជា។ លោក Kase Takashi ប្តេជ្ញាពិគ្រោះយោបល់យ៉ាងជិតស្និទ្ធ និងសហការជាមួយមន្ទីរអប់រំ យុវជន និងកីឡា ខេត្តបាត់ដំបង និងសាលាមត្តេយ្យសិក្សាធនធានបាត់ដំបង ក្នុងដំណាក់កាលនៃការរៀបចំគម្រោង ហើយនឹងប្រឹងប្រែងអស់ពីសមត្ថភាព ដើម្បីរក្សានូវកិច្ចសហប្រតិបត្តិការល្អ នៅពេលអនុវត្ត៕
Tag:
សាលាមត្តេយ្យ
ជំនួយ
អប់រំ
បាត់ដំបង
© រក្សាសិទ្ធិដោយ thmeythmey.com
