កម្ពុជា នឹងមានជើងហោះហើរត្រង់ពីហ្វីលីពីន និងឥណ្ឌូណេស៊ី នាឆ្នាំ២០១៩នេះ

ជាតិ

សេដ្ឋកិច្ច

កម្ពុជា នឹងមានជើងហោះហើរត្រង់ពីហ្វីលីពីន និងឥណ្ឌូណេស៊ី នាឆ្នាំ២០១៩នេះ

17, Feb 2019 , 8:29 am

រូបភាព

ដោយ: ភួង វ៉ាន់ថា

កម្ពុជានឹងមានជើងហោះហើរត្រង់ជាមួយប្រទេសក្នុងតំបន់អាស៊ានពីរបន្តែមទៀតក្នុងឆ្នាំ២០១៩នេះ គឺប្រទេសហ្វីលីពីន និងឥណ្ឌូណេស៊ី ខណៈនៅសល់តែព្រុយណេមួយទៀតប៉ុណ្ណោះ។

លោក គុជ បញ្ញាសា អនុរដ្ឋលេខាធិការក្រសួងទេសចរណ៍ បាននិយាយថា កម្ពុជា និងហ្វីលីពីន នឹងមានជើងហោះហើត្រង់នៅដើម ខែមេសាខាងមុខនេះ។ «ការហោះត្រង់រវាងទីក្រុងម៉ានីល-ទីក្រុងភ្នំពេញ ដែលនឹងដំណើរការចាប់ពីថ្ងៃទី០១ ខែមេសា ឆ្នាំ២០១៩ នឹងជំរុញលំហូរភ្ញៀវទេសចរកាន់តែប្រសើរបន្ថែមទៀតចូល មកទស្សនាកម្ពុជា»។ នេះជាការបញ្ជាក់របស់លោក គុជ បញ្ញាសា នៅលើហ្វេសប៊ុកក្រសួងទេសចរណ៍។

ទាក់ទងនឹងចំណុចខាងលើនេះ គណៈប្រតិភូកម្ពុជាបានជួបពិភាក្សាការងារជាមួយក្រុមហ៊ុនអាកាសចរណ៍ហ្វីលីពីន រួមទាំងក្រុមហ៊ុនឯកជន និងប្រតិបត្តិករទេសចរណ៍ជាច្រើន ដើម្បីសហការជំរុញទេសចរណ៍កម្ពុជាទៅកាន់ទីផ្សារហ្វីលីពីន និងជំរុញការទស្សនាទៅវិញទៅមក (two-way visit) រវាងប្រទេសទាំងពីរ កម្ពុជា-ហ្វីលីពីន។

កាលពីថ្ងៃទី៧ ខែកុម្ភៈឆ្នាំ២០១៩ លោក ថោង ខុន រដ្ឋមន្ត្រីក្រសួងទេសចរណ៍ដែលបានជួបពិភាក្សាជាមួយក្រុមហ៊ុនអាកាសចរណ៍ឥណ្ឌូណេស៊ី CITILINK បាននិយាយថា ប្រទេសឥណ្ឌូណេស៊ីបានសម្រេចបើកឲ្យមានការហោះហើរឡើងវិញជាមួយកម្ពុជា ក្នុងឆមាសទី២ ឆ្នាំ២០១៩នេះ។

រដ្ឋមន្ត្រីក្រសួងទេសចរណ៍ បាននិយាយថា៖«ដោយសារការខិតខំចរចារវាងភាគីទាំងពីរ ពិសេស ថ្នាក់ដឹកនាំនៃប្រទេសទាំង២ ទើបនាពេលខាងមុខ នឹងមានការហោះហើរត្រង់ពីឥណ្ឌូណេស៊ីមកកាន់កម្ពុជាឡើងវិញ បន្ទាប់ពីខកខានអស់ជិតកន្លះសតវត្សរ៍»។

បច្ចុប្បន្នភ្ញៀវទេសចរឥណ្ឌូណេស៊ីមកទស្សនាក្នុងប្រទេសកម្ពុជាជិត ៥ម៉ឺននាក់ក្នុងមួយឆ្នាំតែប៉ុណ្ណោះ។

កាលពីឆ្នាំ ២០១៨ ទេសចរណ៍ឥណ្ឌូណេស៊ីប្រហែល ៤៧ ២៥៦ នាក់ បានមកទស្សនាប្រទេសកម្ពុជា ដែលកើនឡើង ៩ ភាគរយធៀបនឹងឆ្នាំ ២០១៧។ ទេសចរណ៍ហ្វីលីពីន បានមកទស្សនាកម្ពុជា មានចំនួនសរុប ៧៦ ០២៤ នាក់ កាលពីឆ្នាំ ២០១៨ ធ្លាក់ចុះ ១៤ ភាគរយធៀបនឹង ៨៨ ៩០៦ នាក់កាលពីឆ្នាំ ២០១៧។ នេះបើយោងតាមរបាយការណ៍របស់ក្រសួងទេសចរណ៍។ ក្នុងចំណោមប្រទេសសមាជិកអាស៊ាន នៅតែប្រទេសប្រ៊ុយណេមួយទៀតទេ ដែលមិនទាន់មានការហោះហើរត្រង់មកកម្ពុជា៕