សង្គមអន្តរជាតិ
អន្តរជាតិ
ការស្ទង់មតិ៖អាយុ៣០ឆ្នាំជាវ័យល្អបំផុតសម្រាប់ការរៀបការរបស់ប្រជាជនកូរ៉េខាងត្បូង រូបភាព៖ Korea Bizwire
× បុរសនិងស្ត្រីដែលមិនទាន់រៀបការរួចក្នុងប្រទេសកូរ៉េខាងត្បូង បានជ្រើសរើសយកអាយុ ៣០ឆ្នាំ គឺជាវ័យល្អបំផុតសម្រាប់ការរៀបការ។ នេះបើយោងតាមការស្ទង់មតិក្នុងស្រុកថ្មីមួយ ចេញផ្សាយនៅថ្ងៃអង្គារទី ១២ ខែកុម្ភៈ។ ការណ៍នេះបានឆ្លុះបញ្ចាំងពីការកើនឡើងនៃទំនោរក្នុងការពន្យារពេលសម្រាប់រៀបការនៅក្នុងសង្គមកូរ៉េខាងត្បូង ដែលនឹងធ្វើឲ្យអត្រាកំណើតធ្លាក់ចុះ។
យោងតាមការស្ទង់មតិរបស់វិទ្យាស្ថានកូរ៉េសម្រាប់កិច្ចការសង្គមនិងសុខភាព ប្រមាណ ៥៨,៧ ភាគរយនៃបុរសនៅលីវបានចាត់ទុកអាយុ ៣០ ឆ្នាំថាជាវ័យល្អបំផុតសម្រាប់ការរៀបការ។ ចំណែកឯ ២៨,៨ ភាគរយផ្សេងទៀតបានជ្រើសរើសយកអាយុ ៣៥ ឆ្នាំ ឬចាស់ជាងនេះ។
ជាមួយគ្នានេះ ស្ត្រីនៅលីវប្រមាណ ៦២,៨ ភាគរយបានចាត់ទុកអាយុ ៣០ ឆ្នាំថាជាវ័យល្អបំផុតសម្រាប់ការរៀបការ ដែលច្រើនជាងភាគរយរបស់បុរស។ រីឯ ស្ត្រីនៅលីវត្រឹមតែ ១៧,៤ ភាគរយប៉ុណ្ណោះបានជ្រើសរើសអាយុ ៣៥ ឆ្នាំ ឬចាស់ជាងនេះជាវ័យល្អបំផុតសម្រាប់ការរៀបការ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Xinhua ។
លទ្ធផលនេះគឺធ្វើឡើងដោយផ្អែកលើការស្ទង់មតិបុរសនៅលីវចំនួន ១១៤០ នាក់ និងស្ត្រីនៅលីវចំនួន ១៣២៤ នាក់។ ការជ្រើសរើសយកអាយុ៣០ឆ្នាំជាវ័យល្អបំផុតសម្រាប់ការរៀបការ បានឆ្លុះបញ្ចាំងពីកំណើននៃទំនោរក្នុងការពន្យារការរៀបការក្នុងសង្គមកូរ៉េខាងត្បូង ដែលអាចធ្វើឲ្យអត្រាកំណើតប្រជាជនធ្លាក់ចុះ។
សូមបញ្ជាក់ថា វ័យជាមធ្យមសម្រាប់ការរៀបការជាលើកដំបូងគឺនៅអាយុ ៣២,៨ ឆ្នាំសម្រាប់បុរស និងអាយុ ៣០,១ ឆ្នាំសម្រាប់ស្ត្រី គិតត្រឹមឆ្នាំ ២០១៦។ នេះបើយោងស្ថិតិរបស់រដ្ឋាភិបាលកូរ៉េខាងត្បូង។ ចំណែកឯចំនួននៃការរៀបការក្នុងប្រទេសកូរ៉េខាងត្បូងវិញគឺស្មើនឹង ២៨១ ៦០០ ក្នុងឆ្នាំ២០១៦៕
© រក្សាសិទ្ធិដោយ thmeythmey.com