ជាតិ
សិល្បះ
មហោស្រពគីហ្សូណាជប៉ុននឹងប្រារព្ធធ្វើពីថ្ងៃទី២១ ដល់ថ្ងៃទី២៤ ខែកុម្ភៈ
× ភ្នំពេញ៖ ស្ថានទូតជប៉ុន រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមជ្ឈមណ្ឌលអាស៊ីនៃមូលនិធិជប៉ុន នឹងរៀបចំមហោស្រពគីហ្សូណាជប៉ុន-កម្ពុជាលើកទី៨ ដែលនឹងប្រព្រឹត្តទៅចាប់ពីថ្ងៃទី២១ ដល់ថ្ងៃទី២៤ ខែកុម្ភៈ ឆ្នាំ២០១៩ នៅ CJCC។
មហោស្រពគីហ្សូណាជប៉ុន-កម្ពុជា បានរៀបចំឡើងជារៀងរាល់ឆ្នាំចាប់ពីឆ្នាំ២០១២ ក្នុងគោលបំណងបង្ហាញពីវប្បធម៌បុរាណ- ទំនើបរបស់ជប៉ុន និងកម្ពុជា ក៏ដូចជាការផ្លាស់ប្ដូរវប្បធម៌រវាងប្រជាជននៃប្រទេសទាំងពីរផងដែរ។ ប្រធានបទមហោស្រពគីហ្សូណាឆ្នាំនេះគឺ « Experience Together »។
មហោស្រពគីហ្សូណារយៈពេល៤ថ្ងៃនោះ មានការសម្ដែងរបាំប្រពៃណីខ្មែរ ល្ខោនខោលវត្តស្វាយអណ្ដែត។ ការសម្ដែងបែបប្រពៃណីនិងទំនើបដោយក្រុម MINYO GIRLS និងក្រុម Area Rock Styler សិក្ខាសាលាស្ដីពីតន្ត្រីបុរាណជប៉ុន JSR ការប្រគំតន្ត្រីក្លាស៊ិកដោយ Worldship Orchestra និងក្រុមតន្ត្រីយុវជនអង្គរ សិក្ខាសាលារបាំដោយក្រុម Area Rock Styler។ ការសាកល្បងកីឡាយុទ្ធសិល្ប៍ជប៉ុន និងកម្ពុជា (កីឡាការ៉ាតេដូ អៃគីដូ ខេនដូ និងក្បាច់គុនល្បុកត្តោ) ។ បន្ថែមពីនោះក៏មានការបង្ហាញពិសេសរបស់ល្ខោនបាសាក់ ល្ខោនខោលវត្តស្វាយអណ្ដែត និងល្ខោនបាសាក់រឿងព្រះស៊ីសុវណ្ណផងដែរ។
ក្រៅពីការសម្ដែង មហោស្រពនៅមានសកម្មភាពជាច្រើនទៀត ដូចជាការគូរមុខទម្រង់សិល្បៈល្ខោនបាសាក់ សិក្ខាសាលាស្ដីពីការអភិរក្សសម្បត្តិបេតិកភណ្ឌពិភពលោកដោយក្រុមរដ្ឋាភិបាលជប៉ុនលើការថែរក្សាតំបន់អង្គរ។ ការសាកល្បងស្លៀកក្បិនខ្មែរ និងពាក់យូកាតាជប៉ុន។ ការសាកល្បងពិធីលៀងតែជប៉ុន សាដូ សិល្បៈបត់ប្រដាស អូរីហ្គាមី តុបតែងផ្កា អ៊ឹកេបាណា ការសរសេរអក្សរផ្ចង់ ស្យូដូ ជាដើម។
អ្នកចូលរួមត្រូវបានសំណូមពរឱ្យពាក់អាវយឺត ដើម្បីងាយស្រួលចូលរួមសកម្មភាពនានា៕
Tag:
ភ្នំពេញ
ស្ថានទូតជប៉ុន
មហោស្រពគីហ្សូណាជប៉ុន
សិល្បៈ
ល្ខោនខោល
© រក្សាសិទ្ធិដោយ thmeythmey.com