ទាហាន ដែលយកកាំភ្លើងវាយពលរដ្ឋនៅព្រះសីហនុ ត្រូវបញ្ឈរជើង

ជាតិ

សង្គមជាតិ

ទាហាន ដែលយកកាំភ្លើងវាយពលរដ្ឋនៅព្រះសីហនុ ត្រូវបញ្ឈរជើង

19, Feb 2019 , 7:51 pm

រូបភាព

រូបភាពថតចេញពីវីដេអូរបស់សារព័ត៌មានប្រជាជន (People News)

ដោយ: សារព័ត៌មានថ្មីៗ

ទាហានម្នាក់នៅខេត្តព្រះសីហនុ បានរងទណ្ឌកម្មផ្នែករដ្ឋបាលយោធា ដោយត្រូវបានព្យួរការងារ ព្រោះតែបានយកកាំភ្លើង ទៅវាយខ្នងប្រជាពលរដ្ឋម្នាក់ ខណៈប្រជាពលរដ្ឋរូបនោះ កំពុងលុតជង្គង់ ហើយដៃទាំង២ត្រូវបានចងស្លាបសេក ក្រោយសមត្ថកិច្ចចាប់បាន ពេលទៅតវ៉ារឿងដីធ្លី។ នេះជាការអះអាងរបស់ឧត្តមសេនីយ៍ទោ សាវិន វិបុល មេបញ្ជាការរងយោធភូមិភាគទី៣ ក្នុងខេត្តព្រះសីហនុ។

លោក សាវិន វិបុល បានប្រាប់សារព័ត៌មានថ្មីៗ តាមទូរសព្ទនៅរសៀលថ្ងៃទី១៩ ខែកុម្ភៈ ឆ្នាំ២០១៩នេះ ថា លោក បានធ្វើរបាយការណ៍ទៅថ្នាក់លើរួចហើយ ដើម្បីឲ្យសម្រេចបន្ត។ លោក បញ្ជាក់យ៉ាងដូច្នេះថា៖«ឥឡូវយើងព្យួរការងារគាត់ហើយ។ ចំណែកថ្នាក់សម្រេចដកចេញពីក្របខណ្ឌយោធា ឬយ៉ាងម៉េចនោះ គឺអាស្រ័យលើថ្នាក់លើ»។

មេបញ្ជាការតំបន់ប្រតិបត្តិការសឹករងព្រះសីហនុរូបនេះ បានអះអាងថា ដោយសារត្រូវគេប្រើអំពើហិង្សាមុន ទើបកូនចៅរបស់លោក ប្រើអំពើហិង្សាវិញ។ លោក និយាយបែបនេះថា៖«គាត់ក៏ឈឺខ្លួនដែរ ត្រូវម៉ាដុំថ្មដែរហ្នឹង»។

លោក សាវិន វិបុល ពុំបានបញ្ចេញឈ្មោះទាហានដែលរងការពិន័យនោះទេ ប៉ុន្តែលោក ប្រាប់ថា ទាហាននេះ ពាក់ស័ក្តិ២។ ម្យ៉ាងទៀត លោក ក៏មិនបានប្រាប់ដែរថា លោក នឹងត្រូវស្រាវជ្រាវរកទាហានផ្សេងទៀត ដែលពាក់ព័ន្ធនឹងអំពើហិង្សានេះ ឬក៏ត្រូវបញ្ឈប់។

តាមរយៈវីដេអូដែលត្រូវបានបង្ហោះលើបណ្តាញសង្គម គេបានឃើញទាហាននេះ យកកាំភ្លើងទៅវាយខ្នងប្រជាពលរដ្ឋម្នាក់ ដែលអង្គុយលុតជង្គង់ ហើយដៃទាំង២ត្រូវបានចងស្លាបសេក។ គេ ក៏ឃើញសមត្ថកិច្ចផ្សេងទៀតដែរ ដែលបានប្រើអំពើហិង្សាលើប្រជាពលរដ្ឋ។

ទាហាននេះ ជាជនទី២ហើយ ដែលត្រូវរងពិន័យផ្នែករដ្ឋបាល។ អ្នកទី១ ដែលរងពិន័យផ្នែករដ្ឋបាល ដោយត្រូវបានព្យួការងារនោះ គឺកងរាជអាវុធហត្ថ។

អត្ថបទទាក់ទង

សមត្ថកិច្ចព្រះសីហនុ បំភ្លឺជាថ្មីថា គ្រាប់កាំភ្លើងបាញ់ទៅលើ ហើយធ្លាក់មកត្រូវពលរដ្ឋ

រកឃើញប៉េអឹមម្នាក់ ដែលប្រើហិង្សាលើពលរដ្ឋតវ៉ារឿងដីធ្លីនៅព្រះសីហនុ

សមត្ថកិច្ចព្រះសីហនុថា មិនបានបាញ់ពលរដ្ឋដែលតវ៉ារឿងដីធ្លីទេ ហើយសង្ស័យថាជនទីបី ជាអ្នកប្រព្រឹត្ត

ពលរដ្ឋ៦នាក់នៅព្រះសីហនុ ត្រូវចាប់ខ្លួន ក្រោយតវ៉ារឿងដីធ្លីជាមួយឧកញ៉ា

កម្លាំងប្រដាប់អាវុធទាំង៣ប្រភេទតែម្តង ដែលរួមមាន ប៉ូលិស ទាហាន និងកងរាជអាវុហត្ថ ដែលចុះទៅអនុវត្តដីការបស់តុលាការកំពូល ដែលសម្រេចឲ្យឧកញ៉ាម្នាក់ ឈ្នះក្តីលើប្រជាពលរដ្ឋ ក្នុងរឿងដីធ្លី នៅភូមិគគីរ ឃុំបិតត្រាង ស្រុក ព្រៃនប់ខេត្តព្រះសីហនុ។

ថ្មីៗនេះ សម្តេច ស ខេង រដ្ឋមន្ត្រីក្រសួងមហាផ្ទៃ ដែលមានដែនសមត្ថកិច្ចគ្រប់គ្រងលើរដ្ឋបាលថ្នាក់ក្រោមជាតិ ទើបនឹងស្តីបន្ទោសឲ្យរដ្ឋបាលខេត្តព្រះសីហនុ ចំពោះការប្រើកម្លាំងទាហាន ជាមួយកម្លាំងប៉ូលិសនិងកម្លាំងកងរាជអាវុធហត្ថ ក្នុងការអនុវត្តដីកា។ រដ្ឋមន្ត្រីក្រសួងមហាផ្ទៃ លើកឡើងថា រដ្ឋបាល អាចប្រើកម្លាំងប៉ូលិសនិងកម្លាំងកងរាជអាវុធហត្ថបាន តែបើប្រើកម្លាំងទាហាន គឺខុសច្បាប់។

ប្រជាពលរដ្ឋប្រមាណ២០០នាក់ បាននាំគ្នាទៅតវ៉ា ក្រោយតុលាការកំពូល ឲ្យពួកគេចាញ់ក្តី។ បន្ទាប់មក សមត្ថកិច្ច ក៏នាំគ្នាទប់ស្កាត់ប្រជាពលរដ្ឋទាំងនោះ ដោយអះអាងថា ជាការអនុវត្តតាមសាលដីការបស់តុលាការកំពូល ហើយអំពើហិង្សាក៏កើតឡើង។

មកដល់ពេលនេះ ការប្រឈមមុខដាក់គ្នារវាងប្រជាពលរដ្ឋនិងសមត្ថកិច្ច បានស្ងប់ស្ងាត់ ប៉ុន្តែដំណោះស្រាយរឿងដីធ្លីរវាងប្រជាពលរដ្ឋ និង ឧកញ៉ា នៅមិនទាន់មាននោះទេ។ ប្រជាពលរដ្ឋ នៅតែមិនសុខចិត្តនិងចាត់ទុកថាជាជារឿងអយុត្តិធម៌ សម្រាប់ការកាត់ក្តីនេះ។ ប្រជាពលរដ្ឋ អាចនឹងបន្តតវ៉ាក្នុងរឿងនេះ នៅពេលក្រោយទៀត៕