កីឡាជាតិ
ជាតិ
AFF U22៖ តើថៃ ឬ វៀតណាម ដែលត្រូវប៉ះកម្ពុជា នៅវគ្គពាក់កណ្តាលផ្តាច់ព្រ័ត្រ?
ខ្សែប្រយុទ្ធវៀតណាម Tran Danh Trung (ស) និងខ្សែបម្រើថៃ TanpisitKhukhalamo។ រូបថត FFC
×![]()
ដោយ: ថ្មីៗ
ក្រុមកីឡាបាល់ទាត់ជម្រើសជាតិអាយុក្រោម២២ឆ្នាំកម្ពុជាក្នុងនាមជាក្រុមលេខ១ពូល B កំពុងអ៊ុតមើលការប្រកួតចុងក្រោយនៅក្នុងពូល A នៃព្រឹត្តិការណ៍ AFF U22 Championship នារសៀលថ្ងៃព្រហស្បតិ៍នេះ រវាងវៀតណាម និងថៃ។ ក្រុមយុវជននៃប្រទេសជិតខាងទាំងពីរ ប្រជែងគ្នាសម្រាប់ចំណាត់ថ្នាក់លេខ១ក្នុងពូល A ខណៈក្រុមដែលបានលេខ២ ត្រូវឡើងទៅជួបយុវជនគោព្រៃ នៅវគ្គពាក់កណ្តាលផ្តាច់ព្រ័ត្រ។
វៀតណាម បើកឆាកពូល A ជាមួយនឹងជ័យជម្នះ ២-១ លើហ្វីលីពីន និងបន្តបំបាក់ទីម័រខាងកើត ៤-០ រីឯថៃ ស៊ីទីម័រខាងកើត ១-០ និងយកឈ្នះហ្វីលីពីន ៣-០ ។ យោងតាមលទ្ធផលខាងលើ វៀតណាមឈរលើចំណាត់ថ្នាក់លេខ១បណ្តោះអាសន្ន ដោយមានសំណល់គ្រាប់បាល់លើសថៃមួយគ្រាប់។
សម្រាប់ជំនួបរវាងវៀតណាម និងថៃ នាវេលាម៉ោង៣ និង៣០រសៀលនាពហុកីឡដ្ឋានជាតិនេះ លទ្ធផលស្មើនឹងនាំវៀតណាមឈរលេខ១ក្នុងពូល ប៉ុន្តែបើមានលទ្ធផលឈ្នះ-ចាញ់ ក្រុមដែលចាញ់ ឬលេខពីរក្នុងពូល A នឹងត្រូវតទល់ជាមួយកម្ពុជានៅវគ្គពាក់កណ្តាលផ្តាច់ព្រ័ត្រនាថ្ងៃទី២៤ ខែកុម្ភៈ រីឯក្រុមឈ្នះរង់ចាំមើលក្រុមលេខពីរក្នុងពូល B ដែលអាចជាម៉ាឡេស៊ី ឥណ្ឌូណេស៊ី ឬមីយ៉ាន់ម៉ា។
ក្រោយការប្រកួតពីរលើកក្នុងពូល B កម្ពុជាធានាបានចំណាត់ថ្នាក់លេខ១ក្នុងពូល តាមរយៈជ័យជម្នះ ១-០ លើម៉ាឡេស៊ី និង ២-០ លើមីយ៉ាន់ម៉ា និងនៅសល់ជំនួបចុងក្រោយជាមួយឥណ្ឌូណេស៊ី។
ចំពោះការប្រកួតនៅថ្ងៃនេះផងដែរ ក្រោយជំនួបរវាងវៀតណាម និងថៃ នាវេលាម៉ោង៣ និង៣០នាទី ក្រុមទីម័រខាងកើត និងហ្វីលីពីន ដែលបានហាលអាវទៅហើយនោះ ត្រូវប៉ះគ្នានៅម៉ោង៦ និង៣០នាទីដើម្បីបង្គ្រប់កិច្ចនៅក្នុងពូល A៕
Tag:
AFF U22
© រក្សាសិទ្ធិដោយ thmeythmey.com
