ជាតិ
សង្គមជាតិ
អ្នករត់ម៉ូតូកង់បី៖ អត់សុខចិត្តទេ មើលងាយខ្ញុំ ហេតុអ្វីឲ្យឆ្កែឡើងជិះមុនមនុស្ស?
× ភ្នំពេញ៖ «រឿងឆ្កែនេះ!សួរថាហៅ(ម៉ូតូកង់បី)ខ្ញុំមកជិះ ឬឲ្យឆ្កែជិះ»? នេះជាការសំនួរអមជាមួយសម្ដីខឹងសម្បាររបស់បុរសអ្នករត់ម៉ូតូកង់បីម្នាក់ ទៅកាន់អតិថិជន ដែលបម្រុងនាំឆ្កែរបស់ខ្លួនទៅកាន់មន្ទីរពេទ្យ។
តាមរយៈវីដេអូឃ្លីបជាង២នាទី បុរសជាអ្នករត់ម៉ូតូកង់បី បានបង្ហាញអារម្មណ៍មិនពេញចិត្តចំពោះអតិជន ដែលឲ្យឆ្កែឡើងជិះម៉ូតូកង់បីខ្លួនឡើយ។ នោះក៏ព្រោះតែបុរសរត់កង់បី យល់ថា ការឲ្យឆ្កែឡើងជិះកង់បីនេះ គឺជាមើលងាយដល់ខ្លួន ដែលជាអ្នករត់សេវាដឹកជញ្ជូននេះ។ «ហៅ(ម៉ូតូ)កង់បីខ្ញុំមក ឲ្យឆ្កែជិះអ៊ីចឹង? ខ្ញុំមិនមែនកង់បីដឹកឆ្កែទេណា! »។ នេះជាការអះអាងរបស់អ្នករត់កង់បី។
«ចុះពូឯងអត់សុខចិត្តកន្លែងណា?» នេះជាសំនួរចេញពីមាត់ស្ត្រីអតិថិជនទៅកាន់អ្នករត់កង់បី ដែលអ្នករត់កង់បីឆ្លើយតបវិញភ្លាមថា «ខ្ញុំអត់សុខចិត្តត្រង់ថា រឿងអីមើលងាយខ្ញុំ ឲ្យឆ្កែឡើងលើកង់បីខ្ញុំមុន(ម្ចាស់)។ សួរថាកង់បីខ្ញុំនេះ ហៅមកឆ្កែជិះ ឬឲ្យមនុស្សជិះ? ហើយឆ្កែអ្នកហៅ ឬមនុស្សអ្នកហៅ(កង់បីជិះ)។ អស្ចារ្យអី កង់បីខ្ញុំទិញតម្លៃ១០០០ទៅ២០០០ណា! អូនណា បងក៏ជាអ្នកធ្វើការម្នាក់ដែរ តែមិនមែនមករត់កង់បីនេះ មិនថោកទាប ដល់ថ្នាក់ប្រើភាសាហ្នឹងទេ»។
តាមពិតគោលបំណងរបស់ស្ត្រី ដែលហៅម៉ូតូកង់បីមកជិះនេះ គឺដើម្បីដឹកខ្លួន និងឆ្កែ ទៅមន្ទីរពេទ្យ ចាក់ថ្នាំបង្ការជំងឺ ប៉ុន្តែដោយសារសត្វឆ្កែ បានឡើងលើម៉ូតូកង់បី មុនម្ចាស់នោះ ទើបបង្កឲ្យមានបញ្ហាទាស់សម្តីនេះកើតឡើង។ ប៉ុន្តែដើម្បីបញ្ចប់បញ្ហានេះ ស្ត្រីជាអតិជន ក៏បានសម្រេចផ្ដល់ថវិកា៣០០០រៀល ដល់រត់កង់បី ឲ្យត្រឡប់ទៅវិញ ដោយមិនចាំបាច់ដឹកខ្លួន និងឆ្កែទៅពេទ្យឡើយ។ ប៉ុន្តែបុរសរត់កង់បី មិនព្រមទទួលយកថវិកានេះហើយ ថែមទាំងនៅតែទន្ទេញនូវពាក្យសម្តីថា «ឲ្យឆ្កែជិះកង់បីនេះ ជាការមើលងាយខ្លួន»។
តែយ៉ាងណារឿងរ៉ាវនេះ មិនបានបង្កជាជម្លោះធ្ងន់ធ្ងរទេ ក្រោយពីអតិថិជន បានបិទទ្វាររបងផ្ទះ ហើយផ្ដាំទៅអ្នករត់ម៉ូតូកង់បីវិញថា «ចាំខ្ញុំតេទៅខាងក្រុមហ៊ុន របស់ពូឯង។ សំខាន់ខ្ញុំអត់ចង់មានរឿងអ្វីជាមួយពូឯង»៕
Tag:
ម៉ូតូកង់បី
សេដ្ឋកិច្ច
© រក្សាសិទ្ធិដោយ thmeythmey.com