កីឡាជាតិ
ជាតិ
ភ្នំពេញក្រោននឹងអបអរការទទួលពានរង្វាន់ក្របខណ្ឌកំពូលជាលើកទី៥នៅថ្ងៃអាទិត្យនេះ
× នាល្ងាចថ្ងៃអាទិត្យខាងមុខនេះក្លិបកីឡាបាល់ទាត់ភ្នំពេញក្រោន នឹងអបអរការទទួលបានពានរង្វាន់ក្របខណ្ឌកំពូលរបស់កម្ពុជាជាលើកទី៥ ខណៈពួកគេត្រូវប៉ះជាមួយក្រុមចម្ការកៅស៊ូបឹងកេតសម្រាប់ការប្រកួតបិទរដូវកាលឆ្នាំ២០១៤ ។ បើទោះបីជាមានលទ្ធផលបែបណាក៏ដោយភ្នំពេញក្រោននៅតែក្រុមដែលត្រូវបានតំណែងជើងឯករីឯបឹងកេតត្រូវទទួលតំណែងលេខពីររយៈពេល២ឆ្នាំជាប់ៗគ្នា។
នៅចុងសប្តាហ៍នេះ ក្រុមកីឡាបាល់ទាត់ទាំង១២នៃក្របខណ្ឌមិត្តហ្វូនខេមបូឌានលីក ឈានដល់ការប្រកួតចុងក្រោយរបស់ខ្លួនប្រចាំរដូវកាល ប៉ុន្តែតារាងចំណាត់ថ្នាក់នឹងមានការប្រែប្រួលបន្តិចបន្តួចប៉ុណ្ណោះ ខណៈក្រុមចំណាត់ថ្នាក់លេខ១ លេខ២ និងក្រុមដែលត្រូវកាត់ចេញ ដឹងវាសនារបស់ខ្លួនរួចទៅហើយ។
ការសម្រេចលុបចោលរូបមន្តប្រកួតខ្វែងសម្រាប់៤ក្រុមកំពូលដែលទទួលបានពិន្ទុលើសគេប្រចាំរដូវកាល បាននាំឲ្យក្រុមភ្នំពេញក្រោនក្លាយជាម្ចាស់ជើងឯកក្របខណ្ឌមិត្តហ្វូនខេមបូឌានលីកឆ្នាំ២០១៤ ចាប់តាំងពីថ្ងៃទី១២ ខែកក្កដា មកម្ល៉េះ ពោលគឺបន្ទាប់ពីពួកគេបានទទួលជ័យជម្នះ ១-០ លើណាហ្គាខប។
ជាមួយនឹងការទទួលបាន៥១ពិន្ទុក្នុងដៃ ភ្នំពេញក្រោនដែលស្ថិតក្រោមការដឹកនាំរបស់គ្រូបង្វឹកជនជាតិស្វ៊ីស លោក Sam Schweingruber កំពុងត្រៀមខ្លួនលើកពានប្រចាំរដូវកាលនេះ បើទោះបីជាការប្រកួតរបស់ពួកគេជាមួយចម្ការកៅស៊ូបឹងកេតនៅល្ងាចថ្ងៃអាទិត្យខាងមុខមិនទទួលបានលទ្ធផលល្អក៏ដោយ។ វាជាការទទួលតំណែងជើងឯកក្នុងក្របខណ្ឌកំពូលជាលើកទី៥របស់ភ្នំពេញក្រោន បើគិតចាប់តាំងពីក្លិបដ៏ជោគជ័យមួយនេះត្រូវបានបង្កើតនៅឆ្នាំ២០០១ មក។ ពានរង្វាន់ជើងឯកដែលភ្នំពេញក្រោនធ្លាប់ទទួលបានកន្លងមករួមមាន ក្នុងឆ្នាំ២០០២ ឆ្នាំ២០០៨ ឆ្នាំ២០១០ និងឆ្នាំ២០១១ ហើយកាលពីឆ្នាំ២០០៥ និងឆ្នាំ២០០៦ ពួកគេជាប់ចំណាត់ថ្នាក់លេខពីរ។
ក្រុមចម្ការកៅស៊ូបឹងកេតដែលតាមពីក្រោយភ្នំពេញក្រោនចំនួន៤ពិន្ទុត្រូវទទួលបានចំណាត់ថ្នាក់លេខពីរនារយៈពេល២រដូវកាលជាប់ៗគ្នា បើទោះបីជាលទ្ធផលនៃការប្រកួតបែបណាក៏ដោយ។ វាជាការខកចិត្តពីរលើកជាប់ៗគ្នាផងដែរសម្រាប់ក្រុមដែលមានមូលដ្ឋាននៅខេត្តកំពង់ចាមមួយនេះ បន្ទាប់ពីពួកគេដណ្តើមបានតំណែងជើងឯកលើកដំបូងកាលពីឆ្នាំ២០១២ ។
សម្រាប់តំណែងចំណាត់ថ្នាក់លេខបីគឺនៅមានការប្រទាញប្រទង់គ្នានៅឡើយរវាងក្រុមណាហ្គាខបនិងស្វាយរៀង។ ស្វាយរៀងដែលជាជើងឯកឆ្នាំចាស់ត្រូវការឈ្នះជាដាច់ខាតនាជំនួបជាមួយក្រសួងការ ពារជាតិនៅថ្ងៃសៅរ៍ដើម្បីបន្តដាក់សម្ពាធលើណាហ្គាខប។ ប៉ុន្តែជាមួយនឹងការមាន១ពិន្ទុលើសស្វាយ រៀង នោះក្រុមណាហ្គាខបអាចទទួលបានចំណាត់ថ្នាក់លេខបីយ៉ាងងាយស្រួល ដោយពួកគេត្រូវប្រកួតចុងក្រោយជាមួយAlbirex Niigata Phnom Penh ដែលជាក្រុមត្រូវធ្លាក់ទៅលេងវគ្គខ្វែងដើម្បីរក្សាខ្លួននៅក្នុងក្របខណ្ឌកំពូល។
Albirex Niigata Phnom Penh ដែលជាក្រុមបង្កើតឡើងដោយជនជាតិជប៉ុនហើយទទួលបានសិទ្ធិស្វ័យប្រវត្តិពីសហព័ន្ធកីឡាបាល់ទាត់កម្ពុជាដើម្បីលេងក្នុងក្របខណ្ឌកំពូលនោះអមជាមួយគិរីវង់សុខសែនជ័យត្រូវរង់ចាំអ៊ុតមើលក្រុមដែលឡើងពីក្របខណ្ឌក១របស់ក្រសួងអប់រំយុវជន និងកីឡា។
រូបមន្តដែលបានអនុវត្តកាលពីរដួវកាលមុនក្រុមពីរដែលទទួលបានពិន្ទុតិចជាងគេត្រូវប្រកួតខ្វែងជាមួយពីរក្រុមផ្សេងទៀតដែលជាម្ចាស់ជើងឯក និងជើងរងនៃក្របខណ្ឌក១របស់ក្រសួងអប់រំ យុវជន និងកីឡា។ការប្រកួតខ្វែងនេះគឺត្រូវស្វែងរកក្រុមដែលមានសមត្ថភាពពិតប្រកដចំនួនពីរក្រុមដើម្បីបង្គ្រប់នៅក្នុងលីកដែលបច្ចុប្បន្នមាន១២ក្រុម។
គិរីវង់សុខសែនជ័យរបស់ខេត្តតាកែវប្រឈមនឹងការខ្ទាតចេញពីក្របខណ្ឌកំពូលជាលើកដំបូងបើគិតចាប់តាំងពីឆ្នាំ២០០៧មកខណៈក្រៅពីភ្នំពេញក្រោនបឹងកេតណាហ្គាខបនិងស្វាយរៀងក្រុមដែលអាចរក្សាឈ្មោះបាននៅរដូវកាលក្រោយរួមមានភ្នំពេញត្រាយអាស៊ីអគ្គស្នងការដ្ឋាននគរបាលជាតិបៀលប្រាយយូណាយធូតអាស៊ីអឺរ៉ុបក្រសួងការពារជាតិនិងវេស្ទើន។
ខ្សែប្រយុទ្ធនីហ្សេរីយ៉ារបស់ស្វាយរៀង DzarmaBata រំពឹងទទួលតំណែងស្បែកជើងមាសតាមរយៈការស៊ុតបាល់បញ្ចូលទីចំនួន២២គ្រាប់ ខណៈគូប្រជែងសំខាន់របស់គេ គឺ Bisan George នៃក្លិបភ្នំពេញក្រោនដែលជាមិត្តរួមជាតិនីហ្សេរីយ៉ាដូចគ្នា រកបានចំនួន១៩គ្រាប់។
កាលពីរដូវកាលមុន ក្រៅពីឈ្នះពានរង្វាន់ជើងឯក ស្វាយរៀងដណ្តើមបានទាំងរង្វាន់ គ្រូបង្វឹកឆ្នើម កីឡាករឆ្នើម និងអ្នកចាំទីឆ្នើម ដោយនៅពេលនោះ ខ្សែប្រយុទ្ធ ឃួន ឡាបូរ៉ាវី ដណ្តើមបានស្បែកជើងមាស និងតួនាទីជាកី ឡាករឆ្នើមតាមរយៈការជួយឲ្យស្វាយរៀងលើកពានជាលើកដំបូង មុនពេលគេផ្ទេរទៅកាន់ក្លិបចម្ការកៅស៊ូបឹង កេត។
សម្រាប់ពានរង្វាន់ប្រចាំរដូវកាល ក្រុមជើងឯកត្រូវទទួលបានពាន និងមេដាយមាសអមដោយទឹកប្រាក់៦០លានរៀល ក្រុមលេខពីរបានមេដាយប្រាក់ អមដោយប្រាក់រង្វាន់៤៦លានរៀល ក្រុមលេខបីបានមេដាយសំរិទ្ធ និងប្រាក់រង្វាន់៣៦លានរៀល ខណៈក្រុមលេខបួនទទួលបាន៣០លានរៀល។
ក្នុងនាមជាក្រុមជើងឯកនារដូវកាលនេះ គេរំពឹងថាភ្នំពេញក្រោននឹងមានឱកាសបង្ហាញខ្លួននៅក្នុងការប្រកួតវគ្គជម្រុះនៃក្របខណ្ឌ AFC Cup ដែលជារូបមន្តថ្មីរបស់សហព័ន្ធកីឡាបាល់ទាត់ទ្វីបអាស៊ី និងដែលត្រូវដាក់ជំនួបពានរង្វាន់ AFC President’s Cup។ បន្ថែមពីលើនេះ ម្ចាស់ជើងឯក៥ជំនាន់នៅកម្ពុជាមួយនេះ ក៏នឹងត្រូវបង្ហាញខ្លួនផងដែរនៅក្នុងព្រឹត្តិការណ៍ Toyota Mekong Club Championship នៅក្នុងទីក្រុងហាណូយ ប្រទេសវៀតណាមនា ចុងខែតុលា ដោយមានការចូលរួមផងដែរពីក្រុមជើងឯកនៅប្រទេសឡាវ មីយ៉ាន់ម៉ា និងម្ចាស់ផ្ទះវៀតណាមផ្ទាល់៕
© រក្សាសិទ្ធិដោយ thmeythmey.com