កីឡាជាតិ
ជាតិ
កម្ពុជា នៅសល់តែកីឡាចំបាប់មួយប៉ុណ្ណោះ ជាក្ដីសង្ឃឹមនៅកីឡាអូឡាំពិកយុវជន
× ក្រុមកម្ពុជា នៅសល់តែកីឡាចំបាប់មួយប៉ុណ្ណោះ គ្រាន់អ៊ុតមើលក្រែងមានឱកាសដណ្ដើមមេដាយនៅក្នុងកម្មវិធីកីឡាអូឡាំពិកយុវជន (2nd Summer Youth Olympic Games) ដែលកំពុងរៀបចំនៅទីក្រុងណានជីង ប្រទេសចិនខណៈកីឡា២ផ្សេងទៀតអស់ឱកាសទៅហើយ។
ជាលទ្ធផល សម្រាប់កីឡាករ ចេង សុផា ផ្នែកកីឡាហែលទឹក ចម្ងាយ ៥០ ម៉ែត្រ សេរីបុរស បានជាប់ចំណាត់ថ្នាក់លេខ ៦ នៅក្នុងការប្រកួត Head 2 ក្នុងចំណោមកីឡាករ ៨ នាក់ ដោយប្រើថរវេលា ២៧,៨៨ វិនាទី។ ចំណែកកីឡាការិនី សុខា បញ្ញាវិរិយវតី ផ្នែកអត្តពលកម្ម រត់ល្បឿនលើផ្ទៃរាបចម្ងាយ ១០០ ម៉ែត្រ ជាប់ចំណាត់ថ្នាក់លេខ៦ ក្នុងចំណោមកីឡាករ ៨ នាក់ ដោយប្រើរយៈពេល ១៣:១១ វិនាទី។
លោក ញ៉ាន សុខវិសា ល ជានាយបេសកកម្ម នឹងដឹកនាំភាគីកម្ពុជា បានសរសេរនៅលើ ទំព័រហ្វេសប៊ុកខ្លួនថា ទោះជាកីឡាករការិនី សុខា បញ្ញាវិរិយវតី មិនបានជាប់ឈ្មោះក្នុងបញ្ជីដណ្ដើមបានមេដាយក៏ដោយ តែរូបគេអាចបំបែកកំណត់ត្រាចាស់របស់ខ្លួនដែលកាលពីមុនត្រឹមតែ ១៣:៥០ វិនាទី ប៉ុណ្ណោះ។
ដូច្នេះវិញ្ញាសាទាំង ២ គឺអស់ឱកាសក្នុងការប្រជែងយកមេដាយហើយ នៅសល់តែកីឡាការិនី ឌន ស្រីម៉ៅ ផ្នែកកីឡាចំបាប់សេរី ប្រភេទទម្ងន់ ៥២ គីឡូក្រាម ប៉ុណ្ណោះនៅសល់ឈ្មោះមិនទាន់ប្រកួត។ បើយោងតាមវេបសាយផ្លូវការរបស់កីឡាអូឡាំពិកយុវជនលើកទី២ នេះ កីឡាចំបាប់នឹងចាប់ប្រកួតនៅថ្ងៃទី ២៥ ដល់ ២៧ សីហា ខាងមុខ។
កីឡាអូឡាំពិកយុវជនលើកទី២ នេះបានដាក់កីឡាចំនួន ២៨ ប្រភេទ ដែលមានចំនួន ២២២ វិញ្ញាសាផ្សេងគ្នាឱ្យអត្តពលិកចំនួន ៣,៦០០ នាក់ មកប្រទេសជាសមាជិកចូលរួមចំនួន ២០១ ប្រទេសប្រកួតប្រជែង ចាប់ពីថ្ងៃទី ១៦ ដល់ ២៨ សីហា។
គិតត្រឹមពេលនេះ ជាបណ្ដោះអាសន្នក្រុមអត្តពលិកម្ចាស់ផ្ទះដណ្ដើមបានមេដាយច្រើនជាងគេ គឺសរុប ២៩ គ្រឿងដោយក្នុងនោះមាស ១៤ ប្រាក់ ៤ និង សំរឹទ្ធ ១១ គ្រឿង៕
© រក្សាសិទ្ធិដោយ thmeythmey.com