ជាតិ
បទវិភាគ
នយោបាយជាតិ
វត្តមានព្រះអង្គម្ចាស់ រណឫទ្ធិ និងលោក កែម ឡី ធ្វើអោយនយោបាយខ្មែរប្រែប្រួល!
× ភ្នំពេញ៖ ការយាងចូលធ្វើនយោបាយឡើងវិញរបស់សម្តេចក្រុមព្រះនរោត្តម រណឫទ្ធិ ជាពិសេស វត្តមានរបស់ព្រះអង្គជាព្រះប្រធានគណបក្សហ្វ៊ុនស៊ិនប៉ិចឡើងវិញនេះ នឹងធ្វើអោយទិដ្ឋភាពនយោបាយនៅក្នុងប្រទេសកម្ពុជាមានការប្រែប្រួល បើទោះបីជាគេគិតថា ប្រជាប្រិយភាពរបស់ព្រះអង្គបានធ្លាក់ចុះដល់កម្រិតទាបយ៉ាងណាក៏ដោយក្តី។
តើវត្តមានរបស់ព្រះអង្គម្ចាស់ នរោត្តម រណឫទ្ធិ និងលោក កែម ឡី អ្នកផ្តួចផ្តើមគំនិតបង្កើតគណបក្សមូលដ្ឋាននឹងធ្វើអោយទិដ្ឋភាពនយោបាយខ្មែរប្រែប្រួលយ៉ាងដូចម្តេច? តើវត្តមានរបស់ព្រះអង្គ និងលោក កែម ឡី នឹងជួយផ្តល់ទម្ងន់ដល់គណបក្សសង្គ្រោះជាតិ ឬក៏ជួយផ្តល់ទម្ងន់បន្ថែមទៀតដល់គណបក្សប្រជាជនកម្ពុជា? តើនេះជារបត់នយោបាយថ្មីលើវិថីចាស់មែនឬទេ?
កាលពី៨ឆ្នាំមុនពោល គឺនៅឆ្នាំ២០០៦ ព្រះអង្គម្ចាស់ នរោត្តម រណឫទ្ធិ ត្រូវបានគេធ្វើបក្សប្រហារទម្លាក់ព្រះអង្គពីព្រះប្រធានគណបក្សហ្វ៊ុនស៊ិនប៉ិចដែលបង្កើតឡើងដោយសម្តេចព្រះបាទនរោត្តម សីហនុ អតីតព្រះមហាវីរក្សត្រនៃព្រះរាជាណាចក្រកម្ពុជា។ ៨ឆ្នាំក្រោយមក ព្រះអង្គត្រូវបាន«ដៃគូជម្លោះ»យាងអោយធ្វើជាព្រះប្រធានគណបក្សហ្វ៊ុនស៊ិនប៉ិចឡើងវិញ។
លោក ញឹក ប៊ុនឆៃ អគ្គលេខាធិការនៃគណបក្សហ្វ៊ុនស៊ិនប៉ិច ដែលធ្លាប់មានបញ្ហាជាមួយសម្តេចក្រុមព្រះនរោត្តម រណឫទ្ធិ បានបញ្ជាក់ថា គ្រប់រឿងអតីតកាលត្រូវតែ«បំភ្លេចចោល»។ លោកសុខចិត្តលះបង់គ្រប់យ៉ា់ងដើម្បីធ្វើយ៉ាងដូចម្តេចអោយតែគណបក្សហ្វ៊ុនស៊ិនប៉ិចទទួលបានអាសនៈនៅក្នុងរដ្ឋសភាជាតិឡើងវិញ។
ការសម្របសម្រួលជម្លោះនយោបាយរវាងមន្ត្រីជាន់ខ្ពស់នៃគណបក្សហ្វ៊ុនស៊ិនប៉ិច និងក្រុមព្រះអង្គម្ចាស់ នរោត្តម រណឫទ្ធិ បានធ្វើឡើងបន្ទាប់ពីថ្នាក់ដឹកនាំជាន់ខ្ពស់យល់ឃើញថា បើគ្មានការរួបរួមគណបក្សរាជានិយមឡើងវិញទេនោះ ស្រមោលគណបក្សហ្វ៊ុនស៊ិនប៉ិចនឹងកាន់តែរលត់បាត់បង់បន្តិចម្តងៗពីឆាកនយោយខ្មែរ។ និយាយបែបផ្សេង មានន័យថា សាមគ្គីរស់ បែកបាក់សាមគ្តីស្លាប់សម្រាប់គណបក្សហ្វ៊ុនស៊ិនប៉ិច និងសម្រាប់គណបក្សថ្មីរបស់ព្រះអង្គម្ចាស់ នរោត្តម រណឫទ្ធិ។
ព្រះអង្គម្ចាស់ នរោត្តម រណឫទ្ធិ ធ្លាប់មានប្រជាប្រិយភាពខ្លាំងក្នុងអំឡុងទសវត្សរ៍៩០ដែលអនុញ្ញាតអោយគណបក្សហ្វ៊ុនស៊ិនប៉ិចឈ្នះឆ្នោត ហើយព្រះអង្គក្លាយជានាយករដ្ឋមន្ត្រីទី១ ។
ក្រោយមក ដោយសារជម្លោះផ្ទៃក្នុងគណបក្ស និងដោយសារបរិយាកាសនយោបាយខាងក្រៅគណបក្សដាក់សម្ពាធខ្លាំងពេក ព្រះអង្គម្ចាស់ រណឫទ្ធិ ត្រូវបានគេបង្ខំអោយយាងចេញពីគណបក្សហ្វ៊ុនស៊ិនប៉ិច។ ចាប់ពីពេលនោះមក ព្រះអង្គបានបង្កើតគណបក្សថ្មីរបស់ព្រះអង្គផ្ទាល់ តែពុំទទួលបានលទ្ធផលអ្វីទាំងអស់ដោយសារប្រជាប្រិយភាពរបស់ព្រះអង្គបានធ្លាក់ចុះយ៉ាងខ្លាំង។
តើនៅពេលនេះឆ្នាំ២០១៥ វត្តមានជាថ្មីរបស់ព្រះអង្គមកដឹកនាំគណបក្សហ្វ៊ុនស៊ិនប៉ិចឡើងវិញ និងវត្តមានលោក កែម ឡី នឹងធ្វើអោយទិដ្ឋភាពនយោបាយខ្មែរមានការប្រែប្រួលដូចម្តេចខ្លះ? តើវត្តមានរបស់ព្រះអង្គ និងលោក កែម ឡី នឹងជួយផ្តល់ទម្ងន់ដល់គណបក្សសង្គ្រោះជាតិ ឬក៏ជួយផ្តល់ទម្ងន់ដល់គណបក្សប្រជាជនកម្ពុជា? តើនេះជារបត់នយោបាយថ្មីលើវិថីចាស់មែនឬទេ?
តាមពិតទៅ ការយាងត្រឡប់ចូលឆាកនយោបាយជាថ្មី និងជាពិសេស ការយាងចូលធ្វើជាប្រធានគណបក្សហ្វ៊ុនស៊ិនប៉ិចឡើងវិញនេះ គឺជារបត់នយោបាយថ្មីលើវិថីចាស់តែប៉ុណ្ណោះ។ របត់នយោបាយថ្មីលើវិថីចាស់ ពីព្រោះ ទិដ្ឋភាពនយោបាយហាក់បីដូចជាថ្មីបន្តិចមែន ប៉ុន្តែដៃគូប្រជែងនយោបាយចាស់នៅដដែល គឺលោកនាយករដ្ឋមន្ត្រី ហ៊ុន សែន លោក សម រង្ស៊ី និងលោក កឹម សុខា។ តែទោះជាយ៉ាងណាក៏ដោយ ក៏គេសង្កេតឃើញមានចលនានយោបាយថ្មីមួយទៀត គឺក្រុមអង្គការសង្គមស៊ីវិលដែលមានលោក លោក កែម ឡី អ្នកស្រាវជ្រាវឯករាជ្យ និងលោក យ៉ង់ សាំងកុមា ប្រធានអង្គការសេដាក់ ជាអ្នកដឹកនាំ។
ឆ្លើយទៅសំណួរដែលសួថា តើវត្តមានរបស់ព្រះអង្គម្ចាស់ រណឫទ្ធិ និងលោក កែម ឡី នឹងជួយផ្តល់ទម្ងន់ដល់គណបក្សសង្គ្រោះជាតិ ឬក៏ជួយទម្ងន់ដល់គណបក្សប្រជាជនកម្ពុជានោះ?
អ្នកវិភាគមួយចំនួនបានអត្ថាធិប្បាយថា វត្តមានថ្មីរបស់ព្រះអង្គនឹងអាចធ្វើអោយគណបក្សហ្វ៊ុនស៊ិនប៉ិចមានប្រជាប្រិយភាពឡើងវិញខ្លះ ពោល គឺគណបក្សមួយនេះអាចនឹងស្វែងរកកៅអីឡើងវិញបានខ្លះនៅក្នុងការបោះឆ្នោតឃុំសង្កាត់នៅឆ្នាំ២០១៧ និងការបោះឆ្នោតជាតិឆ្នាំ២០១៨ ។
ដោយសារតែការមិនសប្បាយចិត្តនឹងគណបក្សហ្វ៊ុនស៊ិនប៉ិចបែកបាក់កាលពីអតីតកាល អ្នកធ្លាប់គាំទ្រគណបក្សហ្វ៊ុនស៊ិនប៉ិច និងគណបក្សព្រះអង្គម្ចាស់ រណឫទ្ធិ មួយចំនួនបានសម្រេចចិត្តបោះឆ្នោតជូនគណបក្សសង្គ្រោះជាតិ ហើយមួយចំនួនតូចទៀតនៅបន្តបោះឆ្នោតអោយគណបក្សហ្វ៊ុនស៊ិនប៉ិច ឬគណបក្សព្រះអង្គម្ចាស់ រណឫទ្ធិ កាលពីការបោះឆ្នោតនាពេលកន្លងមក។ ដោយសារការបែកសំឡេង គណបក្ស«បងប្អូនជម្លោះទាំងពីរ»គ្មានទទួលបានអាសនៈ សូម្បីតែ១កៅអីនៅរដ្ឋសភាជាតិសម្រាប់អាណត្តិទី៥នេះ។
ដូច្នេះ ក្រោយការរួបរួមគ្នានេះទៅ គេសង្ឃឹមថា គណបក្សហ្វ៊ុនស៊ិនប៉ិច អាចទាញយកសំឡេងដែលបាត់បង់ពីគណបក្សសង្គ្រោះជាតិមកវិញបានក្នុងមួយចំនួនណាមួយ។ មិនត្រឹមតែប៉ុណ្ណោះ ស្របពេលដែលគណបក្សសង្គ្រោះជាតិ កំពុងប្រឈមនឹងបញ្ហាផ្ទៃក្នុងខ្លះផង ពេលនោះ អ្នកគាំទ្រមួយចំនួនចាប់ផ្តើមពិចារណាថា តើពួកគេត្រូវត្រឡប់ទៅកាន់គណបក្សហ្វ៊ុនស៊ិនប៉ិច និងគណបក្សព្រះអង្គម្ចាស់ នរោត្តម រណឫទ្ធិ ឡើងវិញ ឬក៏ត្រូវទៅចាប់យកគណបក្សមូលដ្ឋានថ្មីរបស់លោក កែម ឡី។
វត្តមានរបស់ព្រះអង្គម្ចាស់ រណឫទ្ធិ ជារឿងមួយ។ ប៉ុន្តែ វត្តមាននៃគណបក្សមូលដ្ឋានរបស់លោក កែម ឡី ក៏នឹងអាចទាញសមាជិកមួយផ្នែកបន្ថែមទៀតពីគណបក្សសង្គ្រោះជាតិ។
សរុបសេចក្តីមកវិញ វត្តមានគណបក្សមូលដ្ឋានរបស់លោក កែម ឡី និងវត្តមានជាថ្មីរបស់ព្រះអង្គម្ចាស់នរោត្តម រណឫទ្ធិ ក្នុងនាមជាព្រះប្រធានគណបក្សហ្វ៊ុនស៊ិនប៉ិច ពិតជានឹងធ្វើអោយប៉ះពាល់ប្រជាប្រិយភាពគណបក្សសង្គ្រោះជាតិខ្លះ ហើយវានឹងផ្តល់ទម្ងន់បន្ថែមទៀតជូនដល់គណបក្សប្រជាជនកម្ពុជាដែលបានកាន់កាប់អំណាចអស់រយៈពេលជាង៣០ឆ្នាំមកហើយ។
តើគណបក្សណាជាអ្នកឈ្នះឆ្នោតនៅឆ្នាំ២០១៧ និង២០១៨នោះ? នេះជាសំណួរដែលអ្នកបោះឆ្នោតជាអ្នកសម្រេច៕
© រក្សាសិទ្ធិដោយ thmeythmey.com