ជាតិ
នយោបាយជាតិ
ស្ថានភាពនយោបាយ បញ្ហាច្បាប់ នៅកម្ពុជា កំពុងស្ថិតក្នុងក្រសែភ្នែកវិនិយោគិនធំៗអាមេរិក
× ក្រុមអ្នកវិនិយោគធំៗរបស់អាមេរិក កំពុងពិនិត្យមើលស្ថានភាពនយោបាយ និងបញ្ហាច្បាប់នៅក្នុងប្រទេសកម្ពុជា មុននឹងពួកគេសម្រេចចិត្តធ្វើវិនិយោគនៅក្នុងប្រទេសនេះ។ នេះបើតាមប្រសាសន៍របស់រដ្ឋលេខាធិការក្រសួងការបរទេសកម្ពុជា លោកអ៊ុច បូររិទ្ធិ ក្រោយពីជួបពិភាក្សាជាមួយលោកDaniel Russel ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចកាអាស៊ីបូព៌ា និងប៉ាស៊ីហ្វិក នៅទីស្តីការក្រសួងការបរទេសនៅថ្ងៃអង្គារនេះ។
ស្ថានភាពនយោបាយ ស្ថេរភាពសង្គម និងបញ្ហាផ្លូវច្បាប់នៅកម្ពុជា កំពុងស្ថិតនៅក្នុងក្រសែភ្នែករបស់វិនិយោគិនធំៗរបស់ប្រទេសមហាអំណាចសេដ្ឋកិច្ចទី ១ ពិភពលោក ដើម្បីថ្លឹងថ្លែង ពិចារណា មុននឹងពួកគេសម្រេចចិត្តបោះលុយមកវិនិយោគនៅក្នុងប្រទេសក្រីក្រមួយនេះ។ បន្ទាប់ពីជួបជាមួយលោក Daniel Russel ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចកាអាស៊ីបូព៌ា និងប៉ាស៊ីហ្វិក នៅព្រឹកមិញនេះ លោក អ៊ុច បូររិទ្ធិ រដ្ឋលេខាក្រសួងមហាផ្ទៃ បានស្រង់សម្តីលោក Daniel Russel ប្រាប់អ្នកកាសែតថា រដ្ឋាភិបាលអាមេរិកមានបំណង ពង្រឹងទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ បន្ថែមទៀតនៅក្នុងប្រទេសកម្ពុជា។ លោកថា អ្នកវិនិយោគរបស់អាមេរិក កំពុងសម្លឹងមើលមកកម្ពុជាយ៉ាងយកចិត្តទុកដាក់។
លោករដ្ឋលេខាបញ្ជាក់ដូច្នេះថា៖ «ក្រុមហ៊ុនវិនិយោគធំៗអាមេរិកកំពុងពិនិត្យ និងក្រឡេកមើលមកកម្ពុជាយើង ពីព្រោះការផ្លាស់ប្តូរពាណិជ្ចកម្ម និងសេដ្ឋកិច្ចរវាងកម្ពុជានិងអាមេរិក នៅមានកម្រិតតិចនៅឡើយបច្ចុប្បន្ន ។ លោកថា ដើម្បីធ្វើបញ្ហានេះបាន សំខាន់គឺបញ្ហាស្ថានភាពនយោបាយកម្ពុជា និងស្ថេរភាពក្នុងការអនុវត្តវិនិយោគទុនក្រុមហ៊ុនធំៗអាមេរិកនៅកម្ពុជា។ ទន្ទឹមនឹងនេះ បញ្ហាទំនុកចិត្ត ដែលសំខាន់លើបញ្ហាច្បាប់ ក្នុងការការពារវិនិយោគទាំងនោះតែម្តង» ។
លោក អ៊ុច បូររិទ្ធិ បានបន្តស្រង់សម្តីឧបការីរូបនោះទៀតថា នៅពេលដែលក្រុមហ៊ុនអាមេរិកធំៗមកវិនិយោគនៅកម្ពុជា មិនមែនមកត្រឹមតែវិនិយោគដើម្បីចំណេញតែម្យ៉ាងនោះទេ តែក្រុមហ៊ុនទាំងនោះមានទិសដៅសំខាន់ ចង់បង្កើតការងារដល់ពលរដ្ឋកម្ពុជា។ ជាងនេះទៅទៀត ក្រុមហ៊ុនអាមេរិក ក៏នឹងនាំមកនូវ បច្ចេកវិទ្យាទំនើបៗ ដើម្បីបង្ហាត់ដល់បុគ្គលិកកម្ពុជាផងដែរ។
ដោយឡែកក្រៅពីបញ្ហាវិនិយោគ នៅក្នុងជំនួបនោះភាគីកម្ពុជា និងអាមេរិក ក៏បានពិភាក្សាទៅលើបញ្ហាអប់រំ ជាពិសេសគឺបញ្ហាអាហារូបករណ៍តែម្តង។ លោក អ៊ុច បូររិទ្ធិ ក៏បានស្នើឲ្យរដ្ឋាភិបាលអាមេរិកផ្តល់អាហារូបករណ៍បន្ថែមទៀតដល់និស្សិតកម្ពុជាផងដែរ។
ជាងនេះទៅទៀត បញ្ហាអ្នកភូមិបឹងកក់ និងការចាប់ខ្លួនសកម្មជនបក្សប្រឆាំងផងនោះ ក៏លោក Daniel Russel ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចកាអាស៊ីបូព៌ា និងប៉ាស៊ីហ្វិក លើកមកជជែកជាមួយលោក អ៊ុច បូររិទ្ធិ ដែរ ។ លោក អ៊ុច បូររិទ្ធិ បានថ្លែងការពារខ្លួនប្រាប់ឧបការីរូបនោះថា រដ្ឋាភិបាលកម្ពុជាធ្វើអ្វីទៅតាមច្បាប់តែប៉ុណ្ណោះ ហើយការធ្វើបាតុកម្មរបស់អ្នកភូមិបឹងកក់ និងបក្សប្រឆាំងកន្លងមក ធ្វើឲ្យប៉ះពាល់ដល់សណ្តាប់ធ្នាប់សាធារណៈ ជាពិសេសគឺបញ្ហាចរាចរណ៍តែម្តង៕
© រក្សាសិទ្ធិដោយ thmeythmey.com