ជាតិ
បទវិភាគ
គណបក្សប្រជាជនត្រូវការបញ្ចូលឈាមថ្មី!
× គណបក្សប្រជាជនកម្ពុជាដែលសម្បូរដោយមន្ត្រីវ័យចំណាស់នោះមានគម្រោងបំពេញបន្ថែមសមាជិកគណៈកម្មាធិការកណ្តាលចំនួនជាង ១០០ នាក់ទៀតបន្ថែមលើសមាជិកជាង ២៦០ នាក់ដែលមានស្រាប់។ ក្នុងចំណោមនោះយុវជនត្រូវបានគេបញ្ចូលទៅក្នុងក្រុមដឹកនាំកំពូលរបស់គណបក្ស។ ការបោះឆ្នោតបំពេញបន្ថែមនឹងធ្វើឡើងនៅក្នុងមហាសន្និបាតវិសាមញ្ញតំណាងទូទាំងប្រទេសដែលបើកធ្វើរយៈពេលបីថ្ងៃចាប់ពីថ្ងៃ៣០មករាតទៅ។
មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជាពេលនេះគឺជាពេលវេលាដ៏សំខាន់ណាស់សម្រាប់អនាគតគណបក្ស។ ក្នុងចំណោមកំណែទម្រង់ស៊ីជម្រៅជាច្រើន គណបក្សកាន់អំណាចដ៏ចំណាស់នេះមានគម្រោងបោះឆ្នោតជ្រើសរើសក្រុមយុវជនបញ្ចូលទៅក្នុងក្បាលម៉ាស៊ីនដឹកនាំបក្ស។ តាមគម្រោងគណបក្សនេះគ្រោងជ្រើសរើសសមាជិកគណៈកម្មាធិការកណ្តាលថ្មីជាង ១០០ នាក់ទៀតក្នុងនោះភាគច្រើនជាយុវជនដែលជាឈាមថ្មីរបស់គណបក្ស។
ជាការពិតណាស់ តួនាទីយុវជនបានស្តែងឡើងកាន់តែសំខាន់ក្នុងឆាកនយោបាយជាពិសេសចាប់តាំងពីការបោះឆ្នោតសភាលើកចុងក្រោយកាលពីថ្ងៃទី ២៨ កក្កដា ឆ្នាំ ២០១៣ មក។ យុវជនដែលកាលពីមុនមិនសូវអើពើសោះនឹងរឿងនយោបាយស្រាប់តែបានបង្ហាញភាពសកម្មយ៉ាងខ្លាំងក្នុងឆាកនយោបាយ។ ដោយមើលឃើញសន្ទុះនេះហើយបានជាទាំងគណបក្សកាន់អំណាច ទាំងបក្សប្រឆាំងសុទ្ធតែបានបញ្ចេញក្រុមយុវជននិងបានកសាងបណ្តាញយុវជនរៀងៗខ្លួន។
បន្ទាប់ពីការបោះឆ្នោតអាណត្តិទី៥នេះ មានបេក្ខជនយុវជនមួយចំនួនបានក្លាយជាតំណាងរាស្ត្រ ជារដ្ឋមន្ត្រី ឬជាមន្ត្រីសំខាន់ៗផ្សេងទៀត។ សុភាសិតបុរាណខ្មែរបានពោលថា«ខ្ញីចាស់កាន់តែហិរ» មានន័យថា មនុស្សកាន់តែចាស់កាន់តែមានបទពិសោធប្រកបដោយភាពចាស់ទុំដែលឆាកនយោបាយត្រូវការជាចាំបាច់។ ប៉ុន្តែ វ័យចំណាស់ខ្លាំងពេកក៏មិនអាចឲ្យពួកគេបំពេញតួនាទីរបស់ខ្លួនបានល្អដែរ។
ក្នុងបណ្តាប្រទេសជឿនលឿននៅលោកខាងលិច ទន្ទឹមនឹងសមត្ថភាព គេក៏ផ្តល់តម្លៃយ៉ាងខ្លាំងដល់សុខភាពនិងថាមពលរបស់តួអង្គនយោបាយដែរពីព្រោះភាពទ្រុឌទ្រោមនៃសុខភាព និងរាងកាយមិនអាចឲ្យពួកគេបំពេញតួនាទីរបស់ខ្លួនបានពេញលេញឡើយ។ ក្នុងបរិបទនេះ អ្នកនយោបាយ ឬមន្ត្រីមុខងារសាធារណៈដែលមានវ័យចំណាស់ខ្លាំងតែងប្រញាប់លាឈប់ពីមុខនាទីដើម្បីទុកឲ្យអ្នកដែលមានកម្លាំងពលំមាំមួនបន្តវេនម្តង។
ប៉ុន្តែ នៅកម្ពុជា អ្នកដែលមានតួនាទីទោះជាក្នុងមុខងារសាធារណៈក្តី ឫមុខងារនយោបាយក្តី ច្រើនតែព្យាយាមពន្យារអាយុធ្វើការតាមគ្រប់រូបភាពដែលអាចធ្វើទៅបានបើទោះបីជាខ្លួនមានវ័យចាស់ជរា និងសុខភាពមិនសូវមាំទាំក៏ដោយ។ វត្តមានរបស់មន្ត្រីវ័យចំណាស់ជាច្រើននៅក្នុងស្ថាប័នជាតិកំពូលៗ គឺជាឧទាហរណ៍ស្រាប់។ គណបក្សប្រជាជនកម្ពុជាដែលកំពុងកាន់អំណាចត្រូវគេមើលឃើញថា សម្បូរដោយមន្ត្រីដែលមានវ័យចំណាស់ច្រើនជាងគេ។ មន្ត្រីខ្លះចាស់រហូតធ្វើការលែងកើតទៅហើយក៏មិនព្រមឈប់។
យ៉ាងណាក៏ដោយ ឥឡូវនេះ ដំណាក់កាលនៃការបន្តវេនបានឈានមកដល់ហើយពោលគឺតួនាទីយុវជនត្រូវបានគណបក្សនីមួយៗលើកមកនិយាយ។ ប៉ុន្តែ អ្នកដែលចេញមុខបន្តវេនមុនគេគឺជាយុវជនដែលចេញពីក្រុមគ្រួសារមន្ត្រីជាន់ខ្ពស់។ នេះសបញ្ជាក់ឲ្យឃើញថា នយោបាយ«ទំពាំងស្នងឫស្សី»កំពុងប្រព្រឹត្តទៅដោយចង្អៀតនិងប្រយ័ត្នប្រយែងនៅឡើយជាពិសេសនៅក្នុងគណបក្សប្រជាជនកម្ពុជា។ ប្រយ័ត្នពីព្រោះថា ការតភ្ជាប់ជំនាន់មនុស្សពីវ័យចំណាស់ទៅយុវជនគឺជាបញ្ហាធំធេងមួយសម្រាប់ប្រទេសកម្ពុជាបច្ចុប្បន្ន។
ជាក់ស្តែង បន្ទាប់ពីមន្ត្រីវ័យក្មេងមួយចំនួនមានវត្តមានក្នុងក្រសួងនានាមក ការប្រែប្រួលបានកើតឡើងគួរឲ្យកត់សម្គាល់។ ប៉ុន្តែ ពួកគេបានពើបប្រទះនឹងឧបសគ្គដោយសារតែផ្នត់គំនិតអភិរក្សហួសសម័យរបស់មន្ត្រីវ័យចំណាស់មួយចំនួន។ ការប៉ះទង្គិចគ្នាក៏បានកើតឡើងមិនស្ទើរដែរ។ បញ្ហានេះអាចបញ្ជាក់បានពីការប្រយ័ត្នប្រយែងរបស់គណបក្សប្រជាជនកម្ពុជាក្នុងការបញ្ចូលឈាមថ្មីទៅក្នុងបក្ស។
ប៉ុន្តែ ការវិវឌ្ឍនយោបាយចុងក្រោយនេះ បង្ហាញថា យុទ្ធសាស្ត្ររបស់មន្ត្រីវ័យចំណាស់ដើរលែងទៀតសភាពការណ៍ទៀតហើយ។ ដូច្នេះ វាច្បាស់ណាស់ថា គណបក្សប្រជាជនកម្ពុជាត្រូវតែបញ្ចូលឈាមថ្មីដែលជាយុវជន ហើយមន្ត្រីវ័យចំណាស់គួរតែទុកឱកាសឲ្យយុវជនធ្វើការឲ្យបានច្រើនតាមដែលអាចធ្វើបាន។
យ៉ាងក៏ដោយ យុវជនគួរតែដើតួនាទីក្នុងនាមជាអ្នកធ្វើឲ្យមានការផ្លាស់ប្តូរប្រកបដោយវិជ្ជមានពោលគឺការផ្លាស់ប្តូរសង្គមទៅរកភាពជឿនលឿនជាងសម័យកាលនៃឪពុកម្តាយរបស់ខ្លួន។ គណបក្សប្រជាជនកម្ពុជាត្រូវការកម្លាំងយុវជនជាចាំបាច់។ ដល់ពេលហើយដែលគណបក្សនេះត្រូវគិតគូរពីការផ្ទេរសិទ្ធិ អំណាចទៅឲ្យមនុស្សជំនាន់ក្រោយ។ ប៉ុន្តែ ការបន្តវេនតែក្រុមគ្រួសាររបស់ខ្លួននៅមិនទាន់គ្រប់គ្រាន់ទេ។ ឈាមថ្មីគឺត្រូវតែជាឈាមដែលមានគំនិត និងទស្សនៈថ្មីដើម្បីបម្រើប្រយោជន៍ប្រទេសជាតិនិងប្រជាជន៕
© រក្សាសិទ្ធិដោយ thmeythmey.com