ជាតិ
សង្គមជាតិ
លោក ហង់ ជួន ណារ៉ុន ដាក់បញ្ជាឲ្យមន្ត្រីរដ្ឋបាលធ្វើការ៨ម៉ោងក្នុង១ថ្ងៃ
× បន្ទាប់ពីបានណែនាំដល់ថ្នាក់ដឹកនាំគ្រប់អង្គភាពឲ្យរៀបចំបញ្ជីវត្តមានប្រចាំថ្ងៃរបស់មន្ត្រីរាជការ លោករដ្ឋមន្ត្រីក្រសួងអប់រំ យុវជន និងកីឡា ហង់ ជួន ណារ៉ុន បានដាក់កំហិតមួយទៀតដល់ថ្នាក់ដឹកនាំក្រោមឱវាទទាំងនោះ ក្នុងការកំណត់រយៈពេលបម្រើការងារប្រចាំថ្ងៃរបស់មន្ត្រី។
«មន្ត្រីរដ្ឋបាលអប់រំភាគច្រើនបម្រើការងារនៅតាមអង្គភាពថ្នាក់ជាតិ និងក្រោមជាតិបានខិតខំបំពេញការងារប្រកបដោយស្មារតីទទួលខុសត្រូវខ្ពស់ក្នុងការគោរពតាមការកំណត់រយៈពេលបម្រើការងារប្រចាំសប្តាហ៍។ ទន្ទឹមនឹងនេះ ក្រសួងបានសង្កេតឃើញថា មន្ត្រីរដ្ឋបាលមួយចំនួនតូចនៅតែមិនទាន់បានគោរពតាមការកំណត់រយៈពេលបម្រើការងារក្នុងរយៈពេល៨ម៉ោងក្នុងមួយថ្ងៃ និង៥ថ្ងៃក្នុងមួយសប្តាហ៍ ដោយគិតពីថ្ងៃចន្ទ ដល់ថ្ងៃសុក្រ»។ នេះជាការលើកឡើងរបស់លោក ហង់ ជួនណារ៉ុន។
ក្នុងលិខិតចុះថ្ងៃទី២៦ ខែមករា ឆ្នាំ២០១៥ដដែល លោករដ្ឋមន្ត្រីអប់រំ បានដាក់កំហិតដល់មន្ត្រីរដ្ឋបាលឲ្យចូលធ្វើការពេលព្រឹកចាប់ពីម៉ោង៧ដល់ម៉ោង១១និង៣០នាទី និងពេលល្ងាចចាប់ពីម៉ោង១៤ ដល់ម៉ោង១៧ និង៣០នាទី។ លក្ខខណ្ឌអនុគ្រោះ ក៏មានផងដែរចំពោះមន្ត្រីរដ្ឋបាលអប់រំជាស្ត្រី ដែលមានកូនអាយុក្រោម១ឆ្នាំ ដោយពួកគាត់មានសិទ្ធិចេញធ្វើការមួយម៉ោងមុនពេលកំណត់ក្នុងមួយថ្ងៃ។
សូមបញ្ជាក់ផងដែរថា តាមរយៈលិខិតមួយចុះកាលពីថ្ងៃទី១៤ ខែមករា លោក ហង់ ជួន ណារ៉ុនបានកោតសរសើរមន្ត្រីក្រោមឱវាទដែលអនុវត្តតាមវិធានការកំណែទម្រង់វិស័យអប់រំក្នុងឆ្នាំ២០១៤ហើយលោកបានណែនាំមន្ត្រីរបស់ខ្លួនបន្តការអនុវត្តបន្ថែមទៀតដើម្បីឆ្លើយតបទៅនឹងគោលការណ៍របស់រដ្ឋាភិបាលក្នុងការលើកទឹកចិត្តមន្ត្រីរាជការតាមរយៈការដំឡើងប្រាក់ខែជាបន្តបន្ទាប់។
ទាក់ទងនឹងការពង្រឹងការអនុវត្តគោលការណ៍ស្តីពីការគ្រប់មន្ត្រីរាជការលោករដ្ឋមន្ត្រីបានដាក់បញ្ជាទៅគ្រប់អង្គភាពត្រូវរៀបចំបញ្ជីវត្តមានប្រចាំថ្ងៃរបស់មន្ត្រីរាជការណ៍និងបូកសរុបធ្វើរបាយការណ៍ផ្ញើទៅនាយកដ្ឋានបុគ្គលិកជារៀងរាល់ដំណាច់ខែនីមួយៗ ។
ចំពោះករណីមន្ត្រីរាជការអសកម្មការងារ លោក ហង់ ជួន ណារ៉ុនណែនាំឲ្យប្រធានអង្គភាពសាកសួរឲ្យបានច្បាស់លាស់ដោយផ្តល់ជម្រើសចូលបម្រើការងារវិញ ឬសុំនៅទំនេរដោយគ្មានបៀវត្ស។ប្រសិនបើសាមីខ្លួនមិនបានផ្តល់ជម្រើសណាមួយច្បាស់លាស់ហើយបន្តអសកម្មការងារបុគ្គលនោះត្រូវស្ថិតក្នុងភាពទំនេរគ្មានបៀវត្យដោយអនុវត្តតាមវិធានការដែលមានចែងក្នុងជំពូកទី២ មាត្រា២៣នៃអនុក្រឹត្យ ចុះថ្ងៃទី១៩ ខែតុលា ឆ្នាំ១៩៩៥ ៕
© រក្សាសិទ្ធិដោយ thmeythmey.com