ជាតិ
នយោបាយជាតិ
Comfrel ៖ រយៈពេល១ឆ្នាំ រដ្ឋាភិបាលសម្រេចនយោបាយ ៦ចំណុច ចំណោម ១៦ចំណុច
× ភ្នំពេញ៖ នៅក្នុងរយៈពេលមួយឆ្នាំដំបូង រដ្ឋាភិបាល នីតិកាលទី៥ ដែលដឹកនាំដោយគណបក្ស ប្រជាជនកម្ពុជា បានសម្រេចពេញលេញក្នុងការអនុវត្តគោលនយោបាយចំនួន ៦ចំណុច ក្នុងចំណោមគោលនយោបាយ ១៦ចំណុច ស្មើនឹងជាង ៣៧ភាគរយ។ នេះបើយោង តាមរបាយការណ៍ស្តីពី ការឃ្លាំមើល និងការផ្តល់ពិន្ទុរបស់អង្គការ Comfrel។
រដ្ឋាភិបាល នីតិកាលទី៥ បានអនុវត្តន៍សម្រេចគោលនយោបាយចំនួន៦ ក្នុងចំណោម ១៦ ចំណុច ដែលជាគោលនយោបាយមានសូចនាករច្បាស់លាស់។ គោលនយោបាយដែលមាន សូចនាករច្បាស់លាស់ទាំងនោះ រួមមាន កំណើនសេដ្ឋកិច្ចចំនួន ៧ភាគរយក្នុងមួយឆ្នាំ ការ កាត់បន្ថយភាពក្រីក្រក្នុងអត្រា ១ភាគរយក្នុងមួយឆ្នាំ ការបញ្ឈប់ការផ្តល់ដីសម្បទានសេដ្ឋកិច្ច ការកែលម្អផ្លូវលំជនបទជាជំហានៗពីផ្លូវក្រាលគ្រួសក្រហមទៅជាផ្លូវក្រាលកៅស៊ូ ឬផ្លូវបេតុង ការរៀបចំគោលនយោបាយដឹកជញ្ជូនទីក្រុង និងគោលដៅទាក់ទាញទេសចរណ៍បរទេស។
ជាមួយគ្នានេះដែរ អង្គការ ខុមហ្វ្រែល (Comfrel) ក៏បានធ្វើការស្រង់មតិដាក់ពិន្ទុលើគោល នយោបាយរបស់រដ្ឋាភិបាលពីសាធារណជនជាង ៣០០នាក់ ដែលរស់នៅក្នុងរាជធានីភ្នំពេញ និងខេត្តសៀមរាបផងដែរ។
នៅក្នុងរបាយការណ៍ស្តីពី ការឃ្លាំមើល និងការផ្តល់ពិន្ទុលើលទ្ធផលនៃការ បំពេញ ឬអនុវត្តន៍គោលនយោបាយរបស់រាជរដ្ឋាភិបាលនីតិកាលទី៥ ឆ្នាំទី១នោះ បានបង្ហាញថា ពលរដ្ឋជាង ៤០ភាគរយ បានពេញចិត្ត និងជាង ៦០ភាគរយ មិនពេញចិត្តទៅនឹងការអនុវត្តន៍ គោលនយោបាយ ៣៣ចំណុចរបស់រដ្ឋាភិបាល ក្នុងរយៈពេលមួយឆ្នាំកន្លងមក។
ខុមហ្វ្រែល បង្ហាញថា គោលនយោបាយអភិវឌ្ឍន៍លើវិស័យអប់រំ វិស័យសុខាភិបាល ការងារ វប្បធម៌ និងសង្គមកិច្ច ត្រូវបានប្រជាពលរដ្ឋពេញចិត្តជាង ៥០ភាគរយ ។ ចំណែក ពលរដ្ឋជាង ៥០ភាគរយទៀត ខុមហ្វ្រែល បានបង្ហាញឲ្យឃើញថា ពលរដ្ឋបានដាក់ពិន្ទុមិនពេញចិត្តទៅ នឹងការចំណាយថវិកាជាតិដែលគ្រោងចំណាយឆ្នាំ ២០១៤ ជាង ៣ពាន់លានដុល្លារអាមេរិក លើវិស័យសង្គមកិច្ច វិស័យការពារជាតិ និងសន្តិសុខ វិស័យសេដ្ឋកិច្ច និងវិស័យរដ្ឋបាលទូទៅ។
ជុំវិញរបាយការណ៍ដាក់ពិន្ទុនេះ លោក សៀន ប៊ុនរិទ្ធ មន្ត្រីផ្នែកអង្កេតរបស់អង្គការខុមហ្វ្រែល បានឲ្យដឹងថា របាយការណ៍ការឃ្លាំមើល និងការដាក់ពិន្ទុលើគោលនយោបាយរបស់ រដ្ឋាភិបាលនីតិកាលទី ៥ ឆ្នាំទី១ នេះ ផ្អែកលើការវិភាគព័ត៌មាន ឬទិន្នន័យដែលមានស្រាប់ មកពីប្រព័ន្ធផ្សព្វផ្សាយ របាការណ៍បឋមរបស់អង្គការជាតិ និងអន្តរជាតិ និងតាមរយៈវេទិកា ម្ចាស់ឆ្នោតដែលរៀបចំឡើងដោយអង្គការខុមហ្រែល កាលពីចុងឆ្នាំ២០១៤ ៕
© រក្សាសិទ្ធិដោយ thmeythmey.com