ជាតិ
សង្គមជាតិ
អ្នករកត្រីម្នាក់ស្លាប់ដោយសារជនជាតិវៀតណាមពង្រាយខ្សែភ្លើងដាក់ការពារស្រូវប្រាំង ជនជាតិវៀតណាម
× ភ្នំពេញ៖ កាលពីរសៀលថ្ងៃទី២៥ ខែកុម្ភៈ ម្សិលមិញនេះ បុរសម្នាក់បានដេកស្លាប់ផ្កាប់មុខក្នុងទឹកជាប់មាត់ប្រឡាយភ្លាមៗ ដោយសារឆក់ខ្សែភ្លើង ដែលជនជាតិវៀតណាម បានពង្រាយដាក់ការពារស្រូវប្រាំង ស្ថិតក្នុងឃុំផាត់សណ្ដាយស្រុកកំពង់ស្វាយ ខេត្តកំពង់ធំ ។នេះបើតាមការផ្សាយរបស់គេហទំព័រអគ្គស្នងការដ្ឋាននគរបាលជាតិ។
គេហទំព័រដដែល បានបញ្ជាក់ថា ជនរងគ្រោះបាត់បង់ជីវិតមានឈ្មោះ ឃៀង នឹង ភេទ អាយុ ២៦ឆ្នាំ ដែលមានប្រពន្ធកំពុងពរពោះ និងមានកូនម្នាក់ ដែលមានទីលំនៅស្ថិតក្នុងភូមិប្រនាគ ឃុំចើងដើងស្រុកបារាយណ៍ ខេត្តកំពង់ធំ។
សាក្សីម្នាក់បានជិះម៉ូតូដើររកក្របី លុះមកដល់ចំណុចកើតហេតុក៏បានប្រទះឃើញជនរងគ្រោះដេកស្លាប់នៅ ក្បែរស្រែប្រាំងជនជាតិវៀតណាម។ ភ្លាមៗនោះដែរ សាក្សីនោះ ក៏បានជិះម៉ូតូទៅប្រាប់មេការស្រែប្រាំងជាជនជាតិវៀតណាម ដែលមករកស៊ីធ្វើស្រែប្រាំងនៅតំបន់ខាងលើ ។ បន្ទាប់បានឃើញទិដ្ឋភាពមានមនុស្សស្លាប់នោះ មេការ និងម្ចាស់ស្រែប្រាំងរួមជាមួយប្រពន្ធ ជាជនជាតិវៀតណាម និងកម្មករ ៤ ទៅ ៥នាក់បានស្ពាយកាបូបលុយ រត់គេចខ្លួនបាត់ បន្សល់ទុកនៅត្រាក់ទ័រ ម៉ូតូធំម៉ាស៊ីនភ្លើង និងធុងដាក់ប្រេងប៉ុណ្ណោះ។
បើតាមប្រភពខាងលើដដែល ជាញឹកញាប់មានគោ ក្របីរបស់ប្រជាពលរដ្ឋ ត្រូវខ្សែរភ្លើងឆក់ស្លាប់ ផងដែរ៕
© រក្សាសិទ្ធិដោយ thmeythmey.com