ជាតិ
ក្រសួងកំពុងប្រជុំកំណត់ចំនួនទណ្ឌិតដែលនឹងត្រូវដោះលែងក្នុងឱកាសបុណ្យចូលឆ្នាំខ្មែរ
× ភ្នំពេញ៖ នៅថ្ងៃទី១៧ ខែមីនា ឆ្នាំ២០១៥នេះក្រសួងយុត្តិធម៌ និងក្រសួងមហាផ្ទៃកំពុងបន្តកិច្ចប្រជុំពិនិត្យ និងកំណត់ចំនួនទណ្ឌិតដែលនឹងត្រូវដោះលែង និងបន្ធូរបន្ថយទោស នៅឱកាសបុណ្យចូលឆ្នាំប្រពៃណីជាតិខ្មែរខាងមុខ។ នេះបើតាមការបញ្ជាក់របស់ លោក គឹម សន្តិភាព អ្នកនាំពាក្យក្រសួងយុត្តិធម៌។
នៅក្នុងកិច្ចប្រជុំត្រួតពិនិត្យកំណត់ចំនួនអ្នកទោសដែលកំពុងប្រព្រឹត្តនៅទីស្ដីការក្រសួងយុតិ្តធម៌នៅថ្ងៃទី១៧ខែមីនា នេះអ្នកនាំពាក្យក្រសួងយុត្តិធម៌ លោក គឹម សន្តិភាព បានមានប្រសាសន៍ថា ក្រសួងកំពុងប្រជុំកំណត់ចំនួនទណ្ឌិតដែលនឹងត្រូវដោះលែងនៅទូទាំងប្រទេស ក្នុងឱកាសបុណ្យចូលឆ្នាំប្រពៃណីជាតិខ្មែរ។ ប៉ុន្តែ ក្រសួងនៅមិនទាន់កំណត់ចំនួនទណ្ឌិត ដែលនឹងត្រូវដោះលែងនៅឡើយ។ លោកប្រាប់ថា៖«ក្រសួងកំពុងប្រជុំ ដើម្បីដាក់ជូនរាជរដ្ឋា ភិបាល។ ដូច្នេះតួលេខនៃចំនួនទណ្ឌិត យើងមិនទាន់កំណត់ចំនួនជាក់លាក់នៅឡើយទេ»។
ការដោះលែង និងបន្ធូរបន្ថយទោសដល់ទណ្ឌិត ធ្វើឡើងចំនួនបីដងក្នុងមួយឆ្នាំ ពោលគឺអំឡុងបុណ្យចូលឆ្នាំខ្មែរ ពិសាបូជា និងបុណ្យអុំទូក។ តាមផ្លូវច្បាប់ ការដោះលែងឬបន្ធូរបន្ថយទោសដល់ទណ្ឌិតអាចធ្វើទៅបាន លុះត្រាណាអ្នកទោសមានសាលក្រម ឬដីកាស្ថាពរ និងអនុវត្តទោសបាន២ភាគ៣ ក្នុងការលើកលែងទោស និង១ភាគ៣ក្នុងការបន្ធូរបន្ថយទោស៕
© រក្សាសិទ្ធិដោយ thmeythmey.com