អន្តរជាតិ
យន្តហោះA320៖ ព័ត៌មានដែលធ្វើអោយអាល្លឺម៉ង់ព្រឺឆ្អឹងខ្នង
× គ្មានអ្នកណាគិតស្មានដល់ថា គឺសហពីឡុតយន្តហោះ A320 ដែលបានធ្លាក់នៅតំបន់ភ្នំបារាំង កាលពីថ្ងៃអង្គារ ជាអ្នកអាចមានចេតនាបើកទម្លាក់យន្តហោះផ្តាច់ជីវិតខ្លួនរួមជាមួយជីវិតមនុស្ស១៤៩នាក់ទៀត ដែលកំពុងស្ថិតក្នុងយន្តហោះឡើយ។ ក្រុមស៊ើបអង្កេតបារាំងបានផ្តល់ព័ត៌មានដ៏អស្ចារ្យនេះ នៅថ្ងៃព្រហស្បតិ៍ម្សិលមិញ។
សូមស្តាប់ការបកស្រាយរបស់ ព្រំសឿន សូលីណា៖
ក្រោយវិភាគសម្លេងថតទុកដោយប្រអប់ខ្មៅយន្តហោះA320 ដែលបានធ្លាក់នៅតំបន់ភ្នំបារាំង រដ្ឋអាជ្ញាបារាំងបានផ្តល់ដំណឹងថា មុនពេលយន្តហោះធ្លាក់ គេបានលឺសម្លេង ពីឡុតម្នាក់ចេញពីកាប៊ីនបើកបរទៅក្រៅ។ ពេលនោះ សហពីឡុត ឈ្មោះAndreas Lubitz ជនជាតិអាល្លឺម៉ង់ អាយុ២៨ឆ្នាំ ប្រហែលបានឆ្លៀតឱកាស ចុចប៊ូតុងបើកយន្តហោះលឿនស្លេវទម្លាក់ចុះភ្នំតែម្តង។ បើស្តាប់សម្លេង ថតដោយប្រអប់ខ្មៅ គេក៏បានលឺសូរ ពីឡុតដែលចេញទៅក្រៅកាប៊ីននោះ បានគោះទ្វារ សុំអោយបើកទ្វារ និងបុកទំលុះទ្វារដែរ តែសហពីឡុតមិនបានឆ្លើយតបទេ។ គេលឺស្នូរដង្ហើមសហពីឡុតAndreas Lubitz ដកធម្មតារហូតដល់យន្តហោះប៉ះទង្គិចភ្នំ បានន័យថា ពីឡុតរូបនេះ អាចមានស្មារតីគ្រប់គ្រាន់ ក្នុងពេលយន្តហោះកំពុងធ្លាក់ចុះ។ នៅនាទីចុងក្រោយ ក៏មានលឺសម្លេងស្រែកចលាចលផងដែរ ដូច្នេះ អ្នកដំណើរយន្តហោះចាប់អារម្មណ៍ពីគ្រោះថ្នាក់ តែក្នុងនាទីចុងក្រោយប៉ុណ្ណោះ មុននឹងពួកគេលាចាកលោកនេះទៅ។
ដំណឹងនេះពិតជាធ្វើអោយអឺរ៉ុបភ្ញាក់ផ្អើលមិនតិចទេ ពិសេសអាល្លឺម៉ង់ដែលមានពលរដ្ឋច្រើនជាងគេ ស្លាប់ក្នុងការធ្លាក់យន្តហោះនេះ។ គេពិបាកនឹងស្មានដល់ថា សហពីឡុតម្នាក់ អាចបញ្ចេញទង្វើបែបនេះឡើយ។ Andreas Lubitz មិនដែលជាប់ពាក់ព័ន្ធបទល្មើសអ្វីទេ។ ពេលនេះ គេកំពុងចោទសំណួរថា តើវាជាអំពើភេរវកម្មរឺក៏ជាទង្វើផ្ទាល់ខ្លួនរបស់ពីឡុតរូបនោះ? ពេលនេះ ការអង្កេតកំពុងបន្ត និងផ្តោតលើ សហពីឡុត Andreas Lubitz ។ តាំងពីយន្តហោះរងគ្រោះថ្នាក់មក ក្រុមស៊ើបអង្កេតមិនដែលហ៊ានយកពាក្យភេរវកម្ម មកធ្វើជាសម្មតិកម្មចម្បងក្នុងការអង្កេតទេ ទោះជាអ្នកជំនាញច្រើននាក់បានសង្កេតថា យន្តហោះបានធ្លាក់ចុះទង្គិចភ្នំ តែក្នុងរយៈពេលខ្លីក៏ដោយ។
អ្នកធ្លាប់ស្គាល់ពីឡុតLubitz ពិបាកស្មានដល់ថា Lubitzអាចធ្វើដូច្នេះណាស់ ព្រោះថា Lubitz មានមិត្តភក្តិច្រើន មានជីវិតរស់នៅធម្មតា និងចេះគួរសមជាមួយគេឯង។ ប្រធានក្រុមហ៊ុន Lufthansa អាល្លឹម៉ង់ មិនដឹងថា ហេតុអ្វីបានជាពីឡុតរូបនេះ ហ៊ានធ្វើសកម្មភាពបែបនេះឡើយ។ អ្វីដែលចម្លែកដែរនោះគឺថា ពីឡុតរូបនេះបានលុបចោលទិន្នន័យព័ត៌មានខ្លួន ក្នុងបណ្តាញសង្គមហ្វេសប៊ុក និងអ៊ីនស្តាក្រាម។ ក្រុមអង្កេតនឹងសាកសួរព័ត៌មានឳពុកម្តាយពីឡុត Lubitz រកមើលថា ពីឡុតរូបនេះធ្លាប់មានបញ្ហាអ្វី រឺធ្វើអ្វីប្លែកទេ ក្នុងកំឡុងពេលចុងក្រោយនេះ។ តាមមើល ក្រុមអង្កេតមិនហ៊ានប្រើពាក្យភេរវកម្មផ្តេសផ្តាសទេ ក្នុងរឿងធ្លាក់យន្តហោះអ៊ែរប៊ុសនេះ ព្រោះ បើភេរវកម្មមែន ប្រហែលជាក្រុមភេរវជនមិនបង្អង់យូរ ក្នុងការប្រកាសជោគជ័យឡើយ។
Andreas Lubitz មានបទពិសោធន៍បើកបរ ៦៣០ម៉ោង។ គេធ្លាប់រៀនបើកបរនៅក្រុមហ៊ុនLufthansa ហើយធ្លាប់បានឈប់រៀនមួយរយៈពេល ក្នុងឆ្នាំ២០០៩ ប្រហែលដោយសារមានបញ្ហាផ្លូវចិត្ត។ ប៉ុន្តែ បានត្រលប់មករៀនវិញរហូតដល់ប្រលងជាប់ចេញបើកបរ។ ក្នុងសន្និសីទសារព័ត៌មាន នៅក្រុងកូឡូញប្រទេសអាល្លឺម៉ង់ ម្សិលមិញ ប្រឈមនឹងសំណួរទាក់ទងការបណ្តុះបណ្តាលពីឡុត ក្រុមហ៊ុនអាល្លឺម៉ង់Lufthansa បានសង្កត់ធ្ងន់ទៅអ្នកកាសែតថា ក្រុមហ៊ុនតែងចំរាញ់ពីឡុតយ៉ាងហ្មត់ចត់ អោយពួកគេប្រលងផ្នែកសុខភាព ទាំងផ្លូវកាយ ទាំងផ្លូវចិត្ត។ ក្រុមហ៊ុនថែមទាំងប្រាប់ថា ពីឡុតAndreas Lubitz ម្នាក់នេះ មានសមត្ថភាពបើកបរទៀតផង។
បើពីឡុតរូបនេះខូចចិត្ត មិនពេញចិត្តនឹងការងារខ្លួន ខឹងនឹងក្រុមហ៊ុន ក៏មិនចាំបាច់ដល់ថ្នាក់ធ្វើអោយមនុស្ស១៤៩នាក់ផ្សេងទៀត ស្លាប់តាមខ្លួនដែរ។ នេះហើយជាអ្វីដែលគេពិបាកជឿ។ សហពីឡុតអាល្លឺម៉ង់Andreas Lubitz ដែលគេធ្លាប់ស្គាល់ថា ជាអ្នកមានស្មារតីខ្ពស់ ទទួលខុសត្រូវខ្ពស់ក្នុងពេលបើកបរកន្លងមក នៅទីបំផុតបែរជាធ្វើដូច្នេះទៅរួច។ នៅថ្ងៃព្រហស្បតិ៍ម្សិលមិញ ក្រោយក្រុមអង្កេតបារាំងបានទំលាយព័ត៌មានប្រអប់ខ្មៅនេះឡើង ក្រុមហ៊ុនអាកាសចរណ៍មួយចំនួនបានចាត់វិធានការថ្មីតំរូវអោយមានពីឡុត២នាក់ ជាប្រចាំក្នុងកាប៊ីនបើកបរ ចៀសវាងម្នាក់ចេញទៅបាត់ ទុកម្នាក់ទៀតអោយនៅបើកបរតែម្នាក់ឯង៕
© រក្សាសិទ្ធិដោយ thmeythmey.com