អន្តរជាតិ
បុរសចិនម្នាក់ចាប់គូដណ្ដឹងញាត់ចូលវ៉ាលី ដោយសារតែមិនព្រមត្រឡប់ទៅផ្ទះវិញ
×
បុរសជនជាតិចិនម្នាក់ ត្រូវបានប៉ូលីសចាប់ខ្លួន និងកាត់ទោសឱ្យជាប់ពន្ធនាគាររយៈពេលមួយឆ្នាំបន្ទាប់ពីលោកបានព្យាយាមចាប់ជំរិតគូដណ្តឹងរបស់ខ្លួន ដើម្បីបង្ខំឲ្យនាងត្រឡប់មកផ្ទះវិញដោយចាប់នាងញាត់ចូលទៅក្នុងវ៉ាលីដាក់ខោអាវមួយ។ នេះបើយោងតាមការផ្សាយរបស់ទូរទស្សន៍មជ្ឈឹមចិន CCTV ។
ប្រភពដដែលក៏បានផ្សាយថា អ្នកនាងMu ដែលជាគូដណ្តឹងរបស់លោក Wangបានចាកចេញពីផ្ទះដែលពួកគេរួរស់ជាមួយគ្នានៅក្នុងខេត្តLiaoningនិងការវិលត្រឡប់ទៅកាន់ស្រុកកំណើតរបស់នាងនៅខេត្ត Xi’anវិញបន្ទាប់អ្នកទាំងពីរបានឈ្លោះគ្នា និងឈានដល់ការប្រើអំពើហិង្សា កាលពីខែឧសភា ឆ្នាំ ២០១៤ ។បន្ទាប់ពីការចាកចេញរបស់អ្នកនាង MuនោះមកលោកWangបានព្យាយាមជាច្រើនលើកច្រើនសារ ដើម្បីឲ្យនាងត្រឡប់មកផ្ទះវិញ។
បើតាមប្រភពខាងលើដដែលនេះ បន្ទាប់ពីបរាជ័យក្នុងការបញ្ចុះបញ្ចូលនាង ឲ្យត្រឡប់ទៅរស់នៅជាមួយខ្លួនវិញ នៅទីបំផុតលោក Wangបានចេញដំណើរទៅកាន់ខេត្ត Xi’anដើម្បីបានសន្ទនាជាមួយនាងទល់មុខគ្នា។ទោះជាលោក Wangព្យាយាមនិយាយដោយសន្តិវិធីក៏ដោយ ក៏កូដណ្ដឹងរបស់គាត់មិនព្រមត្រឡប់ទៅផ្ទះវិញជាមួយលោកជាដាច់ខាត។ ដូច្នេះហើយទើបលោក Wangសម្រេចចាប់ចងនាងរួចញាត់ចូលទៅក្នុងវ៉ាលី ដើម្បីនាំយកនាងត្រឡប់ទៅផ្ទះវិញជាមួយ។
ក្រោយពេលដាក់គូដណ្ដឹងទៅក្នុងវ៉ាលីរួចមក លោក Wangបានហៅអ្នកបើកបររថយន្តឈ្នួល ដើម្បីជូនលោកត្រឡប់ទៅផ្ទះ នៅខេត្តLiaoningវិញ។ ប៉ុន្តែអ្នកបើកររថយន្តឈ្នួលនោះ គាត់ ហាក់ដូចជាបានឃើញមានអ្វីចម្លែកនៅក្នុងវ៉ាលី។ បន្ទាប់មកលោកក៏បានឃើញមានស្ត្រីម្នាក់ នៅក្នុងវ៉ាលីសម្រាប់ដាក់សម្លៀកបំពាក់ ដែលលោក Wang យកមកជាមួយនោះ។
ក្រោយពេលឃើញហេតុការណ៍នេះ អ្នកបើកបររថយន្តក៏បានដោះលែងស្ត្រីដែលនៅក្នុងវ៉ាលីនោះ រីឯលោក Wangបានព្យាយាមរត់គេច ប៉ុន្តែត្រូវប៉ូលីសចាប់ខ្លួនបានវិញ នៅជិតទីតាំងកើតហេតុនោះ។អាជ្ញាធរបានឲ្យដឹងថា លោក Wangបានសារភាពនិងបានសម្តែងនូវការសោកស្ដាយចំពោះទង្វើរបស់គាត់ ខណៈពេលដែលរូបគាត់ត្រូវគេកាត់ទោសឱ្យជាប់ពន្ធនាគាររយៈពេលមួយឆ្នាំ៕
© រក្សាសិទ្ធិដោយ thmeythmey.com