ជាតិ
តុលាការរាជធានីភ្នំពេញកំពុងសាកសួរ លោក ថោង សារ៉ាត់ និងឪពុកម្តាយ
× ភ្នំពេញ៖ សាលាដំបូងរាជធានីភ្នំពេញកំពុងបើកសវនាការសំណុំរឿងទាក់ទងនឹងការបាញ់សម្លាប់ឧកញ៉ា អ៊ឹង ម៉េងជី កាលពីថ្ងៃទី២២ ខែវិច្ឆិកា ឆ្នាំ២០១៤។ លោក ថោង សារ៉ាត់ ត្រូវបានចាប់ខ្លួនកាលពីពាក់កណ្តាលខែមេសា កន្លងមក នៅព្រំដែនកម្ពុជា-វៀតណាម បន្ទាប់ពីសមត្ថកិច្ចរកឃើញថា ជាអ្នកនៅពីក្រោយអំពើឃាតកម្ម រីឯលោក ថោង ចំរើន ជាឪពុក និងលោកស្រី កែវ សារី ជាម្តាយ ជាប់ពាក់ព័ន្ធនឹងការកាន់កាប់អាវុធខុសច្បាប់។
បន្ទាប់ពីការសាកសួរ និងឃុំខ្លួនបណ្តោះអាសន្នក្នុងពន្ធនាគារព្រៃសអស់ជាង ៥ខែ ពោលគឺចាប់ពីចុងឆ្នាំ ២០១៤ កន្លងមក សាលាដំបូងរាជធានីភ្នំពេញនឹងបើកសវនការជាផ្លូវការលើសំណុំរឿងលោក ថោង ចំរើន និងលោកស្រី កែវ សារី ។
មេធាវីការពារក្តីពួកគេ លោក លឹម វណ្ណា បាននិយាយថា កូនក្តីរបស់លោក គឺឪពុកម្តាយលោកឧញ៉ា ថោង សារ៉ាត់ នឹងត្រូវឡើងសវនាការនៅថ្ងៃទី២០ នេះ។«ពួកគាត់ឡើងសវនាការសាធារណៈនៅសាលាដំបូងរាជធានីភ្នំពេញនៅម៉ោង២ រសៀល»។ នេះជាការបញ្ជាក់របស់មេធាវី លោក លឹម វណ្ណា។
ឪពុកម្តាយលោក ថោង សារ៉ាត់ ត្រូវបានអយ្យការអមសាលាដំបូងរាជធានីភ្នំពេញចោទប្រកាន់ពីបទរក្សា កាន់កាប់អាវុធ និប្រើប្រាស់អាវុធខុសច្បាប់ តាមមាត្រា ៤៩០ នៃក្រមព្រហ្មទណ្ឌ បន្ទាប់ពីមានករណីឃាតកម្មលើឧញ៉ា អ៊ឹង ម៉េងជឺ ដែលបណ្តោលឲ្យមានការភ្ញាក់ផ្អើល កណ្តាលរាជធានីភ្នំពេញ កាលយប់ពីថ្ងៃ២២ខែវិច្ឆិកា ឆ្នាំ២០១៤។ ករណីឃាតកម្មនេះ សមត្ថកិច្ចបានចោទលោកឧញ៉ា ថោង សារ៉ាត់ ជាមេឃាតករ។
តាមមាត្រា ៤៩០ នៃក្រមព្រហ្មទណ្ឌ បទកាន់កាប់ឬដឹកជញ្ជូនអាវុធដោយគ្មានការអនុញ្ញាត បានចែងថា គ្រប់បុគ្គលដែលនៅក្រៅលំនៅឋានរបស់ខ្លួនយកតាមខ្លួនឬ ដឹកជញ្ជូននូវអាវុធគ្រឿងផ្ទុះឬគ្រាប់រំសេវគ្រប់ប្រភេទដោយគ្មាន ការអនុញ្ញាតពីអាជ្ញាធរមានសមត្ថកិច្ចត្រូវផ្តន្ទាទោសដាក់ពន្ធនាគារពី ៦ ខែ ទៅ ៣ ឆ្នាំ និងពិន័យជាប្រាក់ពី ១ លានរៀល ទៅ ៦លានរៀល។
គួររម្លឹកថា ជនជាប់ចោទឈ្មោះ ថោង ចំរើន អាយុ ៦៥ ឆ្នាំ និងឈ្មោះ កែវ សារី អាយុ ៥៥ ឆ្នាំ ត្រូវបានចៅក្រមស៊ើបសួរសាលាដំបូង លោក លី សុខឡេង សម្រេចដោះលែងនៅក្រៅឃុំបណ្តោះអាសន្ន កាលពីថ្ងៃទី៧ ខែកុម្ភៈ ឆ្នាំ២០១៥ រួចម្តង។ ប៉ុន្តែបន្ទាប់ពីមានការដោះលែងបានរយៈជាង ១០ថ្ងៃនោះ ពួកគេទាំងពីរត្រូវបានសមត្ថកិច្ចចាប់ខ្លួនមកវិញ នៅពេលដែលពួកគេចេញដំណើរទៅប្រទេសវៀតណាម។
ទាក់ទិនករណីដោះលែងឲ្យនៅក្រៅឃុំនោះ លោកនាយករដ្ឋមន្ត្រី ហ៊ុន សែន មានប្រតិកម្មជាខ្លាំង ដោយលោកអះអាងថា ការសម្រេចដោះលែងនោះ អាចពាក់ព័ន្ធនឹងអំពើពុករលួយ។ ភ្លាមៗនោះ លោកបានស្នើឲ្យក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រម ចាត់វិធានការធ្វើអធិការកិច្ច។ ក្រោយពីលោកនាយករដ្ឋមន្ត្រីប្រតិកម្មភ្លាមៗ ឧត្តមក្រុមប្រឹក្សានៃ អង្គចៅក្រម បានកោះប្រជុំជាបន្ទាន់មួយសម្រេចដកតំណែង លោក អាំង មាលតី ចេញពីប្រធានសាលាដំបូងរាជធានីភ្នំពេញមកធ្វើការនៅក្រសួងយុត្តិធម៌ ហើយលោក តាំង ស៊ុនឡាយ ដែលជាអនុប្រធាន ត្រូវបានតែងតាំងមកជាប្រធានសាលាដំបូងរាជធានីភ្នំពេញជំនួសវិញ៕
© រក្សាសិទ្ធិដោយ thmeythmey.com