ជាតិ
រកឃើញជនជាតិវៀតណាមខុសច្បាប់ ៤១នាក់ទៀតនៅតាមសិប្បកម្មសង្កាត់ផ្សារដើមថ្កូវ
× ភ្នំពេញ៖ អាជ្ញាធរកម្ពុជាបានឃាត់ខ្លួនជនជាតិវៀតណាមប្រុសស្រីចំនួន៤១នាក់ ដែលកំពុងរស់នៅខុសច្បាប់ក្នុងរាជធានីភ្នំពេញ។ ជនអន្តោប្រវេសន៍វៀតណាមត្រូវបានរកឃើញនៅតាមទីតាំងសិប្បកម្មកែច្នៃឈើចំនួន១៨កន្លែងក្នុងសង្កាត់ផ្សារដើមថ្កូវនៃខណ្ឌចំការមន។ នេះបើតាមយោងតាមការផ្សព្វផ្សាយរបស់គេហទំព័រអគ្គស្នងការនគរបាលជាតិ។
ក្នុងចំណោមជនអន្តោប្រវេសន៍វៀតណាមទាំង៤១នាក់ ដែលមានស្រី៦នាក់នោះ មានតែ ២៥នាក់ដែលមានលិខិតឆ្លងដែន ដែលមានទិដ្ឋាកាចូលប្រទេសកម្ពុជារយៈពេលមួយខែ។ តាមរយៈគេហទំព័រអគ្គស្នងការនគរបាលជាតិ ប្រធាននាយកដ្ឋានស៊ើបអង្កេតនិងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ឧត្តមសេនីយ៍ទោ អ៊ុក ហៃសីឡា បាននិយាយថា ជនជាតិវៀតណាមទាំង២៥ ដែលមានលិខិតឆ្លងដែននោះ មិនមានទិដ្ឋាកាធ្វើការងារនៅកម្ពុជាឡើយ។
ជនជាតិវៀតណាមទាំងអស់ ត្រូវបានសមត្ថកិច្ចណែនាំឲ្យត្រឡប់ទៅវៀតណាមវិញក្នុងរយៈ ១សប្តាហ៍ ហើយសមត្ថកិច្ចតម្រូវឲ្យពួកគេបំពេញឯកសារផ្លូវច្បាប់ឲ្យបានត្រឹមត្រូវ។ចំពោះជនជាតិវៀតណាមចំនួន ១៦នាក់ដែលគ្មានឯកសារត្រូវរៀបចំឯកសារបណ្តេញចេញ តែបើរឹងទទឹងមិនរាងចាលត្រូវបញ្ជូនទៅតុលាការធ្វើការចោទប្រកាន់តាមនីតិវិធីច្បាប់៕
© រក្សាសិទ្ធិដោយ thmeythmey.com