ជាតិ
តុលាការប្រកាសសាលក្រមលោក ថោង សារ៉ាត់ និងឪពុកម្តាយ នៅម៉ោង២កន្លះនេះ
× ភ្នំពេញ៖ ចៅក្រមជំនុំជម្រះនៃសាលាដំបូងរាជធានីភ្នំពេញនឹងប្រកាសសាលក្រមនៃសំណុំរឿងកាន់កាប់អាវុធខុសច្បាប់ ដែលមានចុងចោទឧកញ៉ា ថោង សារ៉ាត់ លោក ថោង ចំរើន និងអ្នកស្រី កែវ សារី ព្រមទាំងអង្គរក្សម្នាក់ទៀតនៅម៉ោង ២កន្លះរសៀលថ្ងៃទី១៥ ខែមិថុនានេះ។ នេះបើតាមការបញ្ជាក់របស់មេធាវីការពារក្តីឪពុកម្តាយលោក ថោង សារ៉ាត់ លោក លីម វណ្ណា។
លោក ថោង សារ៉ាត់ និងឪពុកម្តាយ រួមទាំងអង្គរក្សម្នាក់ទៀត ត្រូវចោទប្រកាន់ពីបទកាន់កាប់អាវុធខុសច្បាប់ តាមមាត្រា ៤៩០ នៃក្រមព្រហ្មទណ្ឌ។ សំណុំរឿងកាន់កាប់អាវុធខុស ច្បាប់នេះ ជាប់ពាក់ព័ន្ធនឹងករណីឃាតកម្មលើឧកញ៉ា អ៊ឹង ម៉េងជី នៅកណ្តាលរាជធានីភ្នំពេញកាលពីរសៀលថ្ងៃទី២២ ខែវិច្ឆិកា ឆ្នាំ២០១៤ កន្លងមក។
មេធាវីការពារក្តីឲ្យឪពុកម្តាយលោក ថោង សារ៉ាត់ លោក លីម វណ្ណា ប្រាប់ថា តុលាការនឹងប្រកាសសាលក្រមកូនក្តីលោកតាមការកំណត់។ លោកបញ្ជាក់ថា៖«តុលាការនឹងប្រកាសនៅម៉ោង ២កន្លះនេះ»។
គួររម្លឹកថា អំឡុងសវនាការអស់រយៈពេលប្រមាណ ៤ម៉ោង កាលពីរសៀលថ្ងៃទី២០ ខែឧសភា ឧកញ៉ា ថោង សារ៉ាត់ ដែលត្រូវបានចោទប្រកាន់ថា ជាអ្នកផ្តើមគំនិតនៅក្នុងករណីបាញ់សម្លាប់ឧកញ៉ា អ៊ឹង ម៉េងជឺ បានបដិសេធចំពោះបទចោទ ប្រកាន់ដទៃទៀត ដែលថា លោកកាន់កាប់អាវុធខុសច្បាប់។ ជាមួយគ្នានេះ លោក ថោង ចំរើន និងលោកស្រី កែវ សារី ដែលត្រូវជាឪពុកម្តាយលោក ថោង សារ៉ាត់ ដែលត្រូវបាន ចោទប្រកាន់ពាក់ព័ន្ធនឹងការកាន់កាប់អាវុធគ្មានច្បាប់អនុញ្ញាត ក៏បានចូលរួមសវនាការផងដែរ។ អ្នកទាំងពីរនាក់ ក៏បានអះអាងថា គ្មានទោសកំហុសដែរ ហើយបានសុំឲ្យតុលាការ លើកចោលបទចោទប្រកាន់ ទាំងអស់លើពួកគេ ហើយដោះលែងពួកគេពីពន្ធនាគារ។
ចៅក្រមជំនុំជម្រះ ឃី ឆែ បានប្រាប់តុលាការថា នគរបាលបានចុះទៅផ្ទះរបស់អ្នកទាំងបីនាក់កាលពីខែធ្នូ បន្ទាប់ពីករណីឃាតកម្មលើឧញ៉ា អ៊ឹង ម៉េងជឺ ដោយរកឃើញគ្រាប់កាំភ្លើង និងអាវុធចំនួន ១៥ដើម ក្នុងនោះ កាំភ្លើង AK-47 ចំនួនបួនដើម។ លោកបញ្ជាក់ថា ក្នុងចំណោមអាវុធ ទាំងអស់ ពួកគេមានអាជ្ញាប័ណ្ណស្របច្បាប់កាន់កាប់តែពីរ ប៉ុណ្ណោះ។
តាមមាត្រា ៤៩០ នៃក្រមព្រហ្មទណ្ឌ បទកាន់កាប់ឬដឹកជញ្ជូនអាវុធដោយគ្មានការអនុញ្ញាត បានចែងថា គ្រប់បុគ្គលដែលនៅក្រៅលំនៅឋានរបស់ខ្លួនយកតាមខ្លួនឬ ដឹកជញ្ជូននូវអាវុធគ្រឿងផ្ទុះឬគ្រាប់រំសេវគ្រប់ប្រភេទដោយគ្មាន ការអនុញ្ញាតពីអាជ្ញាធរមានសមត្ថកិច្ចត្រូវផ្តន្ទាទោសដាក់ពន្ធនាគារពី ៦ ខែ ទៅ ៣ ឆ្នាំ និងពិន័យជាប្រាក់ពី ១ លានរៀល ទៅ ៦លានរៀល៕
© រក្សាសិទ្ធិដោយ thmeythmey.com