ជាតិ
បង្គោលព្រំដែនដែលបោះជាមួយវៀតណាមរួចហើយមានភាពមិនប្រក្រតី ត្រូវសើរើឡើងវិញ
× រដ្ឋាភិបាលកម្ពុជា នឹងសើរើឡើងវិញនូវបង្គោលព្រំដែនដែលមានភាពលម្អៀងមួយចំនួនជាមួយវៀតណាមដែលរដ្ឋាភិបាលទាំងពីរ បានបោះរួចហើយចំនួន ៨៣ ភាគរយ។ នេះជាការប្រកាសរបស់លោកនាយករដ្ឋមន្ត្រី ហ៊ុន សែន ដែលលោកបានឆ្លៀតអត្ថាធិប្បាយពីបញ្ហាព្រំដែនកម្ពុជា-វៀតណាម នៅក្នុងពិធីចែកសញ្ញាបត្រដល់សមណនិស្សិតពុទ្ធិកសកលវិទ្យាល័យព្រះសីហនុរាជ នៅថ្ងៃព្រហស្បតិ៍នេះ។ លោកនាយករដ្ឋមន្ត្រី បញ្ជាក់ដូច្នេះថា៖«ប្រាប់ទៅអ្នកចរចា បើចរចាមិនត្រូវគ្នា អូសបន្លាយក៏អូសទៅ ប្រសើរជាងបាត់ដី…..។ ឥឡូវបង្គោលព្រំដែន បាន ៨៣ នៅសល់ ១៧ ភាគរយ។ ហើយ ៨៣ ភាគរយនេះ ក៏យើងនៅអាចសើរើ និងត្រូវពិនិត្យមើលមួយចំនួនទៀត ករណីបោះទៅវាលម្អៀង វាទាមទារឲ្យមានការកែប្រែ» ។
ជាមួយគ្នានេះលោកនាយករដ្ឋមន្ត្រី ហ៊ុន សែន ក៏បានថ្លែងទៀតថា មូលហេតុដែលរដ្ឋាភិបាលកម្ពុជាយឺតយ៉ាងក្នុងការបោះបង្គោលព្រំដែនជាមួយវៀតណាម ដោយសារតែរដ្ឋាភិបាលកម្ពុជាមិនព្រមជាមួយវៀតណាម ខ្លាតបាត់បង់ទឹកដី។ «ខំប្រឹងប៉ុណ្ណឹងហើយ នៅតែគេចោទថា ធ្វើឲ្យបាត់ដីទៀត»។ នេះជាការបញ្ជាក់របស់លោក ហ៊ុន សែន។
ស្តាប់ប្រសាសន៍លោក ហ៊ុន សែន
នៅក្នុងកិច្ចប្រជុំគណៈកម្មការចម្រុះព្រំដែនកម្ពុជា-វៀតណាម កាលពីពេលថ្មីៗនេះ លោក ហោ ណាំហុង ប្រធានគណៈកម្មាធិការព្រំដែនកម្ពុជា បានអះអាងថា កម្ពុជានិងវៀតណាម បានលើកពីបញ្ហានៃការបោះបង្គោលព្រំដែនជាមួយគ្នា ហើយភាគីទាំងពីរនឹងប្តេជ្ញាបោះបង្គោលព្រំដែនជាមួយគ្នាដែលនៅសេសសល់ ១៧ ភាគរយទៀត ឲ្យបានឆាប់នៅពេលខាងមុខ៕
© រក្សាសិទ្ធិដោយ thmeythmey.com