ជាតិ
បន្តបណ្តេញជនអន្តោប្រវេសន៍ខុសច្បាប់ ៥ សញ្ជាតិចំនួន ៥២នាក់ចេញពីកម្ពុជា
× ភ្នំពេញ៖ នគរបាលអន្តោប្រវេសន៍បានបណ្តេញជនអន្តោប្រវេសន៍ខុសច្បាប់ ៥ សញ្ជាតិចំនួន ៥២នាក់ រួមមាន វៀតណាម ៤៨នាក់ ចេញពីកម្ពុជានៅថ្ងៃទី១២ ខែសីហា ឆ្នាំ២០១៥។ នេះបើតាមប្រធាននាយកដ្ឋានស៊ើបអង្កេតនៃអគ្គនាយកដ្ឋានអន្តោប្រវេសន៍។
ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក អ៊ុក ហៃសិលា ប្រាប់ថា ជនអន្តោប្រវេសន៍ខុសច្បាប់ទាំងនោះ ត្រូវបញ្ជូនចេញតាមអាកាសយានដ្ឋានអន្តរជាតិភ្នំពេញ ច្រកអន្តរជាតិបាវិត ច្រកអន្តរជាតិប៉ោយប៉ែត និងក្អមសំណរ។ លោកបញ្ជាក់ថា ជនបរទេសខុសច្បាប់ទាំង០៥សញ្ជាតិ ចំនួន ៥២នាក់នោះ រួមមាន វៀតណាម ៤៨នាក់ (ស្រី០៣នាក់) ជនជាតិហូឡង់ ០១នាក់ ថៃ ០១នាក់ នីហ្សេរីយ៉ា ០១នាក់ និងបង់ក្លាដេស ០១នាក់។
លោក អ៊ុក ហៃសិលា រៀបរាប់ពីការឆែកឆេររកជនអន្តោប្រវេសន៍ខុសច្បាប់ថា នគរបាលអន្តោប្រវេសន៍បានចុះស្រាវជ្រាវ និងឃាត់ខ្លួនជនបរទេសខុសច្បាប់ នៅរាជធានីភ្នំពេញ ខេត្តកណ្តាល បាត់ដំបង តាកែវ កំពង់ធំ ពោធិ៍សាត់ សៀមរាប និងបន្ទាយមានជ័យ។ លោកថា៖«ពួកគេត្រូវបណ្តេញចេញពីកម្ពុជា ដោយសារពួកគេលួចស្នាក់នៅ ធ្វើការរកស៊ី ពុំមានលិខិតឆ្លងដែន និងស្នាក់នៅលើសទិដ្ឋាការស្របច្បាប់»។
បើតាមប្រធាននាយកដ្ឋានស៊ើបអង្កេត គិតចាប់ពីខែកក្កដា ឆ្នាំ២០១៤ ដល់ខែសីហា ឆ្នាំ២០១៥នេះ ជនអន្តោប្រវេសន៍ខុសច្បាប់ ៤៣សញ្ជាតិ សរុបចំនួន ២៩៤២នាក់ ត្រូវបានបណ្តេញចេញពីកម្ពុជា ក្នុងនោះ ជនជាតិវៀតណាមមានច្រើនជាងគេចំនួន ២៥៣៤នាក់ (ស្រី៤៤៥នាក់)៕
© រក្សាសិទ្ធិដោយ thmeythmey.com