អន្តរជាតិ
នយោបាយជាតិ
អាមេរិគាំទ្រនយោបាយការពារជាតិជប៉ុនស្របពេលប្រជាជនជប៉ុនខ្លាចកើតសង្គ្រាម
× ប្រជាជនជប៉ុនរាប់ម៉ឺននាក់នាំគ្នាចូលរួមចលនាបាតុកម្មទ្រង់ទ្រាយធំនៅក្បែរវិមានរដ្ឋសភាដើម្បីប្រឆាំងសេចក្តីព្រាងច្បាប់សន្តិសុខថ្មីរបស់លោក ស៊ីនហ្សូ អាបេ ដែលត្រូវបានសភាជាន់ទាបគាំទ្រកាលពីខែកក្កដាកន្លងទៅ។ ប្រជាជនជប៉ុនស្ទើរគ្រប់វ័យទាំងក្មេងទាំងចាស់បានជំទាស់ គោលនយោបាយការពារជាតិរដ្ឋាភិបាលជប៉ុនដែលមានមហិច្ឆតាសាងអំណាចយោធាជប៉ុនឡើងវិញ ព្រោះគេជឿជាក់ថាលោក អាបេនឹងនាំជប៉ុនធ្លាក់ក្នុងសង្គ្រាមជាថ្មី។ សេចក្តីព្រាងច្បាប់សន្តិសុខថ្មីនឹងត្រូវអនុម័តដោយសភាជាន់ខ្ពស់ ប៉ុន្តែប្រជាជនជប៉ុនប្រហែល ៧០ភាគរយទៅហើយដែលប្រឆាំងសេចក្តីព្រាងច្បាប់នេះ។ ដោយឡែក សហរដ្ឋអាមេរិកបានបង្ហាញការស្វាគមន៍សេចក្តីព្រាងច្បាប់របស់ជប៉ុន ខណៈដែលចិននិងកូរ៉េខាងត្បូងសម្តែងការខឹងសម្បារក្រុងតូក្យូជាខ្លាំង។
សូមស្តាប់ការបកស្រាយរបស់លោក សៅផលនិស្ស័យ៖
ប្រជាជនជប៉ុនក្មេងចាស់ប្រុសស្រីស្ទើរគ្រប់វ័យប្រហែល ១២ម៉ឺននាក់បានសម្រេចចូលរួមក្នុងចលនាបាតុកម្មប្រឆាំងសេចក្តីព្រាងច្បាប់សន្តិសុខរបស់រដ្ឋាភិបាលលោក ស៊ីនហ្សូ អាបេ ដែលនឹងត្រូវដាក់ឆ្លងសភាជាន់ខ្ពស់ដើម្បីអនុម័តក្នុងពេលឆាប់ៗខាងមុខ។ បាតុករមានស្រីមានប្រុសមាននាំកូនតូចៗមកជាមួយផង ដោយដៃកាន់បដាស្រែកតវ៉ាឲ្យរដ្ឋាភិបាលបញ្ឈប់មហិច្ឆតាអនុម័តច្បាប់សន្តិសុខបង្កើនអំណាចយោធានិងទាមទារឲ្យលោក អាបេ ចុះចេញពីតំណែងផងដែរ។ បដាភាគច្រើនមានតែឃ្លានិយាយថា«ទេចំពោះសង្គ្រាម» និង «ប្រជាជនជប៉ុនត្រូវការសន្តិភាព»។
តាមពិតទៅចលនាបាតុកម្មកើតឡើងជាញឹកញយទៅហើយនៅក្នុងប្រទេសជប៉ុន តាំងពីដើមឆ្នាំ២០១៥ ពោលគឺក្រោយលោក អាបេ ស្វះស្វែរកការកែមាត្រា ៧ នៃរដ្ឋធម្មនុញ្ញសន្តិភាពដែលកម្រិតសិទ្ធិយោធារបស់ជប៉ុនក្រោយសង្គ្រាមលោកលើកទី។ ប៉ុន្តែបាតុកម្មដុះដាលកាន់តែខ្លាំង ហើយប្រជាជនកាន់តែច្រើនចូលរួមចលនាប្រឆាំងគោលនយោបាយរដ្ឋាភិបាលផង ក្រោយពេលលោកអាបេ រុញសេចក្តីព្រាងច្បាប់សន្តិសុខទៅសភាជាន់ទាប។ អ្នកចូលរួមជាច្រើននាក់បានអះអាងដូចៗគ្នាថា ពួកគេត្រូវតែប្រឹងតវ៉ាបញ្ឈប់មហិច្ឆតារដ្ឋាភិបាលបច្ចុប្បន្ន ដ្បិតថា វាជាវិធីតែមួយគត់ដែលអាចការពារសន្តិភាពជប៉ុនដែលមានរាប់ឆ្នាំមកហើយសម្រាប់កូនចៅជំនាន់ក្រោយ។
ច្បាប់សន្តិសុខថ្មីនិងគោលនយោបាយការពារជាតិរបស់លោក អាបេ មានគោលដៅធ្វើយ៉ាងណាបញ្ចប់ការកម្រិតសិទ្ធិជប៉ុនដែលមានត្រឹមកងកម្លាំងស្វ័យការពារ ដោយអាចបញ្ជូនទ័ពទៅច្បាំងក្រៅប្រទេសបាន ការពារសម្ព័ន្ធមិត្ត និងចូលរួមសកម្មភាពថែរក្សាសន្តិភាពក្នុងក្របខណ្ឌអង្គការសហប្រជាជាតិផង។ មេដឹកនាំជប៉ុនលោក អាបេ នៅតែថ្លែងទទូចពន្យល់ប្រជាជនជប៉ុនម្តងហើយម្តងទៀតពីបញ្ហាសន្តិសុខដែលជប៉ុននឹងប្រឈមនាពេលបច្ចុប្បន្នមានទាំងការកើនឡើងនៃចលនាភេរវកម្ម សកម្មភាពគឃើ្លនរបស់ចិននៅសមុទ្រចិនខាងត្បូង និងការរះត្រដែតឡើងនៃអំណាចយោធារបស់ចិននាពេលបច្ចុប្បន្នផង។ ប៉ុន្តែប្រជាជនជប៉ុនប្រហែល៧០ភាគរយមិនបានយល់ឃើញដូចលោក អាបេ ពន្យល់ឡើយ ព្រោះពួកគេមើលឃើញថាជប៉ុនស្ថិតក្នុងស្ថានភាពសន្តិភាពរាប់ទសវត្សមកហើយ ចុះហេតុអ្វីចាំបាច់ត្រូវចំណាយលុយលើវិស័យយោធា ឬត្រូវទៅពាក់ព័ន្ធជាមួយជម្លោះខាងក្រៅធ្វើអ្វីទៀត។ លោក អាបេ មិនមែនចង់បានវិស័យយោធាខ្លាំងព្រោះតែមានជម្លោះជាមួយចិនប៉ុណ្ណោះទេ ជម្លោះកោះគូរីលជាមួយរុស្ស៊ីក៏ជារឿងចម្រូងចម្រាសខ្លាំងដែរ។
ជុំវិញមហិច្ឆតាកសាងអំណាចយោធាជប៉ុនឡើងវិញនេះ គេឃើញតែសហរដ្ឋអាមេរិកប៉ុណ្ណោះដែលសម្តែងការស្វាគមន៍និងគាំទ្រពេញទំហឹង។ រដ្ឋបាលលោក បារ៉ាក់ អូបាម៉ា រីករាយនិងគាំទ្រចំណាត់ការរដ្ឋាភិបាលលោក អាបេ ដោយសារតែមហាអំណាចលោកខាងលិចមួយនេះ កំពុងព្យាមរការគាំទ្រពីសម្ព័ន្ធមិត្តខ្លួននៅអាស៊ីដើម្បីពង្រឹងឥទ្ធិពលខ្លួនឡើងវិញប្រជែងមហាយក្សចិន ហើយម្យ៉ាងបើជប៉ុនមានវិស័យយោធាខ្លាំងក៏វាក៏ជួយការពារទ័ពអាមេរិកបានដែរករណីមានការប្រទូស្តរ៉ាយដោយអាវុធកើតឡើងនាពេលណាមួយ។
ប៉ុន្តែ កូរ៉េខាងត្បូងដែលជាសម្ព័ន្ធមិត្តអាមេរិក រួមជាមួយចិនបន្តបង្ហាញក្តីបារម្ភ និង ការខឹងសម្បារលោកអាបេជាខ្លាំងដែលយកអំណាចយោធាជាធំ។ តាមពិតទៅកូរ៉េខាងត្បូង និងជប៉ុន រឹតតែខឹងជប៉ុនខ្លាំងទៀតនៅពេលលោក អាបេ មិនព្រមសុំអភ័យទោសជាសាធារណចំពោះទង្វើកងទ័ពជប៉ុនសម័យសង្គ្រាមលោកលើកទី២ដែលធ្វើលើប្រជាជនចិននិងកូរ៉េ។ ហើយលោក អាបេ ក៏បដិសេធចូលរួមក្នុងខួបជ័យជម្នះសង្គ្រាមលោកលើកទី២នៅប្រទេសចិននៅដើមខែកញ្ញផងដែរ។
រដ្ឋាភិបាលក្រុងតូក្យូដូចជាត្រៀមលក្ខណៈដើម្បីផ្លាស់ប្តូរគោលនយោបាយការពារជាតិនិងត្រៀមចូលរួមក្នុងសកម្មភាពយោធាជាមួយសម្ព័ន្ធមិត្តរួចទៅហើយដែរ។ កាលពីថ្មីៗនេះដែរ លោក អាបេ និងរដ្ឋមន្ត្រីការពារជាតិជប៉ុន បានអះអាង ជប៉ុននឹងដើរតួនាទីក្នុងការលើកកម្ពស់និងថែរក្សាសន្តិភាពសកល ហើយនឹងការពារសម្ព័ន្ធមិត្ត រួមជាមួយសកម្មភាពល្បាតផ្លូវអាកាស និងល្បាតតាមសមុទ្រនៅសមុទ្រចិនខាងត្បូង។ ក្នុងពេលដ៏ខ្លីខាងមុខបើ ច្បាប់សន្តិសុខថ្មីត្រូវអនុម័តជោគជ័យ កងទ័ពជើងទឹកជប៉ុននឹងសហការជាមួយទ័ពជើងទឹកអាមេរិកដែលទទួលខុសត្រូវតំបន់ប៉ាស៊ីហ្វិកដើម្បីល្បាតរួមគ្នា និងការពារសេរីភាពនាវាចរណ៍នៅសមុទ្រចិន។ ប៉ុន្មានថ្ងៃមុន ជប៉ុនទើបបញ្ចេញគម្រូនាវាចម្បាំងសម្រាប់ដឹកឧទ្ធម្ភាគចក្រថ្មីដែលចម្លងយកឈ្មោះតាមនាវាចម្បាំងសម័យសង្គ្រាមលោក។ នាវានោះជានាវាដែលធ្លាប់ចូលរួមកម្ទេចមូលដ្ឋានយោធាអាមេរិកនៅ Pearl Harbor ឆ្នាំ ១៩៤២ និងធ្លាប់ចូលរួមក្នុងសកម្មភាពយោធាប្រឆាំងចិនផងដែរ។ ចិនឯណោះវិញក៏ខឹងដាច់ក្បាលដាច់កន្ទុយចោទ ជប៉ុនថាកំពុងព្យាយាមមើលងាយប្រវត្តិសាស្ត្រដ៏ជូរចត់របស់ប្រជាជនចិនដែរ។ ក្នុងក្រសែរភ្នែកអ្នកវិភាគ សកម្មភាពរបស់ជប៉ុនបន្តបន្ទាប់គ្នាបង្កការក្តៅក្រហាយដល់គេឯងនេះ អាចបញ្ជាក់ថា មហិច្ឆតាសាងអំណាចយោធាអាចនឹងគំរាមកំហែងសន្តិភាពពិភពលោក៕
© រក្សាសិទ្ធិដោយ thmeythmey.com