ជាតិ
ប៉ូលិសនៅតែមិនទាន់ចាប់ថៅកែឃីក្លឹបបាន ខណៈជនរងគ្រោះប្តឹងទារសំណង
×
រហូតមកដល់ពេលនេះ សមត្ថកិច្ចខណ្ឌមានជ័យ នៅតែមិនទាន់រកឃើញម្ចាស់ឃីក្លឹបនោះឡើយ។ ម្ចាស់ក្លឹបរូបនេះ បានរត់គេចខ្លួន ក្រោយពីក្លឹបរបស់ខ្លួនឆាបឆេះ និងបណ្តាលឲ្យស្ត្រីជាបុគ្គលិក៥នាក់ស្លាប់បាត់បង់ជីវិត។
លោក តេង ស៊ីណូ អធិការខណ្ឌមានជ័យ បានប្រាប់សារព័ត៌មានថ្មីៗថា សមត្ថកិច្ច បានសហការជាមួយកងកម្លាំងរាជអាហុធហត្ថ ដើម្បីតាមចាប់ ម្ចាស់ឃីក្លឹប ដែលរត់គេចខ្លួន ក្រោយពីក្លឹបឆាបឆេះ។ ប៉ុន្តែរហូតមកដល់ពេលនេះ កម្លាំងសមត្ថកិច្ចមិនទាន់ទទួលបានព័ត៌មានណាមួយ ទាក់ទងនឹងការលាក់ខ្លួនរបស់ម្ចាស់ក្លឹបនេះនោះទេ។
លោកអធិការរូបនេះបញ្ជាក់យ៉ាងនេះថា៖ «យើងមិនទាន់រកឃើញសញ្ញាណបន្តិចនោះទេ ទាក់ទងនឹងការគេចខ្លួនរបស់ម្ចាស់ក្លឹប តែពេលនេះខាងសមត្ថកិច្ចកំពុងតែខិតខំបន្តប្រតិបត្តិការតាមចាប់ខ្លួនម្ចាស់ក្លឹបនេះ ដើម្បីយកមកដោះស្រាយជាមួយក្រុមគ្រួសារសពទាំង៥នាក់»។
ទាក់ទងនឹងបញ្ហានេះ ក្រុមគ្រួសារសពទាំង៥នាក់ បានដាក់ពាក្យបណ្តឹងមកកាន់ប៉ុស្តិ៍នគរបាលរដ្ឋបាលសង្កាត់ចាក់អង្រែក្រោម និងត្រៀមបញ្ជូនទៅកាន់ព្រះរាជ្ញានៃសាលាដំបូងរាជធានីភ្នំពេញ ដើម្បីទាមទារសំណង។
សូមរំឭកថា កាលពីយប់ថ្ងៃទី៧ ខែកញ្ញា ឆ្នាំ២០១៥ អគ្គីភ័យបានឆាបឆេះ ក្លឹបកម្សាន្តមួយកន្លែង មានយីហោឈ្មោះថា ឃីក្លឹប ដែលស្ថិតនៅសង្កាត់ចាក់អង្រែក្រោម ខណ្ឌ មានជ័យ។ ហេតុការណ៍អកុសលនេះ បានបណ្តាលឲ្យស្ត្រីជាបុគ្គលិក៥នាក់ ស្លាប់បាត់បង់ជីវិត និងស្រី២នាក់ទៀតរបួសធ្ងន់៕
© រក្សាសិទ្ធិដោយ thmeythmey.com