ជាតិ
អគ្គស្នងការរងនគរបាលជាតិបញ្ជាស្វែងរកចាប់ខ្លួនស្ត្រីម្នាក់ ជេរប្រមាថនគរបាល រូបថតពីគេហទំព័រអគ្គស្នងការដ្ឋាននគរបាលជាតិ
× ភ្នំពេញ៖ អគ្គស្នងការរងនគរបាលជាតិ និងជាមេបញ្ជាការនគរបាលជាតិទទួលទិសភូមិភាគ ៤-៥ លោក ខេង សុមេធ បានចេញបទបញ្ជាឱ្យស្នងការនគរបាលខេត្តបាត់ដំបងលោក ស ថេត សហការជាមួយព្រះរាជអាជ្ញាត្រូវស្វែងរកចាប់ឃាត់ខ្លួនស្ត្រីទំនើងម្នាក់ បើករថយន្តស្រវឹងស្រាបង្កគ្រោះថ្នាក់ចរាចរណ៍ ហើយថែមជេរប្រមាថនគរបាលអនុវត្តច្បាប់ ទោះបីស្ត្រីរូបនោះ រត់គេចខ្លួនចូលទៅប្រទេសថៃក៏ដោយ ក៏មិនអាចគិចផុតពីសំណាញ់ច្បាប់ឡើយ។ នេះបើតាមការផ្សាយរបស់អគ្គស្នងការដ្ឋាននគរបាលជាតិ។
លោក ខេង សុមេធ ថ្លែងបែបនេះ ក្នុងពិធីប្រកាសតែងតាំងមុខតំណែង និងផ្ទេរភារកិច្ចនគរបាលខេត្តបន្ទាយមានជ័យ កាលពីរសៀលថ្ងៃទី២៣ ខែកញ្ញា ឆ្នាំ២០១៥នេះ។
កាលពីយប់ថ្ងៃទី១៩ ខែកញ្ញា ឆ្នាំ២០១៥ ស្ត្រីម្នាក់ដែលគេស្គាល់ថាឈ្មោះ សូ ដាម៉ុន អាយុ ៤១ឆ្នាំ ប្រកបមុខរបរ បើកសំអាងការ នៅស្រុកសំពៅលូន ខេត្តបាត់ដំបង បានបើក រថយន្តទំនើបម៉ាក Audi ពណ៌សពាក់ស្លាកលេខភ្នំពេញ 2AG 7576 ក្នុងស្ថានភាពស្រវឹង បានបង្កគ្រោះថ្នាក់ទៅលើស្ត្រីម្នាក់ជិះកង់បណ្តាលឱ្យរងរបួសធ្ងន់ធ្ងរ នៅលើផ្លូវជាតិលេខ៥៩b ស្ថិតនៅចំណុចត្រាវជូ ក្នុងភូមិអូរចំណិត ឃុំតាស្តា ស្រុកសំពៅលូន ខេត្តបាត់ដំបង។ នៅពេលកើតហេតុ គេឃើញនគរបាលម្នាក់បានទៅសួរនាំ ហើយក៏ត្រូវបានស្ត្រីឈ្មោះ សូ ដាម៉ុន ជេរប្រមាថមកលើនគរបាលកំពុងតែបំពេញភារកិច្ចនោះ យ៉ាងចាស់ដៃបង្កឱ្យមានការភ្ញាក់ផ្អើល។ តាមប្រភពដដែល ស្ត្រីឈ្មោះ សូ ដាម៉ុន បានគេចខ្លួនទៅប្រទេសថៃ ក្រោមហេតុផលទៅព្យាបាលមុខរបួសនៅប្រទេសថៃ។
បើតាមការផ្សាយ នៅថ្ងៃទី២៤ ម្សិលមិញនេះ នគរបាលខេត្តបាត់ដំបងបានធ្វើដំណើរទៅទំនាក់ទំនងជាមួយសមត្ថកិច្ចប្រទេសថៃហើយ ដើម្បីជួយសហការតាមចាប់ឃាត់ខ្លួន ស្ត្រីឈ្មោះ សូដាម៉ុន។ ស្ត្រីខាងលើអាចប្រឈមនឹងការចោទប្រកាន់ ២ករណី គឺ ការបើកបរមានផ្ទុកជាតិអាលកុលលើសកំរិត ពិន័យជាទឹកប្រាក់ពី ៨០ម៉ឺនរៀលទៅ ៤លានរៀលផ្តន្ទាទោសដាក់ពន្ធនាគារ ពី១ ខែទៅ៦ខែ តាមមាត្រា ៧៧នៃច្បាប់ចរាចរណ៍ផ្លូវគោក និងការជេរប្រមាថទៅលើសមត្ថកិច្ចអនុវត្តច្បាប់បង្កឱ្យប៉ះពាល់កិត្តិយសប្រឈមតាមច្បាប់ព្រហ្មទណ្ឌ៕
© រក្សាសិទ្ធិដោយ thmeythmey.com