ជាតិ
នយោបាយជាតិ
លោក ឈឹម ផលវរុណ ថា បើ ១ សប្តាហ៍ទៀតមានការបោះឆ្នោត CNRP នឹងបានតែ ២០ កៅអី
× អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានជំនឿថា គណបក្សប្រជាជនកម្ពុជា កំពុងតែកើនប្រជាប្រិយភាពយ៉ាងខ្លាំង ហើយលោកបង្អាប់គណបក្សសង្គ្រោះជាតិថា ធ្លាក់ចុះប្រជាប្រិយភាពយ៉ាងគំហុក។ លោក ឈឹម ផលវរុណ និយាយថា បើមួយសប្តាហ៍ទៀតមានការបោះឆ្នោត គណបក្សសង្គ្រោះជាតិ នឹងបានសំឡេងគាំទ្រតែ ២០ អាសនៈ។ តែអ្នកវិភាគនយោបាយ យល់ថា បច្ចុប្បន្នគណបក្សសង្គ្រោះជាតិ មានប្រជាប្រិយភាពប្រហាក់ប្រហែលនឹងពេលបោះឆ្នោតឆ្នាំ ២០១៣ កន្លងទៅ ហើយគណបក្សប្រជាជនកម្ពុជា ក៏ហាក់មិនកើនអ្នកគាំទ្រនោះដែរ។
លោក ឈឹម ផលវរុណ ដែលជាអ្នកវិភាគនយោបាយគាំទ្រគណបក្សប្រជាជនកម្ពុជា បានបន្តុះបង្អាប់ប្រជាប្រិយភាពគណបក្សសង្គ្រោះជាតិ ហើយសរសើរគណបក្សប្រជាជនកម្ពុជារបស់ខ្លួនថា កំពុងកើនប្រជាប្រិយភាព។ លោក ហ៊ាននិយាយថា «ប្រសិនបើរយៈពេល ១ សប្តាហ៍ទៀត មានការបោះឆ្នោតជ្រើសតាំងតំណាងរាស្ត្រនោះ គណបក្សសង្គ្រោះជាតិ នឹងធ្លាក់កៅអីមកសល់តែ ២០ កៅអីប៉ុណ្ណោះ ហើយគណបក្សប្រជាជនកម្ពុជា នឹងទទួលកៅអីបន្ថែមទៀតប្រមាណ ១៥ និងជាង ២០ កៅអីទៀត នឹងបានទៅគណបក្សតូចៗធ្លាប់គាំទ្រគណបក្សប្រឆាំង» ។ លោក ឈឹម ផលវរុណ មានជំនឿយ៉ាងខ្លាំងថា ការបោះឆ្នោតនៅឆ្នាំ ២០១៨ ខាងមុខគណបក្សប្រជាជនកម្ពុជា នឹងឈ្នះម្តងទៀត។
ថ្លែងប្រាប់សារព័ត៌មានថ្មីៗ កាលពីចុងសប្តាហ៍កន្លងទៅ លោក ឈឹម ផលវរុណ និយាយថា បច្ចុប្បន្ននេះ គណបក្សប្រជាជនកម្ពុជា មានអ្នកគាំទ្រកាន់តែច្រើនឡើង ដោយសារតែប្រទេសកម្ពុជាក្រោមដឹកនាំដោយលោកនាយករដ្ឋមន្ត្រី ហ៊ុន សែន សេដ្ឋកិច្ចរីកចម្រើន និងឆន្ទៈពិតប្រាកដរបស់មេដឹកនាំគណបក្សនេះ ដោះស្រាយបញ្ហារបស់ជាតិ។ អ្នកនាំពាក្យគណបក្សប្រជាជនកម្ពុជារូបនេះ បានបញ្ជាក់ពីមូលហេតុដែលប្រជាប្រិយភាពរបស់គណបក្សសង្គ្រោះជាតិ ធ្លាក់ចុះយ៉ាងខ្លាំង ដោយសារតែសម្តីភូតកុហករបស់ លោក សម រង្ស៊ី និងលោក កឹម សុខា។លោក ឈឹម ផលវរុណ បញ្ជាក់យ៉ាងនេះថា៖ « ពាក្យកុហកទាំងនោះ យើងដឹងគ្រប់គ្នាហើយថា ក្រោយបោះឆ្នោតមេដឹកនាំគណបក្សនេះ ប្រាប់អ្នកគាំទ្រខ្លួនថា ទាមទារឲ្យរាប់សន្លឹកឆ្នោតឡើងវិញ បោះឆ្នោតឡើងវិញមុនអាណត្តិ និងប្រកាសអត់ចូលសភា។ តែខ្លួនទាមទារមិនបាន និងមិនគោរពសម្តីខ្លួនឯង។ ហើយពេលបានចូលសភា ឃ្លានអំណាច»។
ទាក់ទងនឹងការលើកឡើងរបស់ លោក ឈឹម ផលវរុណ លោក អ៊ូ វីរៈ អ្នកវិភាគនយោបាយ យល់ថា ប្រជាប្រិយភាពរបស់គណបក្សប្រជាជនកម្ពុជា ហាក់ដូចជាមិនទាន់កើនឡើងជាងឆ្នាំ ២០១៣ កន្លងនោះទៅនោះទេ។ « គ្រាន់តែថា មេដឹកនាំគណបក្សប្រជាជនកម្ពុជា ជាពិសេសលោក ហ៊ុន សែន ប្តូរឥរិយាបថបន្តិចក្នុងរយៈពេលចុងក្រោយនេះ មិនដូចកាលដែលខ្លួនបាន ៩០ អាសនៈ ជិះសេះលែងដៃ»។ អ្នកវិភាគរូបនេះ និយាយដូច្នេះ ពីព្រោះតែលោកឃើញ លោក ហ៊ុន សែន ព្យាយាម ខ្នះខ្នែងពន្យល់ និងទាក់ទាញចិត្តប្រជាពលដ្ឋឲ្យយល់អំពីសកម្មភាពល្អនៃការដឹកនាំរបស់ខ្លួន ក្រោយពីបាត់សំឡេងគាំទ្រច្រើនកាលពីឆ្នាំ ២០១៣ ។ តែយ៉ាងណាលោក អ៊ូ វីរៈ អះអាងថា ការខំយកចិត្តប្រជាពលរដ្ឋរបស់លោក ហ៊ុន សែន មិនអាចធ្វើឲ្យគណបក្សប្រជាជនកម្ពុជា កើនអ្នកគាំទ្រឡើយ។ លោក បញ្ជាក់យ៉ាងនេះថា៖« ការប្តូរឥរិយាបថរបស់លោក ហ៊ុន សែន បានត្រឹមតែធ្វើឲ្យពលរដ្ឋបន្ថយកំហឹងខ្លះតែប៉ុណ្ណោះ»។
ពាក់ព័ន្ធនឹងប្រជាប្រិយភាពរបស់គណបក្សសង្គ្រោះជាតិ លោក អ៊ូ វីរៈ វិភាគឃើញថា គណបក្សនេះ មិនបាត់សំឡេងគាំទ្រប៉ុន្មាននោះទេ។ តែគ្រាន់តែប្រជាប្រិយភាពមិនដូចឆ្នាំ ២០១៣ ដោយសារលោក សម រង្ស៊ី ទើបមកពីក្រៅប្រទេស និងការរួបរួមគ្នារវាងលោក សម រង្ស៊ី និងលោក កឹម សុខា នៅពេលនោះ ។ ទន្ទឹមនឹងនិយាយដូច្នេះ លោក អ៊ូ វីរៈ ក៏រិះគន់ពីគោលនយោបាយមិនច្បាស់លាស់របស់គណបក្សសង្គ្រោះជាតិដូច្នេះថា៖ «ខ្ញុំគិតថា គណបក្សប្រឆាំងអាចធ្លាក់ប្រជាប្រិយភាពដោយសារមិនច្បាស់លាស់ ម្តងឲ្យរិះគន់រឿងព្រំដែន ម្តងមិនឲ្យរិះគន់។ ខ្ញុំថា គណបក្សសង្គ្រោះជាតិ ត្រូវកែទម្រង់ផ្ទៃក្នុងបក្ស និងដាក់គោលនយោបាយឲ្យច្បាស់ ដើម្បីឲ្យកើនសំឡេងអ្នកគាំទ្រ»។
ងាកមកលោក ឈឹម ផលវរុណ ម្តងទៀត លោកបានបន្តលើកឡើងអំពីមូលហេតុដែលគណបក្សសង្គ្រោះជាតិធ្លាក់ចុះអ្នកគាំទ្រថា ការបង្កើតគណបក្សតូចៗថ្មី មានគណបក្សលោក ម៉ម សូណង់ដូ គណបក្ស លោក សួន សេរីរដ្ឋា និងគណបក្សមូលដ្ឋាន ជាដើម ដែលជាអតីតអ្នកគាំទ្រគណបក្សសង្គ្រោះជាតិនោះ ក៏ជាហេតុផលឲ្យគណបក្សដែលមានសំឡេងនៅក្នុងសភា ៥៥ កៅអីបច្ចុប្បន្នមួយនេះ ធ្លាក់ចុះអ្នកគាំទ្រ។ ការលើកឡើងរបស់លោក ឈឹម ផលវរុណ ផ្ទុយពីការយល់ឃើញរបស់លោក អ៊ូ វីរៈ។ អ្នកវិភាគរូបនេះ ចាត់ទុកការបង្កើតបក្សថ្មីៗនាពេលបច្ចុប្បន្ន មិនអាចបំបែកសំឡេងគណបក្សសង្គ្រោះជាតិបាននោះទេ។ «ព្រោះប្រជាពលរដ្ឋបច្ចុប្បន្ន ពួកគាត់មើលឃើញតែគណបក្សពីរតែប៉ុណ្ណោះ»។ នេះជាទឡ្ហីករណ៍បន្ថែមរបស់លោក អ៊ូ វីរៈ៕
© រក្សាសិទ្ធិដោយ thmeythmey.com