បទវិភាគ
សង្គមជាតិ
នយោបាយជាតិ
«សក់អាណា ក្បាលអាហ្នឹង»ជាពាក្យស្លោកដ៏គ្រោះថ្នាក់សម្រាប់ជាតិខ្មែរ
× ភ្នំពេញ៖ ក្នុងសង្គមខ្មែរ មានពាក្យស្លោកមួយចំនួនដែលបានបង្រៀនកូនខ្មែរឲ្យមានគំនិត អាត្មានិយម មិនចេះជួយគ្នា និងគ្មានឧត្តមគតិជាតិ។ ពាក្យស្លោកទាំងនោះ ត្រូវបានបង្កើត ដោយអ្នកនយោបាយខ្លះ និងទទួលឥទ្ធិពលពីបរទេសខ្លះ។ ហើយពាក្យស្លោកទាំងនោះ តែងបានបំផ្លាញឬសគល់សង្គមខ្មែរ ឲ្យបាត់បង់បន្តិចម្តងៗ រហូតដល់ការផ្តួលរំលំគ្រឹះនៃភាព សាមគ្គី ក្នុងសន្តានចិត្តពលរដ្ឋខ្មែរ។
ពាក្យស្លោកជាឃ្លាដែលតែងបង្រៀនមនុស្សឲ្យដុះនូវផ្នត់គំនិតអ្វីមួយ ទៅតាមអត្ថន័យរបស់ពាក្យស្លោក។ បុរាណខ្មែរ តែងតែបង្កើតពាក្យស្លោកនានា ដើម្បីបង្រៀនកូនចៅជំនាន់ ក្រោយ។ ក្នុងពាក្យស្លោកទាំងនោះ មានឃ្លាខ្លះល្អមិនអាចកាត់ថ្លៃបាន ពោលគឺមានគតិអប់រំល្អៗ ជាច្រើនដែលធ្វើឲ្យសង្គមរីកចម្រើន។ ប៉ុន្តែមានពាក្យស្លោកមួយចំនួនទៀតដែលធ្វើឲ្យសង្គមមានគ្រោះថ្នាក់ដែលត្រូវតែបោះបង់ចោល។
ពាក្យស្លោកមួយឃ្លាថា«សក់អាណា ក្បាលអាហ្នឹង» ពាក្យនេះ ត្រូវរបបខ្មែរក្រហមយកបណ្តុះកម្មាភិបាលថ្នាក់ក្រោម និងប្រជាជនមូលដ្ឋានឲ្យអនុវត្តន៍ ដើម្បីដាក់ទោសដល់ប្រជាជនដែលជម្លៀសពីភ្នំពេញ។ ដោយសារតែពាក្យស្លោកមួយឃ្លានេះ បានធ្វើឲ្យប្រជាជនកម្ពុជាស្លាប់ជិតបីលាននាក់ ដោយសារ ការកម្ទេចរបស់ខ្មែរក្រហម ក្រោមលេស ថាជាCIAKGBក្បត់បដិវត្ត និងជាពួកខ្មាំងដើម។ ពាក្យស្លោកនេះ បានបង្អាក់ស្មារតីមនុស្សខ្មែរ មិនឲ្យចេះជួយគ្នា។ ឃ្លានេះ បានធ្វើឲ្យខ្មែរក្រហមជោគជ័យក្នុងការសម្លាប់ពលរដ្ឋខ្មែរ។ ពាក្យស្លោកនេះ ធ្វើប្រជាពលរដ្ឋខ្មែរ ត្រូវបានខ្មែរក្រហមយកអំបោះចងដៃដឹកយកទៅវាយក្នុងរណ្តៅដោយមិនហ៊ានតដៃ។ ពាក្យនេះត្រូវស្ងប់ស្ងាត់មួយរយៈ បន្ទាប់ពីមានកម្ពុជាមានសន្តិភាព។ ប៉ុន្តែពាក្យស្លោកនេះនៅតែសម្ងំក្នុងសន្តានចិត្តពលរដ្ឋខ្មែរមួយចំនួនធំ ដែលធ្វើឲ្យសីធម៌ គុណធម៌ និងឧត្តមគតិសង្គមធ្លាក់ចុះ។ ការប្រើប្រាស់ ពាក្យស្លោកនេះ បានធ្វើឲ្យមនុស្សខ្មែរ ប្រកាន់ភ្ជាប់គំនិតអគតិ អាត្មានិយម លែងចេះជួយគ្នា និង ធ្វើឲ្យពលរដ្ឋខ្មែរបែកបាក់សាមគ្គីយ៉ាងធ្ងន់ធ្ងរដែលពិបាកនឹងស្រោចស្រង់។ ពេលមានបញ្ហាកើតឡើង ដូចជា ភ្លើងឆេះផ្ទះ គ្រោះថ្នាក់ចរាចរណ៍ ឬជួបគ្រោះថ្នាក់ដោយប្រការផ្សេងៗ មនុស្សបានបោះបង់គំនិតជួយគ្នាចោល ហើយស្រវ៉ា យកពាក្យស្លាក «សក់អាណា ក្បាលអាហ្នឹង ឬចង្កៀងផ្ទះអ្នកណា ភ្លឺផ្ទះអ្នកហ្នឹង»។
ដូច្នេះពាក្យស្លោកដ៏គ្រោះថ្នាក់នេះ ល្មមប្រជាពលរដ្ឋខ្មែរទូទៅ ដកចេញពីផ្នត់គំនិត និងមិនត្រូវឲ្យមាននៅក្នុងគំនិតប្រជាជនខ្មែរទៀតនោះទេ ព្រោះពាក្យស្លោកនេះ បានធ្វើឲ្យសង្គមមិនមានការរីកចម្រើននោះទេ តែផ្ទុយទៅវិញ ពាក្យនេះ បានធ្វើឲ្យមនុស្ស ឈប់ចេះជួយគ្នា និងបែកបាក់សាមគ្គីភាពគ្រប់ស្រទាប់វណ្ណៈនៅក្នុងសង្គមខ្មែរ។ ហើយ បើសង្គមមួយបាត់បង់គំនិតជួយគ្នា គំនិតអធ្យាស្រ័យ និងគំនិតសាមគ្គី តើសង្គមអភិវឌ្ឍន៍ទៅមុខបានយ៉ាងដូចម្តេចទៅ?
© រក្សាសិទ្ធិដោយ thmeythmey.com