ជាតិ
នយោបាយជាតិ
ឈប់ធ្វើរដ្ឋមន្ត្រីព័ត៌មានអាណត្តិក្រោយ ជាជំហរច្បាស់លាស់របស់លោក ខៀវ កាញារីទ្ធ
× ភ្នំពេញ៖ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានប្រកាសបើកចំហរជាលើកទី ២ ពី ការចូលនិវត្តន៍ឈប់ពីការងារជារដ្ឋមន្ត្រីក្រសួងព័ត៌មាន នៅអាណត្តិទី ៦ ឆ្នាំ ២០១៨ខាងមុខ។ នេះបើតាមការសរសេររបស់លោក កឹម គុណវឌ្ឍ អគ្គនាយកទូរទស្សនជាតិកម្ពុជា (ទទក) នៅលើគណនីហ្វេសប៊ុក។
នៅក្នុងសប្តាហ៍នេះ លោក ខៀវ កាញារីទ្ធ បានប្រកាសជំហររហូតដល់ទៅពីរលើកថា លោកមិនទទួលភារកិច្ចជារដ្ឋមន្ត្រីក្រសួងព័ត៌មានទៀតឡើយ សម្រាប់អាណត្តិទី៦ ចាប់ពីឆ្នាំ២០១៨ ។ អគ្គនាយកទូរទស្សន៍ជាតិកម្ពុជា លោក កឹម គុណវឌ្ឍ បានសរសេរនៅលើហ្វេសប៊ុកថា៖ «ឯ.ឧ ខៀវ កាញារីទ្ធ មានប្រសាសន៍ចំហរជាលើកទី២ ពីការចូលនិវត្តន៍ឈប់ពីការងារជារដ្ឋមន្ត្រីក្រសួងព័ត៌មាននៅ អាណត្តិទី ៦ ឆ្នាំ២០១៨ខាងមុខ»។
លោក ខៀវ កាញារីទ្ធ ដែលជាមន្ត្រីជាន់ខ្ពស់ម្នាក់របស់គណបក្សប្រជាជនកម្ពុជា បានមានប្រសាសន៍បែបនេះ នាពិធីប្រកាសតែងតាំងប្រធានមន្ទីរព័ត៌មានខេត្តសៀមរាប ថ្មី គឺលោក លីវ សុខុន ឡើងជំនួស លោក កែវពេជ្រនិមល ដែលបានចូលនិវត្តន៍។
គួររម្លឹកថា កាលពីព្រឹកថ្ងៃទី៥ ខែតុលា ឆ្នាំ២០១៥ នាក្រសួងព័ត៌មាន លោក ខៀវ កាញារីទ្ធ ប្រកាសនឹងមិនទទួលភារកិច្ចជារដ្ឋមន្ត្រីក្រសួងព័ត៌មានទៀតទេ ក្នុងអាណត្តិក្រោយ ដោយទុកឱកាសឱ្យអ្នកជំនាន់ក្រោយដឹកនាំ ហើយដោយសារលោកបានកាន់តំណែងនេះអស់រយៈពេលជាង១០ឆ្នាំរួចមក។
ក្នុងបទសម្ភាសមួយជាមួយវិទ្យុសំឡេងសហរដ្ឋអាមេរិក លោក អ៊ុក គឹមសេង អនុរដ្ឋលេខាធិកាក្រសួងព័ត៌មានបានអះអាងថា លោក ខៀវ កាញារីទ្ធ តែងតែនិយាយជាញឹកញាប់ពីការដកខ្លួនពីការងារជារដ្ឋមន្ត្រីក្រសួងព័ត៌មាន។
លោក ខៀវ កាញារីទ្ធ វ័យ៦៥ឆ្នាំ ដែលជាអតីតអ្នកសារព័ត៌មានបានកាន់កាប់តួនាទីជារដ្ឋមន្ត្រីក្រសួងព័ត៌មានចាប់តាំងពីអាណត្តិទី ៣ នាឆ្នាំ២០០៣មក ក្រោយកាន់តំណែងជារដ្ឋលេខាធិការចាប់តាំងពីការបោះឆ្នោតលើកទី១ នាឆ្នាំ១៩៩៣៕
© រក្សាសិទ្ធិដោយ thmeythmey.com