ជាតិ
រយៈពេលជាង ១០ឆ្នាំ បទល្មើសថយចុះចំនួន ៦០,៣៣ភាគរយនៅកម្ពុជា
×
ភ្នំពេញ៖ អ្នកនាំពាក្យអគ្គស្នងការនគរបាលជាតិលោក គៀត ច័ន្ទថារិទ្ធ បានលើកឡើងពីតួលេខនៃបទល្មើសក្នុងដំណាក់ការបោះឆ្នោតជាតិ ចាប់ពីឆ្នាំ១៩៩៨ រហូតដល់អាណត្តិទី៥ ឆ្នាំ២០១៣ កន្លងទៅ។
លោកឧត្តមសេនីយ៍ គៀត ច័ន្ទថារិទ្ធ បានបញ្ជាក់ប្រាប់អ្នកសារព័ត៌មានអគ្គស្នងការដ្ឋាន នគរបាលជាតិ ពាក់ព័ន្ធនឹងបទល្មើសតាមដំណាក់កាលបោះឆ្នោតវិញថា ក្នុងអាណត្តិបោះឆ្នោតឆ្នាំ១៩៩៨ បទល្មើសមានសរុបចំនួន ៦៨៤៧លើក ដល់ ២០០៣ បទល្មើសថយមកត្រឹម ៥៦៩១លើក ថយចុះ ១៦,៨៨ភាគរយ។ ក្នុងឆ្នាំ២០០៨ បទល្មើសមានចំនួន ២៨៨១លើក ថយចុះ ៥៧,៩២ភាគរយ ដល់ឆ្នាំ២០១៣ បទល្មើសមាន ២៧១៦លើក បើប្រៀបធៀប ១៩៩៨ ដល់ អាណត្តិទី៥ ឆ្នាំ ២០១៣ បទល្មើសថយចុះ ៦០,៣៣ភាគរយ ។ លោកបាននិយាយកាលពីរសៀលថ្ងៃច័ន្ទ ម្សិលមិញថា នេះគឺជាសមិទ្ធផលនៃកិច្ចប្រតិបត្តិការរបស់កងកម្លាំងនគរបាល ក្នុងការថែរក្សាសន្តិសុខ សុវត្ថិភាពជូនប្រជាពលរដ្ឋ។
ជាងនេះទៀត លោកបន្តថា ក្នុងខែកញ្ញា ឆ្នាំ២០១៥កន្លងទៅនេះ បទល្មើសបានកើតឡើងចំនួន ២៣៤លើក ថយចុះ ៣ ភាគរយ ពិសេសគឺ ករណីប្លន់ ថយចុះចំនួន ២៩ភាគរយ។
បើតាមអគ្គស្នងការដ្ឋាននគរបាលជាតិ រយៈពេល ៩ខែ ក្នុងឆ្នាំ ២០១៥នេះ បទល្មើសមាន ចំនួន ២០២៦លើក ថយចុះ ៥ភាគរយ បើប្រៀបធៀបនឹងរយៈពេលដូចគ្នាឆ្នាំទៅ បទល្មើស ចំនួន ២១៣០លើក៕
© រក្សាសិទ្ធិដោយ thmeythmey.com